Read Nugunu 1 Timotée 2 Bible Online

1 Timotée 2 - Nugunu bible

1 Timotée 2

¹Busío busío, tóanamɔ́ go go oyana caá, boolímínyí bá háanana go bósógolonyo, bɔ́ ɔŋɔnɔ, bá béyébeyebie, bá béhiigi Asaŋa go busío bá mɔtɔ uŋkimée.

²No háanana go bósógolonyo go mefuŋe na benuní cí biimée, goŋaá dɛ ɔyɔ naá bopɔ́ɔ na naá buumbénú. Dɛ ɛ́da go ɔ́bɛnɔnɔ Asaŋa, dɛ bɛa bɛnɔ́gɔ́ bá ndoŋá.

³Nɔ́ɔnɔ gó lɛ́ gɛnɔ́gɔ́ akɛ́báamɔ́, gó fɛɛnanɛna Asaŋa, Uféŋí bɛcɔ́.

⁴A maamana a amɔ́ mɔtɔ uŋkimée a bɛa gisódio[4], a gɔnɔ lɛnca mammana ya Cɔ́mɔ.

⁵Ɛɛ́ɛŋ, Asaŋa a lɛ́ táŋɛ́ ummue, gɛlabɛ́ná tɔ́nɔ táŋɛ́ gímmue naá tɛ́mádɛ́má yɛ́ɛyɛ nɛhɛ́ na batɔ. Gɛlabɛ́ná moánɛ gɛ́ gɛ́ lɔ́mɔ́ mɔtɔ mɔ́ɔnyɔ a lɔ́mɔ́ Yésu Kilítu,

⁶mɔ́ɔ a mbaá bííŋéné go nigúe go go fáŋa mɔtɔ uŋkimée[5]. Kɔ́ɔ, a mbaá dúfíe, aŋa gɛcamɛna gɛ́ mbaá háá, goŋaá Asaŋa a lɛ́galɛga go fáŋa mɔtɔ uŋkimée.

⁷Boóma moánɛ bɔ́ Asaŋa a mbaá tílímínyée osɔ́mɔsɔmɔ gɔnɔ́ apótɛlɛ bɛhɛ́ ba go ɛ́da ŋgoya dogálɔ dɛ́hɛ́ go mɛɛ́nɔ[6]. Ŋgɛ́da ŋgoya mammana goŋaá bá mo oliminyo. Kɔ́ɔ ndɔ́mɔ́ cɛ belée, ŋgoya mammana.

⁸Gɔ́ɔ kanɛ́ ndɛ́galɛgamɔ́ caá batɔ bɛ́ ɛ́da go bósógolonyo Asaŋa hoóma hiimée, ɛmbɔ́gɔ immúmpúu go mmoɛná[7], kanɛ mpímí, kanɛ bɛsɛnɛ bɔ́ɔ na bɔ́ɔ.

⁹Kɔnɔ lɛ́galɛga caá bakɔ́dɔ bá bálɛŋa bese kanɛ giyólóo. Bá dɛ háánánáa go bébúlugenye. Naá gobégedegedie gábɔ́, bá dɛ bísínyée akɛ́ naá go bánoga cóɛ, akɛ́ naá ndɛŋɔ sá góolo, akɛ́ naá bɛla bá go oŋona muinyí gɛca[8].

¹⁰Kanɛ́ bɛnɔ́gɔ́ bábɔ́ bá caŋa bɛ́ bɛ́ háananamɔ́ go bɛ́ɛmba bonɔ́gɔ́ bábɔ́; bakɔ́dɔ báaba bó oyamɔ́ bá amɔ́ bɔ́ ɔ́bɔnɛnɔ Asaŋa bá háanana go ɔyɔ nɔ́ɔnɔ.

¹¹Gɔ́ɔgɔ bakɔ́dɔ bá hóonamɔ́ masɔ́mɔ má Asaŋa, bá háanana go mámana pɔ́ɔ́, na ŋgɔ́bɛnɔ iŋkimée.

¹²Ŋgaá legé goŋaá bakɔ́dɔ bɛ́ ɛ́da go húunenye ɛ́na akɛ́ goŋaá bí indenye banɔ́mɔtɔ́. Bá háanana go mámana pɔ́ɔ́,

¹³goakɛ́, Asaŋa a mba dóáná go gedie Ádama, a báa lɛ go nco yibe gá Ɛ́fa.

¹⁴Okɔ́dɔ mɔ́ɔ a mbaá ŋaáa Asaŋa edúu, goakɛ́ mɔ́ɔ Sátana a mbaá mo belé, kanɛ́ caá Ádama[9].

¹⁵Akɛ́ nɔ́ɔnɔ, Asaŋa a ŋga sódío bakɔ́dɔ go go bíene gábɔ́ bá amɔ́ bá dúmbenye na go mo olimonyo. Bá háanana go bɛa gɛnɔ́ɔ́nɛ́nɔ́, bá bɛ́ɛmba bɛtɛ́nɛ́ɛ naá oŋgíso yá Asaŋa, bá dɛ bébúlúgényée.