Read Nugunu 1 Tɛsalonɛ́ka 4 Bible Online

1 Tɛsalonɛ́ka 4 - Nugunu bible

1 Tɛsalonɛ́ka 4

¹Bolimóní, naá go súgudinye, dɛ mba nyó húúnényée nɛɛ́nɛ no háananamɔ́ go ɔyɔ goŋaá no fɛɛna Asaŋa, nɔ́ɔnɔ gɔ́ɔ no ná lɔ́mɔ́ go ɔyɔ. Kanɛ́ dɛ nyó oyanɛna dɛ gɔnɔ nyó téndenye go ufíno ya Daadáa Yésusu, gɔnɔ́ no ŋanana nɔ́ɔ gó dómba.

²Ɛɛ́ɛŋ, no íyimene témbuginye sɛ́ɛsɛ dɛ mbaá nyó fáánánáa go ufíno yá Daadáa Yésusu.

³Asaŋa a lɛ́galɛga a amɔ́ gásɛ́ no ɔ́ ɔyɔ́ɔ sɔgɔ́nɔ, no bégumbene go gɛɔyɔ gá hanyɔ́.

⁴Ŋgáa onyɔ moánɛ naá bɛɛnyɔ́ɔ i íyime gobeŋe nɛbáná nɛ́hɛ́ sɔgɔ́nɔ na mbúlugie iŋkimée.

⁵A dɛ bádɛ́ɛ́ná hanyɔ́ ɛ dɛ mo gɔ́gɛ́dɔ́, aŋa bindiíyímé Asaŋa bɛ́ ŋananamɔ́.

⁶Ummue a dɛ biníe sɔ́gɔ́ɔ, a dɛ mo ŋaáa bobɛ́ naá bosɔ́mɔ moánɛ, goakɛ́, mbɔ́dɔ sá meŋiigíe aŋa sɛ́ɛsɔ nɔ́ɔnɔ, Daadáa a dɛ dɛ́ɛ́nánáa kanɛ go fáa noséésényée kɔ́ɔ. Dɛ báa go nyó oyanɛna nɔ́ɔnɔ cóá, dɛ báá nyó lɔsɛ́nɔ́nɔ́ɔ.

⁷Ɛɛ́ɛŋ, Asaŋa a lɛ́ kanɛ go có dɔ́ŋɛnɔ goŋaá dɛ ɔyɔ naá bicúfú gadɛ́ɛ, kanɛ́ a lɔ́mɔ́ có dɔ́ŋɛ́nɔ́ɔlú goŋaá gɛɔyɔ gɛ́cɔ́ gɛ́ bɛ́ɛmba sɔgɔ́nɔ naá oŋgíso yɛ́hɛ́.

⁸Kanɛ́ mɔ́ɔnyɔ i inyemú témbuginye sɛ́ɛsɛ, caá mɔtɔ mɔ́ɔ i inyemú, i inyenemú Asaŋa, mɔ́ɔ mɔ́ɔnyɔ a nyó fáananamɔ́ Gimmúmpúu gá Giliíli bɛhɛ́.

⁹Kanɛ́ naá bɔ́ɔbɔ bó núunemú gɛnɔ́ɔ́nɛ́nɔ́ naá kadɛ́gadɛ́ɛ ya bɛɛnyɔ́ɔ boolímínyí, bó do úhénée goŋaá bá gɔnɔ nyó ɔ́ŋɛnɔ go bɔ́, goakɛ́ bɛɛnyɔ́ɔ moatɛ́ moatɛ no lɛ́ hóónáhóóná naá Asaŋa aŋa no háananamɔ́ go maamanɛna.

¹⁰Moatɛ́, nɔ́ɔnɔ gɔ́ɔ no bɔ́gɔ́lɔnɔmɔ́ naá boayá bá bolimóní báaba naá Masɛdóanɛ uŋkimée[7]. Kanɛ́ bolimóní, dɛ nyó gíndenye goŋaá no ɛ́dana naá busío na go ŋanana nɔ́ɔnɔ.

¹¹Ŋaáa nɔnɔ buimée go go ɔyɔ naá buumbénú, no gɔ́lɔ gɛcamɛna goana go masɔ́mɔ mɛ́nyɔ́ má moatɛ́, no yɔgɔnɔ bɛɛnyɔ́ɔ moatɛ́, aŋa gɔ́ɔgɔ dɛ mbaá nyó lɔsɛ́nɔ́nɔ́ɔ.

¹²Náana, batɔ bá hanyɔ́ bá ná hálamana gobɔ́gɔ́lɔnɔ gɛ́nyɔ́, no do bɛ́ɛ́mbá gɛnóɛ́ go mɔtɔ.

¹³Bolimóní, cɛ lɛ́gálɛ́gáa go nyó dɛ́ɛna kanɛ go nyó lincie mammana go báaba bá gúenenemú, go goŋaá no do lɔbɛ́nɔ́ go mecíkílí aŋa batɔ bóncodío báaba bá lɔ́mɔ́ bá dɛ bɛanánáa mbémineminie ya gɛɔyɔ gá kanɛ mmanɛ́náa.

¹⁴Aŋa dɛ olimonyomú dɛ amɔ́ Yésusu a mba gúé, a báá fúfúgé, nɔ́ɔnɔ gɔ́ɔ tɔ́nɔ gó ŋgaá bɛ́ɛ́mbá caŋa táŋɛ́ mmue go báaba bá gúenenemú báladáalú nɛhɛ́; go busío bɛ́hɛ́ moánɛ, Asaŋa a ŋga bó gɔ́lɔ́ bɔ́ ɔyɔ nɛhɛ́.

¹⁵Dɛ nyó oyanɛna nogálɔ ná Daadáa nɔ́ɔnɔ a mboó oyɛ́dá a amɔ́, naá goncogunde gɛ́hɛ́, bɛɛcɔ́ɔ báaba dɛ ŋgaá ŋá dɛ gá lɛ́ bɔgɔ́sɔ, dɛ dɛ ŋgá gɔ́gɛdɔ báaba bá mbaá gúénénée.

¹⁶Aŋa ogɔ́nɔ́ɔ ba bɛɛ́ŋgɛlɛsɛ ummue a ŋgaá cáyɛ́dá, bá báá ŋaáa gilincie, gɔnɔ́ cɛ́bá ya Asaŋa ɛ báá dádɛ́dá, Daadáa moatɛ́ a lɛ go siise go cí. Hɔ́ɔlɔ́ gɔ́ɔ, báaba bá mbaá gúénénée báladáalú na Kilítusu bá ŋgaá manɛ́ fúfugene.

¹⁷Naá nnyimé gɔ́ɔ, bɛɛcɔ́ɔ báaba dɛ ŋgaá ŋá dɛ gá lɛ́ bɔgɔ́sɔ, dɛ ŋgaá bɛ́ɛ́mbá gɔ́lɔ́ɔlú olɔŋɔ nábɔ́ naá nogálámbá go go ɛ́da giluméní na Daadáa, gɔ́ɔ dɛ ŋgaá bɛ́ɛ́mbá nɛhɛ́ go bɛcamɛna biimée[8].

¹⁸Kanɛ́ gúlúménínyée nɔnɔ na dogálɔ dɔ́ɔdɔ.