Read Nugunu 1 Timotée 4 Bible Online

1 Timotée 4 - Nugunu bible

1 Timotée 4

¹Gimmúmpúu gá Giliíli a mbo oyɛ́dá dáŋɛ́daŋɛ a amɔ́: naá mesúgidinye má bɛcamɛna, batɔ bóntió bá ŋga dɛ́ɛ́ná gioliminyo, bɛ́ ɛ́da go bienene biliíli bá mbele na gohúunenye gá go ɛ́da go úle naá bahándá.

²Batɔ bóntió gɔnɔ́ bá bɛlɛ́mbɛ bɛ́andɛ́ báaba bóoyamɔ́ bɛsómba bɔ́ɔ bá ŋgaá bó nenúgíe. Baŋkanɔ́ŋkanɔ moánɛ bá dɛ gɔnɔ́ bényíigenye odɛ́má,

³bá legene batɔ bá amɔ́ bá dɛ giŋéné, bá gɔnɔ bó celene manyáanya móntió. Asáa gɔgɔ́ Asaŋa mɔ́ɔ a mbaá gedíe manyáanya mɔ́ɔmɔ. Gɔ́ɔ gó lɔ́mɔ́, mɔtɔ mɔ́ɔnyɔ a bienenemú Kilítusu, a gɔnɔ lɛncana mammana yɛhɛ́, a nyáanana manyáanya moánɛ, ɛ ɛ́da a béhiigi Asaŋa.

⁴Boóma buimée bɔ́ɔbɔ Asaŋa a mbaá gedíe bó fɛanana[12], bá go fánɛna bó do báá aáŋa no gɛ́ndɛgana buimée na mbéhiigí.

⁵Mammana, nogálɔ ná Asaŋa na mbósógólí mó soga buimée bɔ́ɔbɔ.

⁶Go amɔ́ o húunenye batɛ́ɔbɛnɔ mosɔ́mɔ mɔ́ɔmɔ, o gaá bɛ́ɛ́mbá gɛnɔ́gɔ́ gá uyogóní ba Yésu Kilítu, dogálɔ dá gioliminyo na mammana ya kúunye yɛ́ɛyɛ o bienenemú na odɛ́má uŋkimée mó go dúge.

⁷Inyé biidí bá kanɛ kɔ́ɔ, na ulóogo yá bilunú bá bakɔ́dɔ, mó do nɔ́ɔ́nɔ́nɔ́ɔ Asaŋa. Bégíndíemú go go ɔyɔ aŋa Asaŋa a lɛ́galɛgamɔ́.

⁸Mɔtɔ a amɔ́ a bégíndenye naá nnyɔ́dɔ, nɔ́ɔnɔ gó mo óhigonyo sɔŋɛ, kanɛ́ a amɔ́ a bégíndenye go go ɔyɔ aŋa Asaŋa a lɛ́galɛgamɔ́, nɔ́ɔnɔ gó mo oyoyo degédegé goŋaá a bɛa bɔ́ɔbɔ Asaŋa a mbaá dáná go gɛɔyɔ gɛ́ɛgɛ naá cí gɔ́ɔgɔ, na gɛ́ɛgɛ gá kanɛ go mana.

⁹Nogálɔ nɔ́ɔnɔ nó lɛ́ kɔ́ɔ, nó háanana goŋaá batɔ biimée bá nó gɛ́ndɛgɛna na odɛ́má uŋkimée.

¹⁰Aáŋa dɛ bóóna dɛ gɔnɔ noanana na buelí[13], bó lɔ́mɔ́ goŋaá dɛ lɛ́ ágáalú odɛ́má yɛ́cɔ́ naá Asaŋa mɔ́ɔnyɔ a lɔ́mɔ́ ogɔ́sɔ, mɔ́ɔ Uféŋí ba batɔ biimée, dómbá dómbáa boolímínyí bá Kilítusu.

¹¹Gɔɔgɔ́nɔ́ɔ batɔ o gɔnɔ bó húunenye moóma mɔ́ɔmɔ.

¹²O do bádɛ́ɛ́nɛ́ná mɔtɔ a dɛ go fánɛ́ná go boábayɔ́ báhɔ. Kanɛ́ bɛ́ɛmba go busío bá boolímínyí, gieninye naá dogálɔ, naá gobɔ́gɔ́lɔnɔ, naá gɛnɔ́ɔ́nɛ́nɔ́, naá goágana odɛ́má yáhɔ naá Asaŋa, naá gɛɔyɔ gá kanɛ biílo.

¹³Gɛcamɛna gɛ́ɛgɛ o gá gɛ́ganamɔ́ gobola gámɛ, bííŋénéemú go go banana batɔ nogálɔ ná Asaŋa, o bó gíndenye, o gɔnɔ bó húunenye.

¹⁴O do sesésésíe pááná ya niibo yɛ́ɛyɛ o lɔ́mɔ́ na yɛ́, cɔ́mɔ ya mbúsí ya Asaŋa yɛ́ ɛ mbaá go dúmbínyée gɔ́ɔgɔ bafɛanɔ́ɔ bá mbaá go dálɛ́gɛ́ná ɛmbɔ́gɔ.

¹⁵Buelí moánɛ bɔ́ɔ o háananamɔ́ go yɔgɔnɔ na odɛ́má yáhɔ uŋkimée, nɔ́ɔnɔ batɔ biimée bá nɛ́ ɛ́ná bá amɔ́ o gónɛna naá pɛ́ ya Asaŋa.

¹⁶Bííyíméemú naá ndoŋá sáhɔ, na gohúunenye gáhɔ, o gídene ɛbágóɛga kɔ́ɔ. Ɛɛ́ɛŋ, aŋa o ŋananamɔ́ nɔ́ɔnɔ, gɔ́ɔ o ŋgaá bɛáa gisódio gáhɔ gá moatɛ́ na gá báaba bá go bódólonyomú.