Read Nugunu 2 Timotée 3 Bible Online

2 Timotée 3 - Nugunu bible

2 Timotée 3

¹Íyíme kanɛ́ go amɔ́, naá medúgú má mesúgudinye, bɛcamɛna bɛbɛ́ bɛ́ ŋga bɛ́ɛ́mbá.

²Ɛɛ́ɛŋ, batɔ bá ŋga bɛ́ɛ́mbá bebulubúlúu, begúle bá muinyí, bagayagáyáa, bá béségi, bá sɛga Asaŋa, belelí ɛdóɛ naá boayá bá bebíéní bábɔ́, bá dɛ bɛáa odɛ́má yá go béhiigi, bá dɛ hálámáná moóma má Asaŋa.

³Bá ŋga bɛ́ɛ́mbá kanɛ odɛ́máa, kanɛ ndɛgɔ́lɔ́ɔ mahana, begélí bɛamɔ́ɔ, kanɛ mbégumbene odɛ́máa, bɛkándáa, bá dɛ lɛ́gá besé.

⁴Bá ŋga bɛ́ɛ́mbá bebelí modɔgɛ, bá lúugene, gicéki gábɔ́ gɛ́ bó ága bigélí, bá ŋga lɛ́gá gɛɔyɔ gá nnyɔ́dɔ gó dómba Asaŋa.

⁵Bá ŋga bɛ́ɛ́mbá boolímínyí mmoɛná mmoɛnáa, kanɛ́ bá dɛ ŋgá hɛma bogaaga bá gioliminyo. Maamɔ́ɔ fíídíe batɔ bɔ́ɔbɔ nnyimé!

⁶Bóntió bá lɛ́ naá olɔŋɔ yábɔ́ báaba bí íŋenenemú naá nnyaŋá sá batɔ, bá degedenye mokɔ́dɔkɔ́dɔ́ má bɛlɔgɔ dácɛ mɔ́ɔmɔ mó ɔyɔmɔ́ go gɛdɛ́mádɛ́má gábɔ́.

⁷Bakɔ́dɔ moánɛ bá fúmbe gɔgɔ́ go hóona, kanɛ́ bá dɛ ɛ́dá bola naá goíyime gá mammana.

⁸Nɔ́ɔ gɔ́ɔ batɔ báaba bá báaŋɛganamɔ́ mammana caŋa mmue aŋa cóá Sánɛsɛ na Sámbɛlɛsɛ bá mbaá bááŋɛ́gá Mɔ́sɛsɛ. Bá lɛ́ batɔ bá nciŋí kɔ́nɔ́kɔ́nɔ́, gioliminyo gábɔ́ gɛ́ lɛ́ boóma bá dugúnú.

⁹Kanɛ́ bá dɛ ŋgɛ́ ɛ́da halaháláa, goakɛ́ buegu bábɔ́ bó ŋga bédúfíe daŋɛ́daŋɛ naá oŋgíso ya batɔ, aŋa bá batɔ bá báandɛ́ bɔ́ɔbɔ bó mbaá bédúfíe cóá.

¹⁰Kanɛ́ maamɔ́ɔ, o lɛ́ bienéné bienéné gohúunenye gámɛ go ɛbaná go ɛbaná na go bɔ́gɔ́lɔnɔ gámɛ, na nokɛsa ná medíge mámɛ, gioliminyo gámɛ, go bánona gámɛ, gɛnɔ́ɔ́nɛ́nɔ́ gámɛ na gokélemenene gámɛ gá bɛdɔmbɔ.

¹¹O lɛ́ ɛ́náalú kasɛ́á duséésényée na kasɛ́á gɛɔ́bɛgɔ mɔ́ɔmɔ ndɔ́mɔ́ luménéelú na mɔ́ naá Óntiosi, naá Íkoniumu na naá Lísitele. Kasɛ́á mbɔ́dɔ ya duséésényée yɛ́ɛyɛ ndɔ́mɔ́ kanɛ go bɛa o! Kɔ́ɔ naá muimée mɔ́ɔmɔ Daadáa a mba lɛ́ a códonyo.

¹²Moatɛ́ biimée báaba bá lɛ́galɛgamɔ́ go ɔyɔ gɛɔyɔ gá pídefide na Asaŋa go gibénebiginye gɛ́ɛgɛ na Yésu Kilítu, batɔ bá ŋga bó séésényée.

¹³Kanɛ́ mbɛ́ sá batɔ na bebelíbélí bá ŋgi íŋéné sulubutu bá ŋanana gɛgáda, bá belebele bɔsɔ́gɔ́ɔ, bɔsɔ́gɔ́ɔ tɔ́nɔ bá bó belebele.

¹⁴Kanɛ́ maamɔ́ɔ, lɔbɛ́nɔ tɛ́ŋɛ́tɛŋɛ naá buimée bɔ́ɔbɔ o lɔ́mɔ́ hóóná hóóná, o báá gɔnɔ́ go oliminyo goŋaá bó lɛ́ mammana, goakɛ́ go íyimene ánɛ́ɛ mɔ́ɔnyɔ a mbaá go mó húúnényée.

¹⁵Moánɛ gó bayɛga na boábayɔ́ báhɔ, go íyimene bimmúmpúu bá ŋgɔ́ŋɛ́; bɛ́ lɛ́ bá go go fáa mammana ya nciŋí. Nciŋí yɛ́ɛyɛ yá indenyemú naá gisódio go gioliminyo gɛ́ɛgɛ naá Yésu Kilítu.

¹⁶Ŋgɔ́ŋɛ́ iŋkimée, bó lɔ́mɔ́ pegíné ya Asaŋa. Ɛ lɛ́ bese go go húunenye mammana, go go dúfenye bɔ́ɔbɔ bó lɔ́mɔ́ giédie, go go bónona, go go dúfenye go ɔyɔ aŋa gɔ́ɔgɔ Asaŋa a lɛ́galɛgamɔ́,

¹⁷go goŋaá mɔtɔ mɔ́ɔnyɔ a yɔgɔnɛnɔmɔ́ Asaŋa a bégedie, a ŋanana buimée bɔ́ɔbɔ bó lɔ́mɔ́ busi.