Read Nugunu 1 Tɛsalonɛ́ka 1 Bible Online

1 Tɛsalonɛ́ka 1 - Nugunu bible

1 Tɛsalonɛ́ka 1

¹Bɛɛcɔ́ɔ, Póolo, Sɛ́lasɛ na Timotée, dɛ ɔ́ŋɛnɔmɔ́ giimbó gá boolímínyí gɛ́ɛgɛ naá Tesoloníke. Bɛɛnyɔ́ɔ báaba no ɔ́bɛnɔnɔmɔ́ na Asaŋa Isée gɔnɔ́ na Daadáa Yésu Kilítu, Ŋgáa Asaŋa a nyó boogo, a nyó fáa buumbénú.

²Dɛ béhiigi Asaŋa kanɛ tɔmbɛ́nɔ́ɔ go busío bɛ́nyɔ́ biimée, dɛ nyó fínenye naá mbósógólí sɛ́cɔ́; bɛcamɛna biimée,

³dɛ dɛ bófoolónyóo goŋaá no dúfenye gioliminyo gɛ́nyɔ́ naá meŋiigíe, no gɔ́lɔnɔ gɛdɔmbɔ go basɔ́gɔ́ɔ go gɛnɔ́ɔ́nɛ́nɔ́ gɛ́nyɔ́, na mbémineminie ya ɛbágóɛga yɛnyɔ́ mɔ́ɔmɔ mó có úleninemú naá Daadáa bɛcɔ́ Yésu Kilítu.

⁴Bolimóní, dɛ íyimene bese goŋaá Asaŋa a mba nyó iyídé, a nyó maamana.

⁵Mammana, Gɛnɔ́gɔ́ gá Cɔ́mɔ gɛ́ɛgɛ dɛ dúmenyemú, dɛ lɛ́ kanɛ go nyó úlene na gɛ́ goana na dogálɔ dá nyuudé, dɛ mbu úlé tɔ́nɔ na bogaaga, gɔnɔ́ na toodo odɛ́má iŋkimée yɛ́ɛyɛ Gimmúmpúu gá Giliíli a fáananamɔ́. No íyimene bese bese nɔ́ɔnɔ, goakɛ́ no lɛ́ ɛ́náalú go bɔ́gɔ́lɔnɔ gɛ́cɔ́ naá boayá bɛ́nyɔ́ go besé yɛnyɔ́.

⁶Bɛɛnyɔ́ɔ, no lɛ́ bienéelú gɛgɔ́ndɔ́ gɛ́cɔ́ na gá Daadáa, no báá gɛ́ndɛ́gɛ́ná Nogálɔ na bɛyaŋa bɛ́ɛbɛ bɛ́ ɛ́damɔ́ go úlene naá Gimmúmpúu gá Giliíli, akɛ́ naá kadɛ́gadɛ́ɛ ya bɛdɔmbɔ[1].

⁷Go busío moánɛ, no lɛ́ gieninye go boolímínyí biimée báaba naá Masɛdóanɛ na naá Ekeyíi.

⁸Gɛnɔ́gɔ́ gá Cɔ́mɔ gɛ́ɛgɛ gɛ́ lɔ́mɔ́ ncó go úléelú naá bɛɛnyɔ́ɔ, gɛ́ lɛ́ dondómɛ́dáalú caá goana naá Masɛdóanɛ na naá Ekeyíi, kanɛ́ Cɔ́mɔ ya go ágana odɛ́má yɛ́nyɔ́ naá Asaŋa ɛ lɛ́ séléméndíelú hoóma hiimée mbɔ́dɔ yɛ́ɛyɛ ɛ lɔ́mɔ́ goŋaá dɛ dɛ bósó bá go gɔnɔ gálagala.

⁹Mɔtɔ uŋkimée o oya gobɛ́ɛmba gɛ́cɔ́ gɔ́ɔgɔ naá bɛɛnyɔ́ɔ na go có gɛ́ndɛgɛna gɛ́nyɔ́ bese, gɔnɔ́ na mbɔ́dɔ yɛ́ɛyɛ no lɔ́mɔ́ fíídíelú moɔcɔ nnyimé, no báá gundé naá Asaŋa go go mo yɔgɔnɛnɔ, mɔ́ɔ mɔ́ɔnyɔ a lɔ́mɔ́ ogɔ́sɔ gɔnɔ́ mammana.

¹⁰No gɔnɔ go ɛ́da go gɛ́gana tɔ́nɔ goncogunde naá mmoɛná gá Moɔnɔ́ bɛ́hɛ́ Yésusu. Asaŋa a mba mo fúfúné naá begúe, mɔ́ɔ a có sódonyomú go mpímí ya Asaŋa yɛ́ɛyɛ yɛ úlenemú.