Read Nugunu 1 Timotée 1 Bible Online

1 Timotée 1 - Nugunu bible

1 Timotée 1

¹Yɔmɔ́ɔ Póolo, apótɛlɛ ba Yésu Kilítu, go kɛsɛ́ná ya Asaŋa usódí bɛcɔ́, gɔnɔ́ na Yésu Kilítu mɔ́ɔnyɔ a lɔ́mɔ́ mbémineminie yɛcɔ́.

²Ko ɔ́ŋɛnɔmɔ́ maamɔ́ɔ Timotée[1], mammana yamɛ ya moɔnɔ́ naá gioliminyo caá: ŋgáa Asaŋa Isée na Yésu Kilítu Daadáa bɛcɔ́ bá go boogo, bá go fáa ŋgɛ́na mahana na buumbénú.

³Ndɔ́mɔ́ caá, gɛ́gáa naá Ɛ́fɛsɛ, aŋa gɔ́ɔgɔ mmbaá go lɔsɛ́nɔ́ naá gofadɛgɛna gámɛ go go ɛ́da naá Masɛdóanɛ. Batɔ bá lɛ́ hɔ́ɔ báaba bá húunenyemú kúunye sá mbele; o háanana go bó lɔsɛnɔ, bá dɛ́ɛna gohúunenye gábɔ́ moánɛ.

⁴O bó oyana bá básáŋona go oya biidí bá kanɛ kɔ́ɔ, na go bana bɛntaálala bá ɛlɔŋɔ ya ɛgɛlɛ; moóma mɔ́ɔmɔ mó úlene na cuŋí naá kadɛ́gadɛ́ɛ ya batɔ, kanɛ́ mó do bó dúgúnée goŋaá bá yɔgɔnɔ aŋa nokɛsa ná Asaŋa nó lɔ́mɔ́ naá gioliminyo.

⁵Mbɔ́gɔ́ ya gɛlɔsɛnɔ yɛ́ɛyɛ ɛ lɔ́mɔ́ gofoyona gɛnɔ́ɔ́nɛ́nɔ́ gɛ́ɛgɛ gɛ́ ɛ́damɔ́ go úlene naá odɛ́má yá kanɛ biílo, odɛ́má yɔ́ɔyɔ yó lɔ́mɔ́ yó do có goománɛ́náa, gɛnɔ́ɔ́nɛ́nɔ́ gɛ́ɛgɛ gɛ́ ɛ́damɔ́ go úlene naá mammana ya gioliminyo.

⁶Bóncodío bá lɛ́ bóóŋónáalú moóma mɔ́ɔmɔ, bá báá yímé naá biegu bá cuŋí.

⁷Bá bégide ombɔ́gɔ bá amɔ́, bɔ́ɔ bá lɛ́ muloodio má gicele gá Asaŋa; asáa gɔgɔ́ bá dɛ ɔ́bɔ́nɔ́ɔ akɛ́ bɔ́ɔbɔ bó oyamɔ́, ɛ́na akɛ́ masɛnɛ máama bá lɔ́mɔ́ bá amɔ́ bɔ́ɔ bí íyimene.

⁸Dɛ íyimene dɛ amɔ́ gicele gɛ́ lɛ́ gɛnɔ́gɔ́, aáŋa dɛ yɔgɔnɔ na gɛ́ aŋa gó háananamɔ́.

⁹Kanɛ́ ŋgáa dɛ ɔ́bɔ bese goŋaá: gicele gɛ́ dɛ báá ágáalú go mɔtɔ ba tɛ́nɛ́ɛ. Gɛ́ lɔ́mɔ́ go belelí odóɛ na batɔ bá kanɛ ŋgɔ́bɛnɔ. Gɛ́ lɛ́ tɔ́nɔ go batɔ báaba bá lɔ́mɔ́ bá dɛ íyíménée Asaŋa na bologílógí. Batɔ báaba bá lɔ́mɔ́ bá dɛ hálámánánáa Asaŋa, na báaba bá mo sɛgamɔ́; go báaba bóónamɔ́ biisée na bennyeedíi; gicele gɛ́ lɛ́ tɔ́nɔ go buúní batɔ.

¹⁰Gɛ́ lɛ́ go báaba bá lɛ́galɛgamɔ́ gɛɔyɔ gá hanyɔ́, go batɔ báaba bá bɛ́dɛganɛnamɔ́: banɔ́mɔtɔ́ bɔ́ɔ na bɔ́ɔ, bakɔ́dɔ bɔ́ɔ na bɔ́ɔ. Gɛ́ lɛ́ go bedúí bɛɔlɛ́, go bebelíbélí, go batɔ báaba bá bálɛananamɔ́ mbálɛɛná sá kanɛ kɔ́ɔ. Gɛ́ lɛ́ gɔnɔ́ tɔ́nɔ go biiménénée báaba bá bábɛndabɛndamɔ́ kúunye ya mammana.

¹¹Kúunye moánɛ ɛ lɔ́mɔ́ naá Gɛnɔ́gɔ́ gá Cɔ́mɔ gɛ́ɛgɛ Asaŋa a mbaá ncoóo; Asaŋa mɔ́ɔnyɔ a gúmemú, a lɔ́mɔ́ tɔ́nɔ gɛfona giimée, mɔ́ɔ a mbaá ncoóo Gɛnɔ́gɔ́ gá Cɔ́mɔ moánɛ.

¹²Mbéhiigi Daadáa bɛcɔ́ Yésu Kilítu go gɔ́ɔgɔ a lɔ́mɔ́ páalú bogaaga bá go yɔgɔnɔ buelí bɛ́hɛ́; mɔ́ɔ a lɔ́mɔ́ ɛ́náalú goŋaá ndɛ́ na pídefide go buelí bɛ́hɛ́.

¹³Yɔmɔ́ɔ mɔ́ɔnyɔ ŋgaá ná lɔmɔ́ cóá, pánɛnafanɛna Asaŋa, céesenye boolímínyí, ndola odɛ́má, kanɛ́ a lɛ́ ŋgɛ́náalú mahana, goakɛ́ mmba lɛ́ ŋŋanana nɔ́ɔnɔ naá kanɛ goíyime, gɔnɔ́, cɛ mbáa lɛ na gioliminyo[2].

¹⁴Ɛɛ́ɛŋ, ndɛ́ fundufundu na niibo ná Daadáa bɛcɔ́, na gioliminyo, na gɛnɔ́ɔ́nɛ́nɔ́, mɔ́ɔmɔ mó úlenemú naá Yésu Kilítu.

¹⁵Nogálɔ nɔ́ɔnɔ nó lɔ́mɔ́ nó amɔ́: Yésu Kilítu a mbu úlé naá cí go go nco sódio bologílógí, yɔmɔ́ɔ moatɛ́, kɔ́kɔ́ɔ naá olɔŋɔ yábɔ́. Nogálɔ moánɛ nó lɛ́ kɔ́ɔ, nó háanana goŋaá batɔ biimée bá nó gɛ́ndɛgɛna odɛ́má uŋkimée.

¹⁶Kanɛ́ aáŋa Asaŋa a lɛ́ ŋgɛ́náalú mahana, bó lɔ́mɔ́ go goŋaá Yésu Kilítu a dúfie gɛantáanta gɛ́hɛ́ gá kumbene odɛ́máa naá yɔmɔ́ɔ mɔ́ɔnyɔ ndɔ́mɔ́ kɔ́kɔ́ɔ ya ulogí, go busío bá goŋaá mbɛ́ɛmba gieninye gá báaba bá ná ŋamɔ́ bá ágana odɛ́má yábɔ́ naá mɔ́ɔ go go bɛa gɛɔyɔ gá kanɛ mesúge.

¹⁷Maamɔ́ɔ ufuŋe yá bɛcamɛna biimée, maamɔ́ɔ Asaŋa Edigúé, bá dɛ mo ɛ́nánáa, mɔ́ɔ mokáa táŋɛ́ Asaŋa, mbúlugie na nigúmi go mannyómá aá mannyómá. Aamɛnɛ.

¹⁸Moɔnɔ́ bamɛ Timotée, ɛsɔ́mɔ hɛ́ɛhɛ ko dɛ́fɛnamɔ́ hɛ́ɛhɛ hɛ́ lumenene na dogálɔ dɔ́ɔdɔ mbúsí sá Asaŋa sɛ́ mbaá dóáná go gálagala go busío báhɔ; gumbéne dogálɔ dá ndiemi, o noa gɛnɔ́gɔ́ gá nɛnoa,

¹⁹na gioliminyo, na odɛ́má yɔ́ɔyɔ yó lɔ́mɔ́ yó do go goománɛ́náa. Bóntió bá mbi inyé go ɔ́bɛnɔ odɛ́má yábɔ́, gioliminyo gábɔ́ gɛ́ báá yímé.

²⁰Naá olɔŋɔ yá bɔ́ɔbɔ, Imenée na Alɛgɛsándɛlɛ bá lɛ́ kɔ́ɔ; ndɛ́ bó dɛ́ɛ́náalú naá ɛmbɔ́gɔ ya Sátana[3], go goŋaá bá bɛa ɛsɔ́mɔ, bá dɔmbɔ go fánɛnafanɛna Asaŋa.