Read Nugunu 1 Tɛsalonɛ́ka 5 Bible Online

1 Tɛsalonɛ́ka 5 - Nugunu bible

1 Tɛsalonɛ́ka 5

¹Bolimóní, bó do gɔnɔ́ go úhene goŋaá dɛ nyó ɔ́ŋɛnɔ go bɔ́ɔbɔ bó núunemú gɛcamɛna ɛ́na gigúlí gá moóma mɔ́ɔmɔ goɛ́nanɛna.

²Mammana, no íyimene bese bese bɛɛnyɔ́ɔ moatɛ́ goŋaá buisí bá Daadáa bó ŋga bolá aŋa uŋgíbi a bolanamɔ́ na budúgú[9].

³Aŋa batɔ bá ŋgoó oyɛ́dá bá amɔ́: «Kasɛ́á buumbénú bɔ́bɔ́ɔ! Kasɛ́á bopɔ́ɔ́ bɔ́bɔ́ɔ[10]!» hɔ́ɔ na hɔ́ɔ gɔ́ɔ gɛɛmba gɛ́ ŋgoó obá. Gɛ́ ŋga bó obɛ́ná aŋa gonómana gá okɔ́dɔ ba go bíene, bá dɛ ŋgá pamba.

⁴Kanɛ́ bɛɛnyɔ́ɔ, bolimóní, no do bósó naá mbíno go goŋaá buisí moánɛ bó nyó suluŋenye aŋa uŋgíbi.

⁵Ɛɛ́ɛŋ, bɛɛnyɔ́ɔ biimée púmú, nó lɛ́ baaná bá gise, baaná bá siisíi. Dɛ dɛ báá bá budúgú ɛ́na lí bá mbíno.

⁶Kɔ́ɔ dɛ dɛ ɛ́dánáa dɔnɔ́ɔ aŋa batɔ bóncodío, kanɛ́ ŋgáa dɛ gɛ́ga pɔnyɛ́ɛ, dɛ bánona naá pɛ́ ya nɛnyóa.

⁷Batɔ báaba bɛ́ ɛ́danamɔ́ dɔnɔ́ɔ, bá dó ɛ́danamɔ́ na budúgú. Báaba bá nyóananamɔ́ mɔgɛ́bɔ na ginití, bá má nyóananamɔ́ na budúgú tɔ́nɔ.

⁸Kanɛ́ bɛɛcɔ́ɔ, dɛ ɔ́bɔnɛnɔmɔ́ na siisíi; dɛ dɛ háánánáa go nyóanana mɔgɛ́bɔ na ginití. Ŋgáa dɛ gɔ́lɔ gioliminyo na gɛnɔ́ɔ́nɛ́nɔ́ aŋa bɛlɛŋɔ bá bidé go go có beŋebeŋe, dɛ báága aŋa gibúlú mbémineminie ya goŋaá Asaŋa a ná có sódio[11].

⁹Mammana Asaŋa a dɛ mbáá có dɔ́ŋɔnɔ go go có fáa noséésényée, a mbaá có dɔ́ŋɔ́nɔ́ɔ go goŋaá dɛ dáŋaba gisódio na Daadáa bɛcɔ́ Yésu Kilítu.

¹⁰A mba gúé go busío bɛ́cɔ́ go goŋaá akɛ́ begúe, akɛ́ bɔgɔ́sɔ, dɛ ɔyɔ émmué nɛhɛ́.

¹¹Go busío moánɛ, gúlúménínyée nɔnɔ, no gíndeninye go go ɛ́da naá busío naá gioliminyo, aŋa no ná lɔ́mɔ́ go ŋanana náana.

¹²Bolimóní, dɛ á nyó úhúné goŋaá no búlugenye báaba bá yɔgɔnɔmɔ́ naá kadɛ́gadɛ́ɛ yɛnyɔ́, no bó gɔ́lɔnɔ aŋa bagɔ́nɔ́ɔ. Daadáa a mba bó íyídé go go nyó indenye, bá nyó fáanana ɛsɔ́mɔ.

¹³Bó dúfíemú nɔnɔ mbúlugie makɔ́nɔ́, no bó maamana go buelí bɔ́ɔbɔ bá yɔgɔnɔmɔ́. Bɛ́ɛ́mba nɔnɔ naá buumbénú bɛɛnyɔ́ɔ na bɛɛnyɔ́ɔ.

¹⁴Bolimóní, dɛ á gɔnɔ́ nyó úhune goŋaá no sɔ́mɔ báaba bá ɔyɔmɔ́ gɛbɛ́. No gíndenye báaba bá lɔ́mɔ́ kanɛ bogaaga, no óhigonyo banɔ́nɔ́nɔnɔ; no gumbene odɛ́má go busío bábɔ́ biimée.

¹⁵Bébeŋéemú nɔnɔ, no do gundíe gɛbɛ́ go gɛbɛ́. Kanɛ́ fúmbée nɔnɔ go ŋanana besé gɛcamɛna giimée bɛɛnyɔ́ɔ na bɛɛnyɔ́ɔ gɔnɔ́ go busío bá mɔtɔ uŋkimée.

¹⁶Bɛ́ɛ́mba nɔnɔ naá bɛyaŋa gɛcamɛna giimée,

¹⁷bósógólónyóomú nɔnɔ kanɛ tɔmbɛ́nɔ́ɔ,

¹⁸béhiigíimú nɔnɔ Asaŋa bɛcamɛna biimée. Ɛɛ́ɛŋ, bó lɔ́mɔ́ ndɛ́ga ya Asaŋa go busío bɛ́nyɔ́ báaba no lɔ́mɔ́ báladáalú na Kilítu Yésu.

¹⁹No do legé Gimmúmpúu gá Giliíli go yɔgɔnɔ naá bɛɛnyɔ́ɔ.

²⁰No do fánɛ́náfánɛ́náa dogálɔ dá mbúsí sá Asaŋa.

²¹Hɛnyáhɛ́nyáa nɔnɔ boóma buimée bese, no gumbene bɔ́ɔbɔ bó lɔ́mɔ́ bese.

²²No báyáŋayaŋa mbɔ́dɔ ya gɛbɛ́ iŋkimée.

²³Ŋgáa Asaŋa mɔ́ɔnyɔ a lɔ́mɔ́ mbɔ́gɔ́ ya buumbénú a ŋa goŋaá no ɔ́bɔnɛnɔ go busío buimée gɛ́hɛ́. Ŋgáa a beŋe boɔtɔ bɛ́nyɔ́ buimée, giliíli gɛ́nyɔ́ na nnyɔ́dɔ yɛnyɔ́ kɛ́, mó bɛ́ɛmba kanɛ cigíi aŋa Daadáa bɛcɔ́ Yésu Kilítu a ŋgaá ncó gunde.

²⁴Mɔ́ɔnyɔ a nyó dɔ́ŋɔnɔmɔ́ a dɛ súgénée tánɔ yɛhɛ́; mɔ́ɔ a ŋgaá ŋanánáa boóma bɔ́ɔbɔ buimée.

²⁵Bolimóní, bósógólónyóomú nɔnɔ go busío bɛ́cɔ́ tɔ́nɔ.

²⁶Bédíígényée nɔnɔ bolimóní biimée no bó gɔ́lɔ kude.

²⁷Nnyó yɛ́bɛnayɛbɛna go ufíno yá Daadáa goŋaá no banɛna bolimóní biimée kálata yɛ́ɛyɛ.

²⁸Ŋgáa Daadáa bɛcɔ́ Yésu Kilítu a nyó fona.