Read Nugunu 1 Tɛsalonɛ́ka 3 Bible Online

1 Tɛsalonɛ́ka 3 - Nugunu bible

1 Tɛsalonɛ́ka 3

¹Aŋa dɛ mbaá lɔmɔ́ dɛ dɛ gɔnɔ́ hóda go gɛ́gana gɔ́ɔgɔ, gɛ́cɔ́ go bágálɛdɛna goŋaá dɛ síene bákáa naá Atɛ́nɛ[5],

²dɛ nyó dómɛna ondimóní bɛcɔ́ Timotée. A lɛ́ mɔ́ɔnyɔ dɛ yɔgɔnɔmɔ́ buelí bá Asaŋa nɛhɛ́ naá go dúmenye gá Gɛnɔ́gɔ́ gá Cɔ́mɔ gá Kilítusu. Dɛ lɔ́mɔ́ mo dómáalú goŋaá a nco nyó gúninie a gɔnɔ nyó gúluminye naá gioliminyo,

³go goŋaá mɔtɔ naá olɔŋɔ yɛ́nyɔ́ a dɛ obá bɛnamá go busío bá duséésényée dɔ́ɔdɔ dó có bolanɛnamɔ́. Bɛɛnyɔ́ɔ moatɛ́ no íyimene bese goŋaá dɛ sɛmɛganana go dómba naá dɔ́.

⁴Gɔ́ɔgɔ dɛ mbaá lɛ naá bɛɛnyɔ́ɔ, dɛ mba lɛ́ dɛ nyó dóoginonyo goŋaá no ŋga dómbánáa naá duséésényée, dɔ́ dɔ́dɔ́ɔ no ná lɔ́mɔ́ kɔ́ɔ, aŋa no íyimenemú nɔ́ɔ bese.

⁵Go busío moánɛ gɔ́ɔ, naá kanɛ gohóda gogɛ́gana gɔ́ɔgɔ, gɔ́ɔ ndɔ́mɔ́ dómáalú mɔtɔ goŋaá u úle a gɔ́lɔ cɔ́mɔ sá gioliminyo gɛ́nyɔ́. Mmba lɛ́ na bofoá bá goŋaá Agogona a nyó gogona, gɛdɔmbɔ gɛ́cɔ́ gɛ́ dɛ ɛ́ya ba go sola.

⁶Godɔ́ɔdɔ, Timotée mɔ́nyɔ́ɔ a gá lɔ́mɔ́ na go bola, go go nco go úle gɔ́ɔgɔ naá bɛɛnyɔ́ɔ[6]. A báá có oyánɛ́náa bɛnɔ́gɔ́ bá cɔ́mɔ go gioliminyo gɛ́nyɔ́ na gɛnɔ́ɔ́nɛ́nɔ́ gɛ́nyɔ́ a amɔ́ no gá lɛ́ no do có bófoolío, no bɛanana ncaná ya go gɔnɔ có ɛ́na, aŋa bɛɛcɔ́ɔ tɔ́nɔ dɛ bɛananamɔ́ ncaná ya go gɔnɔ nyó ɛ́na.

⁷Gɔ́ɔ bolimóní, naá kadɛ́gadɛ́ɛ ya mecíkílí na bɛdɔmbɔ bɛ́cɔ́ biimée, no á có gúlúmínyée go gioliminyo gɛ́nyɔ́.

⁸Godɔ́ɔdɔ, dɛ á gɔnɔ́ bɛa masánca go busío bá goŋaá no lɛ́ gɛ́ndɛ́ŋɛ́gɛndɛŋɛ naá Daadáa.

⁹Mbɔ́dɔ ya bibéhiigí ɛhanɛ́ dɛ lɔ́mɔ́ ba go fáa Asaŋa go busío bɛ́nyɔ́, go bɛyaŋa biimée bɛ́ɛbɛ dɛ bɛananamɔ́ naá busío bá Asaŋa bɛcɔ́ go busío bɛ́nyɔ́?

¹⁰Dɛ bósógolonyo kanɛ tɔmbɛ́nɔ́ɔ aŋa budúgú aŋa sisíi goŋaá dɛ bɛa pɛ́ ya go gɔnɔ nyó ɛ́na, dɛ hóogio bɔ́ɔbɔ bó gá lɔ́mɔ́ bó do bɛ́ɛ́mbá naá gioliminyo gɛ́nyɔ́.

¹¹Ŋgáa Asaŋa, Isée bɛcɔ́ moatɛ́, na Daadáa bɛcɔ́ Yésusu bá có buunene pɛ́ ya goŋaá dɛ úle naá bɛɛnyɔ́ɔ.

¹²Ŋgáa Daadáa a dómba go gumie gɛnɔ́ɔ́nɛ́nɔ́ gɛ́ɛgɛ no bɛananamɔ́ bɛɛnyɔ́ɔ na bɛɛnyɔ́ɔ na batɔ biimée, gɛ́ bɛ́ɛmba naá gieninye gá gɛnɔ́ɔ́nɛ́nɔ́ gɛ́cɔ́ go busío bɛ́nyɔ́.

¹³Ŋgáa a gúninie kanɛ́ ɛdɛ́má yɛnyɔ́ naá bummúmpúu bá kanɛ cigí naá busío bá Asaŋa Isée bɛcɔ́, aŋa Daadáa bɛcɔ́ Yésu Kilítu a ŋgaá ncó gunde, na biimée báaba bá lɔ́mɔ́ bɛ́hɛ́. [Aamɛnɛ.]