Read Nugunu 2 Tɛsalonɛ́ka 2 Bible Online

2 Tɛsalonɛ́ka 2 - Nugunu bible

2 Tɛsalonɛ́ka 2

¹Bolimóní, naá bosɔ́mɔ bɔ́ɔbɔ bó núunemú goncogunde gá Daadáa bɛcɔ́ Yésu Kilítu gɔnɔ́ na gobábándɛgɛna gɛ́cɔ́ gɔ́ɔgɔ naá boayá bɛ́hɛ́, dɛ á nyó bébégídíné dɛ amɔ́[3]:

²no do hóámá no do bádɛ́ɛ́ná goŋaá no yímie fɛaŋɔ nciŋí yɛnyɔ́; ɛ́na akɛ́ no bɛa bofoá go cɔ́mɔ akɛ́ ɛhanɛ́ɛ: tóogio, cɔ́mɔ ya nyuudé, kálata, gɛmbɛ́ná goŋaá moóma mɔ́ɔmɔ mó ncomɔ́ go úlene naá bɛɛcɔ́ɔ, mó gunde mó oya mó amɔ́, buisí bá Daadáa bó báa go bola.

³Mɔtɔ a dɛ hóámá a dɛ nyó nenúgíe akɛ́ go pɛ́ ɛhanɛ́ɛ, goakɛ́ buisí bɔ́ɔbɔ bó do ná bóso go bola otóotoɛ yá goŋaá batɔ bí inye Asaŋa. Gɔnɔ́ abolaboasɛ, Ohándá, gɔ́ɔ mɔ́ɔ a gaá gúé,

⁴Obɛlɔ́bɛlɔ mɔ́ɔnyɔ a bébúlugenyemú go go dómba buimée bɔ́ɔbɔ bá dɔ́ŋɔnɔmɔ́ bá amɔ́ asaŋa na buimée bɔ́ɔbɔ batɔ bá búlugenyemú. Gó ɛ́dá súge goŋaá, a ŋgɛ ɛ́dá lukumene naá Nnyaŋá ya Asaŋa, a béfínenye a amɔ́ a lɛ́ mɔ́ɔ moatɛ́ moatɛ Asaŋa[4].

⁵Mba lɛ́ nyó oyanɛna moóma mɔ́ɔmɔ ká lɛ́ naá bɛɛnyɔ́ɔ, no báa go bófoolio lí?

⁶Kanɛ́ no íyimene boóma bɔ́ɔbɔ bó gá kíkenyemú ohándá mɔ́ɔnyɔ godɔ́ɔdɔ, bó lɔ́mɔ́ goŋaá abolaboasɛ aŋa gɛcamɛna gɛ́hɛ́ gɛ́ ná háamɔ́.

⁷Ɛɛ́ɛŋ, bogaaga bá nnindíi bá go báaŋɛga Asaŋa, bó ná lɛ́ go yɔgɔnɔ; kanɛ́ aŋa mɔ́ɔnyɔ a mo kíkenyemú gó nco húme godɔ́ɔdɔ a ŋgaá dɔ́ŋɔ́mɛ́dá,

⁸Ohándá ba go báaŋɛgana Asaŋa a lɛ go maga boasɛ. Daadáa Yésusu a lɛ go mo fúugie na mefúnyi má nyuudé nɛ́hɛ́, a mo níŋiside kɔndɔ́ go cí na bogaaga bá nigúmi ná mencogunde mɛ́hɛ́.

⁹Aŋa gɔ́ɔgɔ Ohándá a ŋguú úlé na bogaaga bá Sátana, a ŋga ŋanánáa meŋiigíe má bogaaga mbɔ́dɔ mbɔ́dɔ, na bɛsɛɔ na muune má mbele[5].

¹⁰A ŋga ŋanánáa mbɔ́dɔ sá moóma mobɛ́ iŋkimée go go bele batɔ báaba bá béyímenyemú bɔ́ɔ moatɛ́ moatɛ. Bá ŋga yímé goakɛ́ bá lɛ́ kanɛ go lɛ́ga mammana yɛ́ɛyɛ ɛ mbaá lɔmɔ́ ya go bó sódio.

¹¹Boóma moánɛ bɔ́ Asaŋa a bó dómanɛnamɔ́ bogaaga bá gonanoga bɔ́ɔbɔ bó bó ŋananamɔ́ go goŋaá bó olimonyo mbele.

¹²Gɔ́ɔ, biimée báaba bá mbií inyé go olimonyo mammana, kanɛ́ bá bɔ́ɔ́ ɔ́bɔ́ bese go go ŋanana gɛbɛ́, bá ŋga sómbá gɛsɛnɛ gábɔ́.

¹³Bolimóní bɛ́cɔ́ báaba Daadáa a maamanamɔ́, dɛ háanana go béhiigi Asaŋa bɛcamɛna biimée go busío bɛ́nyɔ́. Mammana Asaŋa a mba nyó iyídé gó dúme naá mabayɛga, goŋaá a nyó sódio na bogaaga bá Gimmúmpúu gá Giliíli mɔ́ɔnyɔ a nyó íyenyemú bimmúmpúu, gɔnɔ́ go goŋaá no oliminyo mammana.

¹⁴Go nɔ́ɔ gɔ́ɔ Asaŋa a mbaá nyó dɔ́ŋɛ́nɔ́ go Gɛnɔ́gɔ́ gá Cɔ́mɔ gɛ́ɛgɛ dɛ mbaá nyó dóógínyóo; Asaŋa a mba nyó dɔ́ŋɛ́nɔ́ goŋaá no bɛa bodáŋɔ naá nigúmi ná Daadáa bɛcɔ́ Yésu Kilítu.

¹⁵Gɔ́ɔ kanɛ́ bolimóní, gɛ́ndɛ́mɛ́dá nɔnɔ, no gumbene tɛ́ŋɛ́tɛŋɛ kúunye sɛ́ɛsɛ dɛ mbaá nyó dúmbínyée na dogálɔ dá nyuudé ɛ́na lí na kálata.

¹⁶Ŋgáa Daadáa bɛcɔ́ Yésu Kilítu mɔ́ɔ moatɛ́ moatɛ na Asaŋa Isée bɛcɔ́ mɔ́ɔnyɔ a mbaá có maamánáa, a báá gundé a báá có fáá go niibo nɛ́hɛ́, magɛ́nda má kanɛ mmanɛ́náa na gɛnɔ́gɔ́ gá mbémineminie,

¹⁷a nyó boobio ɛdɛ́má, a nyó fáa bogaaga bá go ŋanana gɔgɔ́ besé bɛcamɛna biimée naá meŋiigíe na naá dogálɔ.