Read Nugunu Kolóose 2 Bible Online

Kolóose 2 - Nugunu bible

Kolóose 2

¹Ndɛ́galɛga kanɛ́ goŋaá no íyime kasɛ́á gɛlalaga gá nɛnoa nnoananamɔ́ go busío bɛnyɔ́ batɔ bá Kolóoso, na batɔ bá Leyodíse, gɔnɔ́ na gɛca gá batɔ gíncodío gɛ́ɛgɛ gɛ́ gá báasamɔ́ gɛ́ dɛ ŋgɛ́ná yɔmɔ́ moatɛ́.

²Ndɛ́galɛga caá ɛdɛ́má yabɔ́ ɛ bɛ́ɛmba dácɛ na magɛ́nda, bá bɛ́ɛmba báladáalú naá gɛnɔ́ɔ́nɛ́nɔ́, bá gunde bá bɛ́ɛmba fundufundu na toodo odɛ́máa iŋkimée yɛ́ɛyɛ mammana ya nciŋí ɛ fáanɛnamɔ́; nɔ́ɔ gɔ́ɔ, bá gaá ná lɛncá nnindíi ya Asaŋa yɛ́ɛyɛ ɛ lɔ́mɔ́ Kilítusu moatɛ́ moatɛ.

³Naá mɔ́ɔ gɔ́ɔ, bonɔ́mɛ buimée bá nciŋí na goíyime mó lɔ́mɔ́ ɔsɛ́gɔ́ɔlú.

⁴Nyó oyanɛna boóma moánɛ goŋaá mɔtɔ a dɛ ncó nyó nite na bɛnɔ́gɔ́ bá dogálɔ bá mbele.

⁵Kanɛ cuŋí, no do ŋgɛ́nánáa, kanɛ́ ndɛ́ olɔŋɔ nɛnyɔ́ naá giliíli, kunde ŋgɔ́bɔnɔ bese go gɔ́ɔgɔ no nonamɔ́ odɛ́nɛ́ yɛ́nyɔ́, no gunde no gɛ́ga gɛ́ndɛ́ŋɛ́gɛndɛŋɛ, no ágana odɛ́má yɛ́nyɔ́ naá Kilítusu.

⁶Aŋa no lɔ́mɔ́ o olímínyóolú Yésu Kilítu goŋaá a lɛ́ Daadáa bɛnyɔ́, ɛ́dánáa nɔnɔ naá busío naá pɛ́ moánɛ, no gɛ́ga báladáalú nɛhɛ́.

⁷Sumé nɔnɔ ɛŋaŋá naá mɔ́ɔ, bó gunde, mbɔ́gɔ́ yɛnyɔ́ ya gɛɔyɔ ɛ bɛ́ɛmba naá mɔ́ɔ. Gónɛ́na nɔnɔ naá gioliminyo gɔgɔ́ aŋa bá mbaá nyó húúnényée, no gunde no bɛ́ɛmba dácɛ dɔgɛdɔgɛ na ndoŋá ya bibéhiigí.

⁸Bɛ́ɛmba nɔnɔ pɔnyɛ́ɛ, mɔtɔ a dɛ nyó gɔ́lɔ́ naá ɛdámbɔ há bɛnɔ́gɔ́ bá dogálɔ bá mbele; mbele ya kanɛ kɔ́ɔ yɛ́ɛyɛ ɛ lɔ́mɔ́ gohúunenye gá batɔ, magaaga máama má indenyemú cí, caá akɛ́ naá Kilítusu.

⁹Mammana, naá Kilítusu Mɔtɔ gɔ́ɔ Asaŋa a mbaá lɛ́gá go lukumene uŋkimée uŋkimée bɛhɛ́ hɔ́ɔ.

¹⁰Gó gunde naá mɔ́ɔ gɔ́ɔ no mbaá dáŋábá buimée fundu fundu, mɔ́ɔ mɔ́ɔnyɔ a lɔ́mɔ́ ufuŋe yá magaaga miimée na bɛmánɛgɛna biimée.

¹¹Naá gobálada gɔ́ɔgɔ nɛhɛ́, no mba ancábá, caá akɛ́ goancaba mbɔ́dɔ ya batɔ, kanɛ́ goancaba gɔ́ɔgɔ gó ɛ́damɔ́ go úlene naá Kilítusu, gó gunde gó có dúgune naá boɔtɔ bɛ́cɔ́ bá bɛlɔgɔ.

¹²Aŋa no mbaá bɛáa giyuminye, no mba bɛ́ɛmbá miéelú olɔŋɔ nɛhɛ́; gɔnɔ́ nɛhɛ́, no mba fúfúgé, goakɛ́ no mbo olímínyóo bogaaga bá Asaŋa mɔ́ɔnyɔ a mbaá mo fúfúné naá begúe[6].

¹³Kɔ́ɔ bɛɛnyɔ́ɔ baaba no mbaá lɛ cóá bigúe go busío bá bɛlɔgɔ bɛ́nyɔ́ na kanɛ goancaba yɛnyɔ́ naá nnyɔ́dɔ, Asaŋa a mba nyó fáá gɛɔyɔ na Kilítusu; a báá có hééhínyée bɛlɔgɔ bɛ́cɔ́ biimée.

¹⁴A mba fúgúné kálata yɛ́ɛyɛ ɛ mbaá lɛ ɛ có sɔ́mɔnɔ, yɛ́ɛyɛ bɛlɔsɛnɔ bɛ́ɛbɛ kɔ́ɔ bɛ́ mbaá lɛ bɛ́ có gundenine; a mba yɛ ségínyée, a báá mó gilénée naá kolósi,

¹⁵a mba siisíe go cí magaaga na bɛmánɛgɛna bá cí; a báá mí íŋéné go dohɔnɔ dá batɔ, a báá má tútúlényée naá gɛlɔŋɔlɔ́ŋɔ́ gá nigúmi ná kolósi ya Moɔnɔ́ bɛhɛ́ Yésusu.

¹⁶Kanɛ́ godɔ́ɔdɔ mɔtɔ a dɛ háánánáa go nyó gálɛda go boóma bɔ́ɔbɔ bó núunemú manyáanya, ɛ́na lí nɛnyóa, go boóma bɔ́ɔbɔ bó núunemú gibíné, gɛpáa gá ofɛ́, ɛ́na lí sábadɛ[7].

¹⁷Buimée bɔ́ɔbɔ bó lɛ́ gifií gá moóma má besé mɔ́ɔmɔ mó mbaá lɛ ba go úle, kanɛ́ mammana ɛ lɔ́mɔ́ Kilítusu.

¹⁸Batɔ báaba bá lɔ́mɔ́ mmoɛná mmoɛná na ndoŋá ya go bésiisenye, bá gunde bá búlugenye bɛɛ́ŋgɛlɛsɛ, no do bó dɛ́ɛ́ná goŋaá bá nyó bueŋenye. Batɔ bá ndiemi bá ágana ɛdɛ́má yabɔ́ naá bɛanana bá budúgú, gó gunde, nciŋí sábɔ́ sá boɔtɔ sɛ́ bó fáanana giegu gá bogaya.

¹⁹Bá dɛ gɛ́gáa báladáalú na Kilítusu mɔ́ɔnyɔ a lɔ́mɔ́ odóɛ; asáa gɔgɔ́, odóɛ yɔ́ yó dúgemú nnyɔ́dɔ, duleŋú na ŋgoŋa mó yɛ nembenye, yɛ ɛ́da ɛ goma aŋa Asaŋa a lɛ́galɛgamɔ́.

²⁰No báá gúé na Kilítusu, no báá bɛ́ɛ́mbá sódíolú go magaaga má cí, kɔ́ɔ ɛkádɛ́ no gɔnɔmɔ́ go ɔyɔ aŋa no ɔ́bɛnɔnɔ na cí o? No bádɛ́ɛnanɛna batɔ bá nyó ágɛnana bɛlɔsɛnɔ bɛ́ɛbɛ bɛ́ lɔ́mɔ́:

²¹«O do gɔ́lɔ́ gɛnáa», «O do ɔ́bɛ́dɛ́nɔ́ gɛnáa», «O do báláfɛ́ná gɛnáa?»

²²Moóma mɔ́ɔmɔ muimée mo ságɛnana, mɔtɔ a dɛ lɔbɔ́nɔ́ɔ na mɔ́ɔ, ábɔ caá buimée bɔ́ɔbɔ bó lɔ́mɔ́ bɛlɔsɛnɔ na gohúunenye gá batɔ!

²³Bó lɛ́ mammana, bɛlɔsɛnɔ bɛ́ɛbɛ bɛ́ fóanana nciŋí, goakɛ́ bɛ́ oya ndoŋá ya batɔ, gobésiisenye gá nnyɔ́dɔ, kanɛ́ bɛ́ dɛ dúgúnée akɛ́ go boóma bá búmmue, aáŋa caá goana goóbonyo gá nnyɔ́dɔ bese.