Read Nugunu 1 Timotée 3 Bible Online

1 Timotée 3 - Nugunu bible

1 Timotée 3

¹Nogálɔ nɔ́ɔnɔ nó lɛ́ mammana: mɔtɔ mɔ́ɔnyɔ a fúmbemú go yɔgɔnɔ buelí bá go indenye Nnyaŋá yá Asaŋa, a lɛ́galɛga gɛnɔ́gɔ́ gá buelí.

²Mɔtɔ mɔ́ɔnyɔ i indenyemú Nnyaŋá yá Asaŋa, gɛɔyɔ gɛ́hɛ́ gɛ́ háanana go bɛ́ɛmba kanɛ cigíi: onɔ́mɛ ba okɔ́dɔ táŋɛ́ ummue, a bégumbenene odɛ́má, a ŋanana moóma má tɛ́nɛ́ɛ, kanɛ giyóló go boóma, a gɛ́ndɛgana biinyí bese, i íyimene go dúfenye batɔ.

³A dɛ háánánáa go bɛ́ɛmba gɛnyóa ɛ́na akɛ́ osɛnɛsɛ́nɛ́ɛ. A háanana go bɛ́ɛmba gɛpɔ́ɔ́, gɔnɔ́ mɔtɔ ba buumbénú, a dɛ ágá odɛ́má yɛ́hɛ́ go muinyí.

⁴I íyime go indenye nnyaŋá yɛhɛ́ ya moatɛ́, baaná bá mo ɔ́bɛnɔ, bá gɔnɔ mo hálamanana.

⁵Kanɛ́ aáŋa mɔtɔ a dɛ íyi go indenye ncíbo yɛhɛ́ ya batɔ, a lɔ́mɔ́ ba go nco go íyime go indenye Nnyaŋá yá Asaŋa nɛɛ́nɛ o?

⁶Gɔ́ɔgɔ no lɛ́galɛgamɔ́ go iyide ogɔ́nɔ́ɔ naá buelí bá Asaŋa, no do gɔ́lɔ́ mɔtɔ mɔ́ɔnyɔ a gá lɔ́mɔ́ na go íŋene naá gioliminyo gá Yésu Kilítu, a ná ŋa a lɛ́ nɔ́ɔnɔ ɛ ɛ́da go béségi, ɛ ɛ́ya ba goŋaá Asaŋa a mo séesenye aŋa a mbaá séésényée ohándá.

⁷Ogɔ́nɔ́ɔ moánɛ a sɛmɛganana go bɛ́ɛmba tɔ́nɔ mɔ́ɔnyɔ akɛ́ bindiolímínyóo Asaŋa bɛ́ mo búlugenyemú. Kanɛ nɔ́ɔnɔ, bá lɛ́ bá go ɛ́da go mo fánɛnafanɛna, a nóa odóɛ, o obɛna naá magálá má ohándá[10].

⁸Boóhígínyí tɔ́nɔ bá háanana go bɛa bɛnɔ́gɔ́ bá ndoŋá, bá dɛ bɛ́ɛ́mbá batɔ bá bɛlɛ́mbɛ bɛ́andɛ́, ɛ́na bɛnyóa. Bá dɛ háánánáa go fúmbe go bóda muinyí naá mbele mmoɛná.

⁹Bá háanana go bágódɛna nogálɔ ná gioliminyo nɔ́ɔnɔ Asaŋa a mbaá dóógío naá odɛ́má yɔ́ɔyɔ yó lɔ́mɔ́ yó do bó goománɛ́náa.

¹⁰Gɔ́ɔgɔ no gaá ná gá lɛ́ go iyide boóhígínyí, no manɛ bó ɔ́bɛdɛnɔ, aáŋa bá lɛ́ kanɛ giféné, no bó ága naá undukí moánɛ.

¹¹Bakɔ́dɔ bábɔ́ bá háanana go bɛa bɛnɔ́gɔ́ bá caŋa tɔ́nɔ. Bá dɛ háánánáa go gála bɛamɔ́ɔ. Bá tɛmba nɛnyóa, bá bɛ́ɛmba na pídefide go boóma buimée.

¹²Uŋgóhígínyí a háanana go bɛa okɔ́dɔ táŋɛ́ ummue, a gɔnɔ go íyime go indenye baaná bɛ́hɛ́ na ncíbo yɛhɛ́ ya batɔ iŋkimée.

¹³Boóhígínyí báaba bá yɔgɔnɔmɔ́ bese, batɔ bá bó hálamanana. Hɔ́ɔlɔ́ kanɛ́ bá ná lɛ́ naá odɛ́nɛ́ yá go gálagala masɔ́mɔ má gioliminyo gɛ́ɛgɛ gɛ́ có ladamɔ́ na Yésu Kilítu na toodo odɛ́máa iŋkimée.

¹⁴Timotée, ŋgaá go ɔ́ŋɛ́nɔ́ kálata yɛ́ɛyɛ na mbééníŋínyí ya ŋaá kuú úlé nco go ɛ́na fɛaŋɔ.

¹⁵Kanɛ́ akɛ́ cɛ gá lɛ́ go bola, dogálɔ dá kálata dɔ́ɔdɔ dó go dúfie aŋa o háananamɔ́ go bɔ́gɔ́lɔnɔ naá nnyaŋá yá Asaŋa, nɔ́ɔnɔ gó lɛ́ aá Giimbó gá boolímínyí Asaŋa gɛ́ɛgɛ gɛ́ lɔ́mɔ́, ɛgoná gɔnɔ́ gidímbígéné go busío bá mammana.

¹⁶Ɛɛ́ɛŋ, kanɛ cuŋí, nogálɔ ná mammana nɔ́ɔnɔ Asaŋa a mbaá dóógío go go có dúfenye aŋa dɛ háananamɔ́ go ɔyɔ naá busío bɛ́hɛ́, nó lɛ́ gɛantáa. Kilítusu a mba gɔ́lɔ́ nnyɔ́dɔ ya mɔtɔ, Gimmúmpúu gá Giliíli a báá dúfíe a amɔ́ Yésusu a lɛ́ gɛtɛ́nɛ́ɛ[11], bɛɛ́ŋgɛlɛsɛ bá mba mo lɛ́ɛ́máa, batɔ bá mbɛ ɛ́dá go dóogonyo nogálɔ nɛ́hɛ́ go mɛɛ́nɔ miimée, batɔ gɛca bá mo olimonyo naá cí iŋkimée, Asaŋa a báá mo búlúgíe naá undukí yá nigúmi.