Read Nugunu 2 Tɛsalonɛ́ka 1 Bible Online

2 Tɛsalonɛ́ka 1 - Nugunu bible

2 Tɛsalonɛ́ka 1

¹Bɛɛcɔ́ɔ, Póolo, Sɛ́lasɛ na Timotée, dɛ ɔ́ŋɛnɔmɔ́ giimbó gá boolímínyí gɛ́ɛgɛ naá Tesoloníke. Bɛɛnyɔ́ɔ báaba no ɔ́bɛnɔnɔmɔ́ na Asaŋa Isée bɛcɔ́ gɔnɔ́ na Daadáa Yésu Kilítu.

²Ŋgáa Asaŋa Isée na Daadáa Yésu Kilítu bá nyó boogo, bá nyó fáa buumbénú.

³Bolimóní, dɛ háanana go béhiigi Asaŋa gɛcamɛna giimée go busío bɛ́nyɔ́, gó gunde gó lɛ́ tɛ́nɛ́ɛ goakɛ́ gioliminyo gɛ́nyɔ́ gɛ́ ɛ́dana naá busío na bogaaga; gɛnɔ́ɔ́nɛ́nɔ́ gɛ́ɛgɛ no lɔ́mɔ́ na gɛ́ bɛɛnyɔ́ɔ na bɛɛnyɔ́ɔ gɛ́ goma makɔ́nɔ́ naá bɛɛnyɔ́ɔ biimée.

⁴Boóma moánɛ bɔ́ dɛ béségisegimú go busío bɛ́nyɔ́ naá biimbó bá boolímínyí bɛ́ɛbɛ bíntió, go busío bá ɛbágóɛga hɛ́nyɔ́ na gioliminyo gɛ́ɛgɛ no lɔ́mɔ́ na gɛ́, naá kadɛ́gadɛ́ɛ ya bɛdɔmbɔ na duséésényée mɔ́ɔmɔ no lumenenemú na mɔ́.

⁵Moóma moánɛ mó lɛ́ gieninye gá tɛ́nɛ́ɛ ya cómbɛ́ná bɛsɛnɛ ya Asaŋa; mbɔ́gɔ́ ya mɔ́ ɛ lɔ́mɔ́ goŋaá no bɛ́ɛmba mammana ya batɔ báaba bá háananamɔ́ na Bufuŋe bá Asaŋa bɔ́ɔbɔ no ɔ́bɛgɔnɔmɔ́ go bɔ́.

⁶Bó lɛ́ tɛ́nɛ́ɛ naá oŋgíso yá Asaŋa goŋaá o óbigonyo báaba bá nyó óbigonyomú,

⁷a gunde a nyó fáanana gofuuge olɔŋɔ nɛcɔ́, bɛɛnyɔ́ɔ báaba no ɔ́bɛgɔnɔmɔ́. Boóma moánɛ bó ŋga báŋaáa gɛcamɛna gɛ́ɛgɛ Daadáa Yésusu a ŋgaá bédúfíe naá mmoɛná gúunú na bɛgaaga bɛ́hɛ́ bá bɛɛ́ŋgɛlɛsɛ,

⁸naá tɛ́mádɛ́má ya íyuke. Buisí moánɛ, a ŋga séésényée báaba bí inyenemú go íyime Asaŋa[1], bí inyenemú go ɔ́bɔ bɔ́ɔbɔ Gɛnɔ́gɔ́ gá Cɔ́mɔ gá Daadáa bɛcɔ́ Yésu Kilítu gɛ́ oyamɔ́.

⁹Noséésényée nábɔ́ no ŋga bɛ́ɛ́mbá gofúe gá busío buimée, halaháláa na hoóma háaha Daadáa a lɔ́mɔ́, halaháláa na gɛgaaga gɛ́hɛ́ gá nigúmi[2].

¹⁰Aŋa a ŋguú úlé, buisí moánɛ, báaba bá lɔ́mɔ́ bɛ́hɛ́ bá mo búlugenye, gɔnɔ́ biimée báaba bá mbaá ágá odɛ́má yábɔ́ naá mɔ́ɔ, bá mo lɛ́ɛma. Bɛɛnyɔ́ɔ tɔ́nɔ no ŋga bɛ́ɛ́mbá naá olɔŋɔ moánɛ, goakɛ́ no lɛ́ olímínyóolú ŋgoyáamɔ́ yɛ́ɛyɛ dɛ mbaá nyó dúmbínyée.

¹¹Boóma moánɛ bɔ́ dɛ bósógolonyomú Asaŋa bɛcɔ́ kanɛ tɔmbɛ́nɔ́ɔ go busío bɛ́nyɔ́, dɛ amɔ́: ŋgɛ́ɛ ɛ ɛ́na goŋaá no háanana na odɔ́ŋɛ́nɔ yɔ́ɔyɔ a lɔ́mɔ́ nyó dɔ́ŋɛ́nɔ́ɔlú; na bogaaga bɛ́hɛ́, ŋgáa a nyó óhiginyo goŋaá mbééníŋínyí yɛ́ɛyɛ no bɛananamɔ́ go go ŋanana besé ɛ bóhóogio; a gunde a ŋa goŋaá buelí bɔ́ɔbɔ gioliminyo gɛ́nyɔ́ gɛ́ nyó dómanamɔ́ go bɔ́, bó bɛ́ɛmba bese makɔ́nɔ́.

¹²Nɔ́ɔnɔ gɔ́ɔ no ná gúmenyemú ufíno ya Daadáa Yésu Kilítu naá bɛɛnyɔ́ɔ, bɛɛnyɔ́ɔ tɔ́nɔ no gúme naá mɔ́ɔ; meŋiigíe má niibo ná Asaŋa bɛcɔ́ na Daadáa Yésu Kilítu mɔ́mɔ́ɔ.