Read Nugunu 2 Tɛsalonɛ́ka 3 Bible Online

2 Tɛsalonɛ́ka 3 - Nugunu bible

2 Tɛsalonɛ́ka 3

¹Naá gosúgudinye bolimóní, bósógólónyóomú nɔnɔ go busío bɛ́cɔ́, go goŋaá nogálɔ ná Daadáa nó saa fɛaŋɔ fɛaŋɔ, gó gunde nó bɛa mbúlugie aŋa gɔ́ɔgɔ nó lɔ́mɔ́ naá bɛɛnyɔ́ɔ.

²Bósógólónyóomú nɔnɔ tɔ́nɔ Asaŋa go goŋaá a có sódio naá magálá má batɔ babɛ́ gɔnɔ́ bahándá, goakɛ́ mɔtɔ uŋkimée a dɛ olímónyóo.

³Kanɛ́ Daadáa mɔ́ɔ, a lɛ́ na pídefide; a ná nyó gíndie, a gunde a nyó beŋe go Ombɛ́[6].

⁴Daadáa a có fáanana mbémineminie go busío bɛ́nyɔ́. Dɛ íyimene goŋaá no ŋanana boóma bɔ́ɔbɔ dɛ nyó oyanɛnamɔ́, no ná gɔnɔ dúmbenye na go bó ŋanana.

⁵Ŋgáa Daadáa i indenye ɛdɛ́má yɛnyɔ́ naá gɛnɔ́ɔ́nɛ́nɔ́ gá Asaŋa na naá ɛbágóɛga hɛ́ɛhɛ Kilítusu a fáananamɔ́.

⁶Bolimóní, dɛ á nyó lɔsɛ́nɔ́ go ufíno yá Daadáa Yésu Kilítu dɛ amɔ́: Úlúkíe nɔnɔ mekúígíi na uŋkimée mɔ́ɔnyɔ ɔ ɔyɔmɔ́ gɛbɛ́, a lɔ́mɔ́ a dɛ bienénée témbuginye yɛ́ɛyɛ dɛ mbaá nyó dúmbínyée.

⁷Bɛɛnyɔ́ɔ moatɛ́ moatɛ no íyimene aŋa gɔ́ɔgɔ no lɔ́mɔ́ ba go biene ɛbaná nɛ́cɔ́. Dɛ lɛ́ kanɛ go ɔyɔ gɛbɛ́ gá gɛɔyɔ naá boayá bɛ́nyɔ́.

⁸Dɛ lɛ́ kanɛ go ɔŋɛnɔ mɔtɔ boóma bá go nyáa; kanɛ́ dɛ mba lɛ́ dɛ yɔgɔnɔ aŋa budúgú aŋa sisíi, na gɛɔ́bɛgɔ na gɛdɔmbɔ giimée, goŋaá dɛ dɛ nóɛ́ná mɔtɔ akɛ́ ba búmmue naá bɛɛnyɔ́ɔ[7].

⁹Asáa gɔgɔ́ dɛ mba lɛ́ dɛ bɛanana bogaaga bá go gɛ́ndɛgɛna gióhiginyo gɛ́nyɔ́, kanɛ́ dɛ mbaá ŋaáa nɔ́ɔnɔ goŋaá dɛ nyó dúfie goŋaá no biene ɛbaná nɛ́cɔ́.

¹⁰Aŋa gɔ́ɔgɔ dɛ mbaá lɔmɔ́ naá bɛɛnyɔ́ɔ, dɛ mba nyó bébégídíné dɛ amɔ́: aáŋa mɔtɔ a dɛ lɛ́gálɛ́gáa go yɔgɔnɔ, a dɛ háánánáa tɔ́nɔ go nyáa boóma[8].

¹¹Asáa gɔgɔ́ dɛ ɔ́bɔnɔ goŋaá batɔ bá lɛ́ hɔ́ɔ naá kadɛ́gadɛ́ɛ yɛnyɔ́ báaba bɔ́ ɔyɔmɔ́ gɛbɛ́ gá gɛɔyɔ; bá dɛ ŋaáa boóma goana go bienene bɛsɛnɛ bá basɔ́gɔ́ɔ.

¹²Dɛ oyanɛna batɔ bɔ́ɔbɔ, dɛ bó fáanana ɛsɔ́mɔ go ufíno yá Daadáa Yésu Kilítu dɛ amɔ́: Ŋgáa bá yɔgɔnɔ naá buumbénú goŋaá bá bɛa bɔ́ɔ moatɛ́ moatɛ boóma bá go nyáa.

¹³Go busío bɛ́nyɔ́ bolimóní, no do yodá bɛnamá go go ŋanana besé.

¹⁴Aáŋa mɔtɔ a dɛ ŋaáa ŋgɔ́bɛnɔ na bɔ́ɔbɔ dɛ nyó oyanɛnamɔ́ naá kálata yɛ́ɛyɛ, mo bélincígínyéemú nɔnɔ, no dɔmbɔ go ɔyɔ olɔŋɔ nɛhɛ́, goŋaá a nóa odóɛ.

¹⁵No do mo gɔ́lɔ́ aŋa obɛlɔ́bɛlɔ, kanɛ́ mo sɔ́mɔ́ɔmɔ́ nɔnɔ aŋa ondimóní bɛ́nyɔ́.

¹⁶Ŋgáa Daadáa ba buumbénú a nyó fáa mɔ́ɔ moatɛ́ moatɛ buumbénú mbɔ́dɔ iŋkimée go bɛcamɛna biimée. Ŋgáa Daadáa a bɛ́ɛmba nɛnyɔ́ biimée.

¹⁷Yɔmɔ́ɔ Póolo ŋgaá nyó bédíígíe na ombɔ́gɔ yámɛ yá moatɛ́. Nɔ́ɔnɔ gɔ́ɔ ŋgɔ́ŋɔmɔ́ naá bakálata bámɛ biimée, goɔ́ŋɔ gámɛ gɔ́ɔgɔ.

¹⁸Ŋgáa niibo ná Daadáa bɛcɔ́ Yésu Kilítu nɛ́ bɛ́ɛmba nɛnyɔ́ biimée.