Read Nugunu Filípe 4 Bible Online

Filípe 4 - Nugunu bible

Filípe 4

¹Bolimóní bámɛ bá odɛ́má, odɛ́má yámɛ yó kɔndɛmɔ yó amɔ́ gásɛ́ ŋgaá gɔnɔ́ nyó ɛ́na, bɛɛnyɔ́ɔ, bɛyaŋa bámɛ, bɛɛnyɔ́ɔ bɛsoɛná bámɛ. Bámɛ bá odɛ́má, lɔbɛ́nɔ nɔnɔ gɛ́ndɛ́ŋɛ́ gɛndɛŋɛ báladáalú kanɛ́ nɔ́ɔnɔ naá Daadáa.

²Ŋgaá bósógólídío Efodíi nɛhɛ́ na Sintíse caá, ɔyɔ́ɔ nɔnɔ ukelú yúmmue na Daadáa.

³Kɔ́ɔ maamɔ́ɔ, udílígíní bamɛ ba pídefide, ŋgaá go oyáná goŋaá o bɛ́ɛmba nabɔ́, o bó óhiginyo, goakɛ́ bá lɛ́ noanáná noanáná olɔŋɔ namɛ go go dúmenye Gɛnɔ́gɔ́ gá Cɔ́mɔ, caŋa mmue Kɛlɛmáŋa na biimée bóncodío báaba dɛ yɔgɔnɔmɔ́ nabɔ́, ifíno yabɔ́ ɛ lɛ́ naá kálata ya gɛɔyɔ[6].

⁴Aŋa no ɔ́bɛnɔnɔmɔ́ na Daadáa, békelényéemú nɔnɔ bɛcamɛna biimée; ŋgaá gɔnɔ́ fitie caá, békelényéemú nɔnɔ.

⁵Ŋgáa batɔ biimée bɛ́ ɛ́ná goŋaá no ŋanana moóma má busi. Daadáa a lɛ́ mekúígíi.

⁶No do yóbímídónóo go boóma[7], kanɛ́ go buimée, ɔŋɔ́nɔ́ɔ nɔnɔ Asaŋa bɔ́ɔbɔ no lɔ́mɔ́ mbií go bɔ́. No mo bósógolonyo, no mo yɛ́bɛnayɛbɛna, no gɔnɔ mo béhiigi tɔ́nɔ.

⁷Kɔ́ɔ, buumbénú bá Asaŋa bɔ́ɔbɔ bó dómbanamɔ́ nciŋí yɛ́ɛyɛ mɔtɔ a lɔ́mɔ́ ba go bɛa, bó ŋgaá beŋé ɛdɛ́má yɛnyɔ́ na mbééníŋínyí sɛ́nyɔ́ naá go bálada na Yésu Kilítu.

⁸Bolimóní, mesúgidinye má lɔ́mɔ́ goŋaá, ŋgáa ɛdɛ́má yɛnyɔ́ ɛ lɛ́ga bɔ́ɔbɔ bá maamanamɔ́ bá gɔnɔ hálamanana, bɔ́ɔbɔ bó lɔ́mɔ́ tɛ́nɛ́ɛ, bɔ́ɔbɔ bó lɔ́mɔ́ kanɛ giílo, bɔ́ɔbɔ bá háananamɔ́ go maamana, bá búlugenye, bɔ́ɔbɔ bó lɔ́mɔ́ ndoŋá ya besé, bɔ́ɔbɔ bó háananamɔ́ na nuségi.

⁹Ŋanánáa nɔnɔ buimée bɔ́ɔbɔ no mbaá hóónáa, no báá ŋgɔ́bɔ́nɔ́ɔ ŋgoya, no báá ndɛ́ɛ́máa. Gɔ́ɔ kanɛ́, Asaŋa mɔ́ɔnyɔ a fáananamɔ́ buumbénú a ŋgaá bɛ́ɛ́mbá nɛnyɔ́.

¹⁰Ndɛ́ békelényéelú makɔ́nɔ́ naá Daadáa go gɔ́ɔgɔ no lɔ́mɔ́ gɔnɔ́ mbééníŋínyéelú. Ɛɛ́ɛŋ, no mba lɛ́ no mbéeniŋenye, kanɛ́ no do mbáa lɛ na pɛ́ ya go ŋgóhiginyo.

¹¹Aáŋa akɛ́ kálagalamɔ́ nɔ́ɔnɔ, bó do báá goŋaá ndɛ́ naá mbií. Mammana, ndɛ́ hóóná hóóná go báháanana naá odɛ́nɛ́ uŋkimée yɔ́ɔyɔ ndɔ́mɔ́ hɔ́ɔ.

¹²Ŋgíyimene go ɔyɔ naá kanɛ bɔ́, ŋgíyimene tɔ́nɔ go ɔyɔ naá fundufundu. Gɛcamɛna giimée, gɔnɔ́ na hoóma hiimée háaha ndɔ́mɔ́ hɔ́ɔ, mmba hóónáa go nyáanya kóogio, aŋa go ɔ́bɔnɔ ncaná; go go ɔyɔ naá fundufundu na naá kanɛ bɔ́.

¹³Ndɛ́ ba go ŋa buimée naá bogaaga bá Mɔ́ɔnyɔ a kíndenyemú.

¹⁴Kanɛ́ gɔgɔ́, no lɛ́ ŋaáalú bese, aŋa no lɔ́mɔ́ ɔ́bɔ́ɔlú bɛdɔmbɔ bámɛ, no báá gɔ́lɔ́ bodáŋɔ kɔ́ɔ.

¹⁵Bɛɛnyɔ́ɔ batɔ bá Filípe, no íyimene nɔ́ɔ goŋaá naá gobayɛga gámɛ gá go dúmenye Gɛnɔ́gɔ́ gá Cɔ́mɔ, aŋa mbuú úlúkíe naá Masɛdóanɛ, giimbó gá boolímínyí gíncodío gɛ́ lɛ́ kanɛ go ŋgóhiginyo go boóma, ɛ́na go ŋgúhune boóma, aáŋa caá goana bɛɛnyɔ́ɔ bákáa.

¹⁶Medúgú máama ndɔ́mɔ́ dúmbíelú naá Tesoloníke, no lɛ́ tómɛ́náalú bɔ́ɔbɔ mbaá lɛ mbií go bɔ́ ɛŋɛndɔ gɛca[8].

¹⁷Kanɛ́ cɛ báá naá go fúmbe go páanana moóma, púmbemú goŋaá no bɛa gɛfona go buelí bɛ́nyɔ́.

¹⁸Moatɛ́, ndɛ́ háalá na buimée bɔ́ɔbɔ bó ŋgúhenemú go ɛmbɔ́gɔ, moánɛ bó dómbana. Ndɛ́ dácɛ na moóma mɔ́ɔmɔ no mbaá tómɛ́ná gá Epofolodíte. Pááná sɛ́nyɔ́ sɛ́ lɛ́ aŋa alabɛ́nda ba go fofa gɛnɔ́gɔ́, gɛbáágá gɛ́ɛgɛ Asaŋa o olimonyomú, gɛ́ gɔnɔ mo fɛɛnanɛna[9].

¹⁹Asaŋa bamɛ a ŋga nyó hóógío dácɛ na buimée bɔ́ɔbɔ no lɔ́mɔ́ mbií go bɔ́. A ŋga ŋaáa nɔ́ɔ gá Yésu Kilítu aŋa gɛmánya gɛ́hɛ́ gá bonɔ́mɛ gɛ́ lɔ́mɔ́.

²⁰Ŋgáa Asaŋa Isée bɛcɔ́ a gɔ́lɔ nigúmi go mannyómá aá mannyómáa. Aamɛnɛ.

²¹Bédíígíe nɔnɔ boolímínyí biimée bá Yésu Kilítu. Bolimóní báaba bá lɔ́mɔ́ namɛ háalá bá á nyó bédíígényée.

²²Boolímínyí biimée bá Yésu Kilítu bá á nyó bédíígényée, dómbá dómbáa báaba bá lɔ́mɔ́ naá nnyaŋá ya Sɛsáalɛ.

²³Ŋgáa Daadáa Yésu Kilítu a nyó fona bɛɛnyɔ́ɔ biimée.