Read Nugunu Kolóose 4 Bible Online

Kolóose 4 - Nugunu bible

Kolóose 4

¹Bagɔ́nɔ́ɔ, ɔ ɔyɔ́ɔ nɔnɔ na bɛɔlɛ́ bɛ́nyɔ́ naá botɛ́nɛ́ɛ na naá mammana; no do bófoolío no amɔ́ bɛɛnyɔ́ɔ tɔ́nɔ no bɛanana Ogɔ́nɔ́ɔ bɛnyɔ́ mɔ́ɔnyɔ a lɔ́mɔ́ naá mmoɛná.

²Gɛ́ndɛ́mɛ́dá nɔnɔ na mbósógólí, no bɛ́ɛmba mobɛ́dɛ́ pɔnyɛ́ɛ na mbósógólí yɛ́ɛyɛ no dúmeninyemú Asaŋa na odɛ́má yá bibéhiigí.

³Naá gɛcamɛna táŋɛ́ gímmue, no bósógolonyo tɔ́nɔ go busío bɛ́cɔ́ go goŋaá Asaŋa a có buunene gɛasɛ́ naá gooya gɛ́cɔ́ gá Nogálɔ nɛ́hɛ́, gó gunde túmenye nnindíi ya Kilítusu; go busío bá yɛ́ gɔ́ɔ ndɔ́mɔ́ naá ncíbo ya gɛaŋɔ́.

⁴Bósógólónyóomú nɔnɔ kanɛ́ goŋaá mbáá yɛ séléméndényée aŋa gɔ́ɔgɔ gó háananamɔ́ goŋaá mbáá ŋaáa.

⁵Bɔ́gɔ́lɔ́nɔ́ɔmɔ́ nɔnɔ na nciŋí na batɔ báaba bá lɔ́mɔ́ bá dɛ bɛ́ɛ́mbá bakɛlɛ́tɛnɛ; no labana go pɛ́ iŋkimée [no ɔyɔ nabɔ́ bese].

⁶Ŋgáa dogálɔ dɛ́nyɔ́ dɔ́ɔdɔ nabɔ́ dó bɛ́ɛmba sɛmɛsɛmɛ gɛcamɛna giimée, gɔnɔ́ na ndénégé dácɛ. No íyime go gundenye onyɔ moánɛ aŋa gɔ́ɔgɔ gó háananamɔ́.

⁷Naá boayá bá odɛ́nɛ́ yámɛ, no gaá bɛáa cɔ́mɔ iŋkimée gá Tisíke[14], ondimóní bamɛ ba odɛ́má, uŋguyí cɔ́mɔ ba pídefide, dɛ yɔgɛnɔnɔ Daadáa olɔŋɔ.

⁸Nyó mo dómɛnamɔ́ go busío bá goŋaá a nyó oyana aŋa dɛ lɔ́mɔ́, a gunde a fáa ɛdɛ́má yɛnyɔ́ magɛ́nda.

⁹Tisíke a lɛ́ olɔŋɔ na Onésime[15] mɔ́ɔnyɔ ondimóní a lɔ́mɔ́ mbíényée yɛnyɔ́, a lɛ́ ondimóní ba odɛ́má gɔnɔ́ na pídefide, bá gaá nyó oyánɛ́náa boóma buimée bɔ́ɔbɔ bó bádómbanamɔ́ naá bɛɛcɔ́ɔ gɔ́ɔgɔ.

¹⁰Alɛsɛtálakɛ mɔ́ɔnyɔ a lɔ́mɔ́ olɔŋɔ namɛ naá ncíbo ya gɛaŋɔ́, a á nyó bédíígényée, tɔ́nɔ Mélékusu, sɔ́gɔ́ɔ umbíeni ba Banábasɛ, a á nyó bédíígényée[16]. Mélékusu bendiemi, no báa go ɔ́bɔ bó oya moóma go busío bɛ́hɛ́; a amɔ́ u úle naá bɛɛnyɔ́ɔ, mo gólíomú nɔnɔ bese.

¹¹Yésusu mɔ́ɔnyɔ bá gɔnɔmɔ́ mo dɔ́ŋɔnɔ bá amɔ́ Yúsutusu, a á nyó bédíígényée tɔ́nɔ; Beyúdene bá bádadɔ́ báaba bá lɛ́ ɛ́yáalú bakɛlɛ́tɛnɛ, gɔ́ɔ bá yɔgɔnɔmɔ́ olɔŋɔ namɛ gɔnɔ́ na batɔ bóntió go Bufuŋe bá Asaŋa. Bá lɛ́ bɛ́ɛ́mbáalú gɛantáanta gá gigúluminye naá boayá bámɛ.

¹²Ɛpafalásɛ mɔ́ɔnyɔ a lɔ́mɔ́ tɔ́nɔ mbíényée ya gɛdɔŋɔ gɛ́nyɔ́ a á nyó bédíígényée; uyogóní ba Yésu Kilítu mɔ́ɔnyɔ a dɛ dɔmbɔ́nɔ́ɔ go bósógolonyo na bogaaga go busío bɛ́nyɔ́ goŋaá no gɛ́ga gɛ́ndɛ́ŋɛ́ gɛndɛŋɛ, gónɛ́náalú naá gioliminyo, no hɛmana go ŋanana buimée naá ndɛ́ga ya Asaŋa.

¹³Ndɛ́ ba go oyɛda go busío bɛ́hɛ́ caá: A gɔ́lɔnɔ gɛdɔmbɔ makɔ́nɔ́ go busío bɛ́nyɔ́, go báaba naá Leyodíse, gɔnɔ́ go busío bá báaba naá Hiyepólisi.

¹⁴Dɔ́bɛ́dɔ Lókasɛ, ugúle bɛcɔ́ ba odɛ́má, nɛhɛ́ na Dɛ́masɛ, bá á nyó bédíígényée[17].

¹⁵Bédíígényée nɔnɔ bolimóní báaba naá Leyodíse, no bédíigenye tɔ́nɔ Nɛ́ŋɛfa na giimbó gá boolímínyí gɛ́ɛgɛ gɛ́ bá bándamɔ́ naá mɔ́ɔ nnyaŋá[18].

¹⁶Aŋa no ná banamɔ́ kálata yamɛ, ágá nɔnɔ bogaaga goŋaá bá yɛ bana tɔ́nɔ naá giimbó gá boolímínyí gɛ́ɛgɛ naá Leyodíse. Bɛɛnyɔ́ɔ tɔ́nɔ no bana yɛ́ɛyɛ ɛ nɛ́ ɛ́damɔ́ go úle naá Leyodíse.

¹⁷Naá gosúgudinye, o oyána nɔnɔ Elesípe[19] no amɔ́: «Beŋé buelí bɔ́ɔbɔ o mbaá bɛáa naá Daadáa, o bágáyɛga go bó yɔgɔnɔ bese.»

¹⁸Yɔmɔ́ɔ Póolo, mbédíígí yamɛ ya ombɔ́gɔ yɛ́ yɛ́ɛyɛ; bééníŋényéemú nɔnɔ gɛdɔmbɔ gámɛ. Ŋgáa niibo ná Asaŋa nɛ́ bɛ́ɛmba nɛnyɔ́.