Read Nugunu 2 Timotée 2 Bible Online

2 Timotée 2 - Nugunu bible

2 Timotée 2

¹Moɔnɔ́ bamɛ, maamɔ́ɔ kanɛ́, bɛáa magɛ́nda go niibo nɛ́ɛnɛ Yésu Kilítu a ŋananamɔ́ báaba bá lɔ́mɔ́ olɔŋɔ nɛhɛ́.

²Gó gɔnɔ gunde, kúunye yɛ́ɛyɛ o mbaá bɛáa naá yɔmɔ́ɔ naá busío bá gɛca gá ŋgominyo, dúmbínyée bɛmammana bá batɔ bɛ́ɛbɛ bɛ́ lɔ́mɔ́ bá go bɛa bogaaga bá go húunenye tɔ́nɔ batɔ bóntió.

³Gɔ́lɔ́ báhɔ bodáŋɔ bá gɛɔ́bɛgɔ aŋa mammana ya gisimbi gá Yésu Kilítu.

⁴Mɔtɔ mɔ́ɔnyɔ a dígemú buelí bá busimbi a dɛ háánánáa go ágana odɛ́má naá moóma má gɛɔyɔ gá dugúnú aáŋa a lɛ́galɛga go bɛ́ɛmba bese naá busío bá ogɔ́nɔ́ɔ bɛhɛ́.

⁵Caŋa táŋɛ́ mmue, gɛgaaga gá unuí nca ya bɛdɛ́anɛnana a dɛ bósó bá go bɛa nokanya aáŋa a dɛ á gá beŋé nokɛsa ná nca[1].

⁶Uyogóní ntɛ́mɛ́ mɔ́ɔnyɔ a gɔ́lɔnɔmɔ́ gɛdɔmbɔ a háanana go dóana go nyáa bɛsamɔ́ bá giukú gɛ́hɛ́.

⁷Bógoodóomú bese bɔ́ɔbɔ ko oyanɛnamɔ́, Daadáa a lɛ go go fáa nciŋí ya go ɔ́bɔ moóma mɔ́ɔmɔ muimée.

⁸Bééníŋínyéemú Yésu Kilítu, onana yá Défidi, mɔ́ɔ mɔ́ɔnyɔ Asaŋa a mbaá mo fúfúné naá kadɛ́gadɛ́ɛ ya begúe aŋa gɔ́ɔgɔ Gɛnɔ́gɔ́ gá Cɔ́mɔ gɛ́ɛgɛ túmenyemú gɛ́ oyamɔ́.

⁹Bó lɔ́mɔ́ go Gɛnɔ́gɔ́ gá Cɔ́mɔ moánɛ gɔ́ɔ ŋgɔ́bɛgɔnɔmɔ́, gódágódá naá iŋgolí aŋa ohándá ba mɔtɔ. Kanɛ́ nogálɔ ná Asaŋa nɔ́ nó do báá naá iŋgolí.

¹⁰Go nɔ́ɔ gó moánɛ kélemenemú buimée go busío bá báaba Asaŋa a mbií iyídé go goŋaá bɔ́ɔ tɔ́nɔ ba bɛa gisódio gá Kilítu Yésusu, bá gɔnɔ dáŋaba nigúmi ná kanɛ mmanɛ́náa.

¹¹Nogálɔ nɔ́ɔnɔ nú úlenemú nɔ́ɔnɔ nó lɛ́ kɔ́ɔ: Dɛ mba gúé nɛhɛ́, nɛhɛ́ dɛ ŋga gɔnɔ́ go ɔyɔ;

¹²dɛ lɔbɛnɔ gɛ́ndɛ́ŋɛ́ gɛndɛŋɛ, nɛhɛ́ dɛ ŋga gúmée. Kanɛ́ dɛ amɔ́ dɛ mo básáŋona, mɔ́ɔ tɔ́nɔ a ŋga có básáŋóná.

¹³Aáŋa dɛ lɛ́ kanɛ pídefide, mɔ́ɔ a lɛ́ na pídefide, goakɛ́ mɔ́ɔ a dɛ ŋgá básáŋona mɔ́ɔ moatɛ́ akɛ́ go buisí[2].

¹⁴Bɔ́ɔbɔ bɔ́ o háananamɔ́ go eniŋenye biimée, bó oyánɛ́náamɔ́ daŋɛ́daŋɛ naá oŋgíso yá Asaŋa goŋaá bá ásɛgɛna cuŋí; sɛ́ dɛ dúgúnée go boóma ɛ́na caá go go nenie báaba bá sɛ́ bódólonyomú.

¹⁵Bégíndíemú go go bóloodio naá busío bá Asaŋa aŋa mɔtɔ mɔ́ɔnyɔ a báá ná manɛ́ go kélemene bɛdɔmbɔ, aŋa uyogóní mɔ́ɔnyɔ ɔ ɔ́bɔnɔmɔ́ bese na buelí bɛ́hɛ́, goakɛ́ a dúmbenye Nogálɔ ná mammana naá tɛ́nɛ́ɛ.

¹⁶Ásɛ́gɛ́na ontɛ́ɛ yá kanɛ mbɔ́gɔ́ɔ yɔ́ɔyɔ yó lɔ́mɔ́ yó do luménénée na gioliminyo, báaba bá bí íŋenenemú go yɔ́ bá ŋga dɔ́bɔ́ɔ bɛ́ ɛ́dana halaháláa na Asaŋa.

¹⁷Nyuudé ná batɔ bɔ́ɔbɔ nɛ́ lɛ́ aŋa gɛdɔ́lɛgɔ gá gɛmpɔgɔlɔ gɛ́ɛgɛ gɛ́ súgideninyemú go nyáa nnyɔ́dɔ iŋkimée. Batɔ báaba aŋa Imenée na Fílete bá lɔ́mɔ́ nɔ́ɔ.

¹⁸Bá lɛ́ bóóŋónáalú mammana, bo oya bá amɔ́ púfuge ya begúe ɛ báá go báŋa. Ŋgoyáamɔ́ yábɔ́ yɛ́ɛyɛ ɛ báa go nenie batɔ gɛca naá gioliminyo.

¹⁹Akɛ́ nɔ́ɔnɔ, gɛgaaga gá ɛgoná gɛ́ɛgɛ Asaŋa a mbaá dábɛ́gá gɛ́ lɛ́ hɔ́ɔ. Dogálɔ dɔ́ɔdɔ dó lɔ́mɔ́ dɛládɛlá kɔ́ɔ dɔ́dɔ́ɔ dó lɔ́mɔ́: Daadáa i íyimene báaba bɔ́ ɔ́bɛnɔnɔmɔ́ nɛhɛ́[3]; gɔnɔ́ mɔ́ɔnyɔ a buŋemú ufíno yá Daadáa, ŋgáa a básáŋona gɛlɔgɔ.

²⁰Naá nnyaŋá ya bonɔ́mɛ, caá akɛ́ goana isóyóo ya gedíelú na góolo na ya gɛkɔ́ŋɔ gá muinyí, yɛ́ ɛ lɔ́mɔ́ kɔ́ɔ. Ɛ lɛ́ hɔ́ɔ tɔ́nɔ yɛ́ɛyɛ ɛ lɔ́mɔ́ gedíelú na boɛ́tɛ na ya noma. Ya busío ɛ lɔ́mɔ́ go bɛantáanta bá bɛdáágá, yɛ́ɛyɛ intió, go mɔbɔ́yɔgɔnɔ má dugúnú.

²¹Kanɛ́ mɔtɔ a amɔ́ a bébeŋe kanɛ biílo go bɛgáda bá moóma biimée bɛ́ɛbɛ ŋgoyamɔ́ bɛ́ɛbɛ, a ŋga bɛ́ɛ́mbá aŋa usóyóo yá gɛdáágá sogáalú, yó dúgune mɔtɔ ba yɔ́, yó lɛ́ hɔ́ɔ go mɔbɔ́yɔgɔnɔ miimée má bese.

²²Ásɛ́gánáa bɛdɛ́mádɛ́má bá magomagoma. Ágá bogaaga báhɔ buimée go go fúmbe botɛ́nɛ́ɛ, gioliminyo, gɛnɔ́ɔ́nɛ́nɔ́ na buumbénú, olɔŋɔ na báaba bá bósógolonyomú Daadáa na odɛ́má yá kanɛ biílo.

²³Inyé cuŋí sá buegu na sá kanɛ kɔ́ɔ, goakɛ́ sɛ́ sɛ́ úlenemú na cáŋɔ́.

²⁴Moánɛ gó do háánánáa goŋaá uyogóní ba Daadáa a gála cáŋɔ́. Kanɛ́ a sɛmɛgananamɔ́ go maamana mɔtɔ uŋkimée, a bɛa bogaaga bá go húunenye, a kélemenene bɛdɔmbɔ.

²⁵A háanana go húunenye naá lɛbɛlɛbɛ batɔ báaba bá mo báaŋɛganamɔ́. Gódaga, Asaŋa a lɛ́ bá go bó fáa bogaaga bá go núgie ndoŋá, bá lɛnca mammana.

²⁶Hɔ́ɔ há bá ná ncomɔ́ gunde naá pɛ́ ya tɛ́nɛ́ɛ, bá bésúdune naá modámbɔ má ohándá mɔ́ɔnyɔ a gá bó nonamɔ́ ŋkólío, bá mo ɔ́bɛnɔnɔ.