Read Nugunu 1 Timotée 5 Bible Online

1 Timotée 5 - Nugunu bible

1 Timotée 5

¹O do áncánáa ogɔ́nɔ́ ba mɔtɔ, mo téndényéemú lɛbɛlɛbɛ aŋa tɛ́ɔ[14]. Gɛ́gáa na bahaŋa aŋa bifío báhɔ.

²Gɛ́gáa na bagɔ́nɔ́ bá bakɔ́dɔ aŋa beyigúédíi, o gɔ́lɔnɔ babóla aŋa batɛ́ɔbɛnɔ, o gɛ́ga nabɔ́ kanɛ pegíné síntió.

³Hálámána bisí bá bakɔ́dɔ, mammana sá bisí.

⁴Aáŋa gisí gɛ́ bɛanana baaná, akɛ́ ɛnana, bɔ́ɔbɔ bá háanana go manɛ hóona go búlugenye biisée. Bá bó beŋebeŋe aŋa tɔ́nɔ biisée bá mbaá bó beŋébéŋée bɔ́ɔ na boábayɔ́. Nɔ́ɔnɔ gó fɛɛnanɛna Asaŋa.

⁵Mammana ya gisí gá okɔ́dɔ kanɛ mɔtɔ gɛ́ ágana odɛ́má yɛ́hɛ́ naá Asaŋa, gɛ́ gɔnɔ bágóɛgana go go mo yɛ́bɛnayɛbɛna, gɛ́ bósógolonyo bɛcamɛna biimée na budúgú na sisíi.

⁶Kanɛ́ gisí gɛ́ɛgɛ gɛ́ ɔyɔmɔ́ go ndɛ́ga ya gɛ́, gɛ́ lɛ́ gɛgɔ́sɔ naá oŋgíso yá batɔ, gigúe naá boayá bá Asaŋa.

⁷O ŋa go oyanɛna bisí nɔ́ɔnɔ goŋaá gobɔ́gɔ́lɔnɔ gábɔ́ gó bɛ́ɛmba tɛ́nɛ́ɛ.

⁸Mɔtɔ mɔ́ɔnyɔ i inyemú go oyo, dómbá dómbáa mɔtɔ bɛhɛ́ bá nnyaŋá, i íyime a amɔ́, a á básáŋóná gioliminyo. A lɛ́ kɔ́kɔ́ɔ a dómbana gindiolímínyóo.

⁹Ɔ́ŋɔ́ naá kálata ya bisí bá gooyoyo goana gɛ́ɛgɛ gɛ́ ná lɔ́mɔ́ nnyómá otíno ádadɔ́, na oŋɛndɛ́gá, gɛ́ bɛ́ɛmba gɔnɔ́ gɛ́ɛgɛ gɛ́ mbaá giŋéné oŋɛndɔ táŋɛ́ yúmmue.

¹⁰Batɔ bá háanana go ségi buelí bá gisí gá ndiemi: gɛ́ bɛ́ɛmba gɛ́ɛgɛ gɛ́ mbaá lɛ gɛ́ beŋebeŋe baaná bá gɛ́ bese, gɛ́ gɛ́ndɛgana biinyí bese naá nnyaŋá ya gɛ́, gɛ́ soga batɔ bá Asaŋa bɛgɔ́ndɔ́, gɛ́ oyoyo báaba bɔ́ ɔ́bɛgɔnɔmɔ́, gɛ́ gɔnɔ bííŋenene go go ŋanana meŋiigíe má bese.

¹¹Kanɛ́ o do ɔ́ŋɔ́ naá kálata ya bisí bá gooyoyo, bɛ́ɛbɛ bɛ́ gá lɔ́mɔ́ babóla, goakɛ́ gɔ́ɔgɔ mbééníŋínyí sá go gɔnɔ giŋene sɛ́ gaá ná fúfúgé, bɛ́ cecugie gɛɔyɔ gá gioliminyo gɛ́ɛgɛ na Kilítusu,

¹²bá dáŋaba gɛbɛ́ gá ɛkada, goakɛ́ bá lɛ́ kanɛ go gumbene mefúnyi mábɔ́ máama bá mbaá fáá.

¹³Gɔnɔ́ aŋa bá lɔ́mɔ́ kanɛ buelí bá go yɔgɔnɔ, bá lɛ go ɛ́da bá kúle go nnyaŋá iŋkimée; gɔgɔ́ akɛ́ aŋa bá lɔ́mɔ́ kanɛ buelí bá go yɔgɔnɔ, bá gála bɛamɔ́ɔ kanɛ nɛgɛlɛ́ɛ, bó oya moóma má basɔ́gɔ́ɔ, na ŋkanɔ́ sá kanɛ mbɔ́gɔ́ɔ.

¹⁴Go boóma moánɛ gɔ́ɔ ndɛ́galɛgamɔ́ kanɛ́ caá bɛtɔmbɔ́ɔ bá bisí bɛ́ ɛ́dana go bigiŋe, bɛ́ bíene baaná, bɛ́ beŋebeŋe nnyaŋá sábɔ́; go goŋaá babɛlɔ́bɛlɔ bɛ́cɔ́ bá dɛ ɛ́dá go có hɔɔnɔ.

¹⁵Bó lɛ́ goŋaá bisí bíntió bɛ́ báa go nanoga, bɛ́ báá biené Sátana.

¹⁶Aáŋa uŋgolímínyí ba okɔ́dɔ a bɛanana bisí bá bakɔ́dɔ naá mɔ́ ncíbo ya batɔ, a háanana go oyoyo bisí bɛ́ɛbɔ goŋaá bɛ́ dɛ bɛ́ɛ́mbá naá gɛnóɛ́ gá gɛɔ́fɔ gá boolímínyí; nɔ́ɔnɔ gɛɔ́fɔ gá boolímínyí gɛ́ ɛ́da go oyoyo goana báaba bá lɔ́mɔ́ mammana bisí.

¹⁷Bafɛanɔ́ɔ báaba bí indenyemú biimbó bá bakɛlɛ́tɛnɛ bese bá háanana na mbúlugie makɔ́nɔ́, dómbá dómbáa báaba bá bóónɛnamɔ́ go go dóogonyo na go húunenye nogálɔ ná Asaŋa.

¹⁸Ŋgɔ́ŋɛ́ yɛ oya yɛ amɔ́: «Anáa gúlúge ɛ yɔgɔnɔmɔ́, o do yɛ legé go bákɛ́bɛda mefuge.» Nó gɔnɔ go oya nó amɔ́: «Uyogóní a háanana na bɛsoɛná bɛ́hɛ́[15].»

¹⁹Mɔtɔ a dɛ háánánáa go sɔ́mɛnɔ ofɛanɔ́ɔ ummue aáŋa a dɛ bɛanánáa batɔ báandɛ́ akɛ́ bádadɔ́ bá go bɛ́ɛmba nnyimé yɛhɛ́[16], o do ágá gɛsɔ́mɛnɔ moánɛ naá udúu.

²⁰Baláa naá gɛtátáná báaba bá ŋananamɔ́ gɛgáda goŋaá báaba bóntió bá bɛa tɔ́nɔ bofoá.

²¹Ŋgaá go bálɛɛná sɔ́kɔlɛ, naá busío bá Asaŋa, naá busío bá Yésu Kilítu na bɛɛ́ŋgɛlɛsɛ bɛ́hɛ́ báaba a mbií íyídé caá, gumbéne bɛlɔsɛnɔ bɛ́ɛbɛ kanɛ nnyimé, kanɛ gonóɛna mɔtɔ odóɛ.

²²O do gá lɛ́ go dálɛgɛna mɔtɔ ɛmbɔ́gɔ go go mo gɔ́lɔ naá buelí bá Asaŋa. O do ɛ́dá go ála bɛlɔgɔ bá sɔ́gɔ́ɔ, maamɔ́ɔ moatɛ́ o bébeŋe kanɛ giílo.

²³Go ogɔnɔ́ yáhɔ yá gadɛ́ɛ na kányɔ kányɔ yahɔ ya bɛcamɛna biimée, o ŋa o nyóɛna mɔgɛ́bɔ sɔŋɛ, o do lɔbɛ́nɔ́ go miimpo má aá má.

²⁴Bɛlɔgɔ bá batɔ bóntió bɛ́ lɛ́ dambáŋɛ́ dambaŋɛ, bɛ́ ɛ́nɛgana kanɛ go manɛ bó sómbɛna gɛsɛnɛ; bá bóntió bɛ́ nco go ɛ́nɛgana goana naá nnyimé.

²⁵Caŋa mmue bɛnɔ́gɔ́ bá meŋiigíe, bɛ́ ɛ́nɛgana dambáŋɛ́ dambaŋɛ. Akɛ́ bɛ́ɛbɛ bɛ́ lɔ́mɔ́ bɛ́ dɛ bɛ́ɛ́mbá nɔ́ɔ, bɛ́ dɛ lɔbɔ́nɔ́ɔ naá nɛɔsɛgɔ.