Read Nugunu 1 Timotée 6 Bible Online

1 Timotée 6 - Nugunu bible

1 Timotée 6

¹Bɛɔlɛ́ biimée bɛ́ háanana go hálamanana bagɔ́nɔ́ɔ bábɔ́ na mbúlugie iŋkimée, goŋaá bindiolímínyóo Asaŋa bɛ́ dɛ ɛ́dá go sɛga ufíno yɛ́hɛ́ gɔnɔ́ na kúunye yɛcɔ́.

²Aáŋa ogɔ́nɔ́ɔ a lɛ́ uŋgolímínyí, gɛɔlɛ́ gɛ́ dɛ lɔbɔ́ kanɛ go mo hálamanana goŋaá bá lɛ́ bondimóní naá boayá bá Kilítusu. Kanɛ́ gɛ́ háanana go yɔgɔnɔ bese bese, gɛ́ dúmbidinye, goakɛ́ ogɔ́nɔ́ɔ a lɛ́ uŋgolímínyí Asaŋa, a mo maamana, a háanana go dáŋabana besé ya gɛnɔ́gɔ́ gá buelí gá gɛɔlɛ́ gɛ́hɛ́. Boóma bɔ́ɔbɔ bɔ́ o háanana go húunenye, o gɔnɔ dóogonyo.

³Mɔtɔ mɔ́ɔnyɔ a dúfenyemú kókáa, a dɛ bágódɛ́ná dogálɔ dá mammana dá Daadáa bɛcɔ́ Yésu Kilítu, na gohúunenye gɔ́ɔgɔ gó lumenenemú na gioliminyo,

⁴bendiemi, gobéségi gɛ́hɛ́ gó mo fáanana bumbúdíi. A dɛ íyíménée boóma, a lɛ́ gɛgɔnɔ́gɔnɔ gá cuŋí na cáŋɔ́. Moóma mɔ́ɔmɔ mó bíenenye bodɛ́má, buudé, cigí na gofegene basɔ́gɔ́ɔ bɛbɛ́ bá moóma.

⁵Mó bíenenye tɔ́nɔ cuŋí sá kanɛ mmanɛ́náa na batɔ báaba bá lɔ́mɔ́ na nciŋí ya moloolio, bá lɔ́mɔ́ bá dɛ íyíménée mammana, bá béeniŋenyemú bá amɔ́ gioliminyo gɛ́ lɛ́ pɛ́ ya nobóda.

⁶Mammana mammana, aáŋa o bienene pɛ́ ya Asaŋa, o lɛ́ gɛnɔ́mɛ; kanɛ́ o lo go ŋa o do fánɛ́ná bɔ́ɔbɔ o bɛananamɔ́.

⁷Dɛ mbu úlé naá cí ɛmbɔ́gɔ ɛhandɛ́, gɔ́ɔ dɛ ŋgaá gɔnɔ́ gúlugene ɛmbɔ́gɔ ɛhandɛ́.

⁸Dɛ háanana go ɔ́bɔ bese aáŋa dɛ lɛ́ na boóma bá go nyáa, na gɛla gá go báága.

⁹Kanɛ́ batɔ báaba bá fúmbemú bonɔ́mɛ degédegé, báa sátana a bó ubenyemú naá ɛdámbɔ hɛ́hɛ́. Bá lɛ́galɛga moóma má dugúnú mɔ́ɔmɔ mó díeŋedieŋiemú batɔ, mó gɔnɔ bó fúugenye.

¹⁰Ɛɛ́ɛŋ, go gúnene gá muinyí gó lɛ́ mbɔ́gɔ́ ya bɛbɛ́ bá moóma degédegé. Batɔ bóntió bá báá go inye pɛ́ ya gioliminyo go muinyí; boóma moánɛ bɔ́ ɛdɛ́má yabɔ́ yɛ ɔ́bɛgɔnɔmɔ́.

¹¹Maamɔ́ɔ Timotée, mɔtɔ ba Asaŋa, bɛ́mbɛ́mɛ́da macaŋa mɔ́ɔmɔ nɔ́ɔnɔ. Fúúmbée botɛ́nɛ́ɛ, o díine Asaŋa, o bɛa gioliminyo, gɛnɔ́ɔ́nɛ́nɔ́, ɛbágóɛga na bondebédedíe.

¹²Noáa gɛnɔ́gɔ́ gá nɛnoa gá gioliminyo. Ŋaáa goŋaá o bɛa gɛɔyɔ gá kanɛ mmanɛ́náa. Go nɔ́ɔ gɔ́ɔ Asaŋa a mbaá go lɔɔ́ɔ, maamɔ́ɔ mɔ́ɔnyɔ o mbaá gálɛ́dá cóá gɛnɔ́gɔ́ gá nogálɔ naá gɛca go amɔ́ o lɛ́ gá Yésusu.

¹³Ŋgaá go oyáná naá busío bá Asaŋa mɔ́ɔnyɔ a fáananamɔ́ boóma buimée gɛɔyɔ, na naá busío bá Yésu Kilítu mɔ́ɔnyɔ a mbaá gálɛ́dá gɛnɔ́gɔ́ gá nogálɔ naá busío bá ŋgɔ́mɔnɔ Pɔ́ŋɔsɛ Pɛlátɛ[17], caá:

¹⁴bɛ́dɛ́gɛ́na ɛsɔ́mɔ hɛ́ɛhɛ o mbaá bɛáa. Meŋiigíe máhɔ má bɛ́ɛmba kanɛ biílo, kanɛ cigíi, gó ɛ́da bola aŋa Daadáa bɛcɔ́ Yésu Kilítu a ŋgaá ncó gunde.

¹⁵A ŋga ncó gunde aŋa gɛcamɛna gɛ́ɛgɛ Asaŋa a mbií iyídé gɛ́ ŋgaá háá. Asaŋa mɔ́ɔnyɔ a lɔ́mɔ́ gigúménúu, gimmuée gá Ufuŋe, Ufuŋe yá mefuŋe, Daadáa ba badaadáa[18].

¹⁶Mɔ́ɔ mokáa a lɔ́mɔ́ Edigúé, kɛ́gɛ́ná yɛhɛ́ naá gise gɛ́ɛgɛ mɔtɔ a lɔ́mɔ́ a dɛ bolánáa hɔ́ɔ. Mɔtɔ a gá báasa a dɛ mo ɛ́ná na oŋgíso, mɔtɔ a dɛ báá ba go mo ɛ́na[19]. Mɔ́ɔ a háananamɔ́ na nigúmi na bogaaga, kanɛ mmanɛ́náa. Aamɛnɛ.

¹⁷Lɔsɛ́nɔ banɔ́mɛnɔmɛ bá cí yɛ́ɛyɛ bá dɛ ɛ́dá go béségi. Bá dɛ ágá odɛ́má yábɔ́ naá bonɔ́mɛ bá kanɛ kɔ́ɔ[20], kanɛ́ ŋgáa bá ága odɛ́má yábɔ́ naá Asaŋa mɔ́ɔnyɔ a có fáananamɔ́ boóma buimée fundufundu bɔ́ɔbɔ dɛ békelenyemú na bɔ́.

¹⁸Ŋgáa bá ŋanana besé, bonɔ́mɛ bábɔ́ bó bɛ́ɛmba bɛnɔ́gɔ́ bá meŋiigíe, bá bɛ́ɛmba befééní bá ombɔ́gɔ mbalɛ́ɛ, bé ebinyebinye.

¹⁹Bá amɔ́ bá ŋanana nɔ́ɔnɔ, bá á bɛ́dɛ́gɛ́ná go busío bábɔ́ moatɛ́ gɛnɔ́gɔ́ gɔnɔ́ na gɛgɔ́nɛ́naga gá bonɔ́mɛ go medúgú máama má úlenemú[21], bá dáŋaba mammana ya gɛɔyɔ.

²⁰Timotée, beŋébéŋée bese buelí bɔ́ɔbɔ Asaŋa a mbaá go yigídé go bɔ́. Go ásɛgana biegu bá ŋkanɔ́, bɛ́ dɛ luménénée na gioliminyo, tɔ́nɔ na ŋkanɔ́ sá biegu bá ŋciŋí.

²¹Bóntió bá lɛ́ bienéelú pɛ́ yɛ́ɛyɔ, bá báá bóóŋóná gioliminyo. Ŋgáa Asaŋa a nyó boogo.