Read Nugunu 2 Timotée 4 Bible Online

2 Timotée 4 - Nugunu bible

2 Timotée 4

¹Boóma moánɛ bɔ́ɔ ko oyanamɔ́ daŋɛ́daŋɛ naá oŋgíso yá Asaŋa na naá yá Yésu Kilítu go go úle gɛ́hɛ́ aŋa ufuŋe ogɔ́nɔ́ go go nco sómba bɛsɛnɛ bá bɔgɔ́sɔ na begúe caá:

²dúménínyée nogálɔ ná Asaŋa, o latɛnana, gɛcamɛna giimée, akɛ́ gɛ́ bɛ́ɛmba bese akɛ́ gɛ́ bɛ́ɛmba gɛbɛ́, o ŋa goŋaá batɔ bá no ɔ́bɔ, bá gɔnɔ nó oliminyo, goománɛ́náa o gɔnɔ gúlumeninye, o húunenye na kumbene odɛ́máa iŋkimée.

³Gɛcamɛna gɛ́ ŋgu úlé gɛ́ɛgɛ batɔ bá ŋgi inyé go bódólonyo mammana ya ɛsɔ́mɔ. Go go lɛ́galɛga gábɔ́ gá moatɛ́, bá ŋga bíiyídéné gitúu gá muloodio, bɔ́ɔbɔ bá lɛ go ɛ́da go bó oyanɛna moóma má go bó yoŋgolonyo edúu.

⁴Bá ŋga bégímbée edúu go mammana, bá yá buune go go bódólonyo biidí bá mbégedinye gedinye.

⁵Kanɛ́ maamɔ́ɔ, akɛ́ ŋkádɛ gɛ́ ŋa, bégumbénéemú bese, kéléméne duséésényée. Ŋanánáa bese buelí báhɔ bá uŋguyí Gɛnɔ́gɔ́ gá Cɔ́mɔ. Yɔgɔ́nɔ́ɔ buelí báhɔ buimée.

⁶Go bɔ́ɔbɔ bó nnúunemú, ndɛ́ pɛnɛ́ɛ go go íŋene gɛɔyɔ gámɛ go gɛbáágá naá Asaŋa. Gɛcamɛna gámɛ gá go biene pɛ́ gɛ́ á háá.

⁷Ŋgaá noanánáa gɛnɔ́gɔ́ gá nɛnoa, mbáá maná odɛ́dá yámɛ. Mbáá beŋé gioliminyo.

⁸Godɔ́ɔdɔ, nokanya ná nɛnoa, nɔ́ɔnɔ go lɛ́ aá, botɛ́nɛ́ɛ bá kanɛ mesúge, nó ná lɛ́ kedínyéelú. Daadáa, usúmbí bɛsɛnɛ bá tɛ́nɛ́ɛ a ná nó nco naá buisí bá go súgudinye, caá yɔmɔ́ɔ mokáa, kanɛ́ tɔ́nɔ go biimée báaba bá gɛ́ganamɔ́ goúle gɛ́hɛ́ na gɛnɔ́ɔ́nɛ́nɔ́.

⁹Bágáyɛ́gáamɔ́ o nco kuenye.

¹⁰Dɛ́masɛ a á cíé mokáa, a báá lɛ́gá gɛɔyɔ gá nnyɛ́ganɔ, a bɛ́ɛ́ ɛ́dá naá Tesoloníke. Kɛlɛsánsɛa, mɔ́ɔ, a bɛ́ɛ́ ɛ́dá naá Gelesíi, Tíite naá Delemetíi.

¹¹Lókasɛ mokáa mɔ́ɔ a á ná síéné namɛ. Fúúmbée go úle na Mélékusu, a gɛɛ́ ɛ́dá go ŋgóhigonyo naá buelí bámɛ.

¹²Ndɛ́ dómáalú Tisíke naá Ɛ́fɛsɛ.

¹³O ŋgúlene na gɛla gámɛ gá isió gɛ́ɛgɛ ndɔ́mɔ́ síelú naá nnyaŋá ya Kalapósɛ naá Tolóasɛ. O do bófoolío go gɔ́lɔ bakálata, dómbá dómbáa báaba bá lɔ́mɔ́ ɔ́ŋɔ́ɔlú naá bɛɔbɔ.

¹⁴Udúnedune, Alɛgɛsándɛlɛ a lɛ́ ŋŋaáalú gɛbɛ́ makɔ́nɔ́. Daadáa a ná mo gundinye obɔ moánɛ go meŋiigíe mɛ́hɛ́.

¹⁵Maamɔ́ɔ moatɛ́ mo báyáŋáamɔ́ tɔ́nɔ, goakɛ́ a nuugenye gɛbɛ́ gɛbɛ́ godúmenye gɛ́cɔ́ gá Nogálɔ.

¹⁶Oŋɛndɔ yá busío yɔ́ɔyɔ mmbaá dɛ́lɛ́mɛ́ná go go bɔ́bɔgɔbɔgɔ naá nɛgála, mɔtɔ a lɛ́ kanɛ go bɛ́ɛmba hɔ́ɔ go go bɛ́ɛmba ŋgominyo yamɛ, biimée púmú bá mba túfíe nnyimé. Ŋgáa Asaŋa a bó héehinye.

¹⁷Kanɛ́ Daadáa mɔ́ɔ a mba lɛ́ namɛ, a kíndenye, mbɔ́dɔ yɛ́ɛyɛ mmbaá dúmbényée Nogálɔ nɛ́hɛ́ nuimée, goŋaá biimée báaba bá lɔ́mɔ́ bá dɛ bɛ́ɛ́mbá Beyúdene bá nó ɔ́bɔnɔ. Kɔ́ɔ a mbaá códío naá nyuudé ná ŋgoyóŋo.

¹⁸Daadáa a ŋgɛ ɛ́dánáa naá busío na go mbɔgɔbɔgɔ naá magálá má ohándá miimée, a ŋgíŋenye na bogɔ́sɔ buimée naá Bufuŋe bá mmoɛná bɛ́hɛ́. Nigúmi nɛ́ lɔ́mɔ́ nɛ́hɛ́ magɛlɛ aá magɛlɛ! Aamɛnɛ.

¹⁹Mbédíígínyéemú Pɛlɛsɛ́ka na Akɛ́lasɛ, tɔ́nɔ na ncíbo ya batɔ ya Onɛsɛfɔ́ɔlɛ.

²⁰Ɛláasɛ a lɛ́ lɔbɛ́nɔ́ɔlú naá Kɔlɛ́ɛntɛ, mmba síé Tolofíme naá Mílete goŋaá a mba lɛ́ a nóma.

²¹Bágáyɛ́gáamɔ́ go úle gɛcamɛna gá gɛkɔ́nɔ́nɔ́ɔ gá isió kanɛ go bola. Ebulu, Pódɛŋɛsɛ, Línusu, Kolódɛa, na boolímínyí báaba bóncodío biimée, bá á go bédíígényée.

²²Ŋgáa Daadáa a bɛ́ɛmba nahɔ. A nyó boogo bɛɛnyɔ́ɔ biimée.