Read Nugunu Tíite 1 Bible Online

Tíite 1 - Nugunu bible

Tíite 1

¹Yɔmɔ́ɔ Póolo, uyogóní buelí ba Asaŋa, apótɛlɛ mɔ́ɔnyɔ Yésu Kilítu a mbaá dómá go goŋaá ŋgóhiginyo batɔ báaba Asaŋa a mbií íyídé go go mo olimonyo, bá gɔnɔ go íyime mammana go go ɔyɔ aŋa Asaŋa a lɛ́galɛgamɔ́,

²bá gɔnɔ bɛa toodo odɛ́máa ya gɛɔyɔ gá kanɛ mesúge gɛ́ɛgɛ Asaŋa mɔ́ɔnyɔ a lɔ́mɔ́ a dɛ belébélée a mbaá lɛ dánáalú naá busío busío bá gobayɛga gá bɛcamɛna.

³Aŋa gɛcamɛna gɛ́ mbaá háá, gɛ́hɛ́ go dúfie gɛɔyɔ moánɛ naá Nogálɔ nɛ́hɛ́ naá cɔ́mɔ yɛ́ɛyɛ a mbaá páá go goŋaá túmbeninye batɔ na bogaaga bá Asaŋa, Usódí bɛcɔ́.

⁴Tíite, yɔmɔ́ɔ Póolo mɔ́ɔ ko ɔ́ŋɛnɔmɔ́ kálata yɛ́ɛyɛ[1]. O lɛ́ aŋa moɔnɔ́ bamɛ go goŋaá dɛ olimonyo bɛɛcɔ́ɔ biimée Yésu Kilítu. Ŋgáa Asaŋa Isée na Yésu Kilítu Usódí bɛcɔ́, bá go boogo, bá go fáa buumbénú.

⁵Tíite, ndɔ́mɔ́ go síelú naá Kɛlɛ́tɛ go goŋaá o yibe hɔ́ɔ go gedegedie masɔ́mɔ miimée máama má gá lɔ́mɔ́ kanɛ go bégedie, o dílimenye gɔgɔ́ aŋa ndɔ́mɔ́ go dúfényé go dúfényé, bafɛanɔ́ɔ naá tɛ́sɔnɔ sá Kɛlɛ́tɛ iŋkimée.

⁶Mɔtɔ mɔ́ɔnyɔ bá mo iyidemú go go bɛ́ɛmba ofɛanɔ́ɔ, a sɛmɛganana go bɛ́ɛmba mɔtɔ ba kanɛ gifénée, onɔ́mɛ ba okɔ́dɔ ummue táŋɛ́, baaná bɛ́hɛ́ bá bɛ́ɛmba na ŋgɔ́bɛnɔ, bá bɛ́ɛmba boolímínyí, bá dɛ bɛ́ɛ́mbá bapalapálá.

⁷Gó háanana nɔ́ɔnɔ go goŋaá ofɛanɔ́ɔ a bɛ́ɛmba kanɛ gifénée. Aŋa gɛnɔ́gɔ́ gá umbídígíní masɔ́mɔ má Asaŋa, a dɛ sɛmɛ́gánánáa go bɛ́ɛmba mɔtɔ ba buudé, ba gimpímímpímí, a dɛ bɛ́ɛ́mbá gɛnyóa mɔgɛ́bɔ, uŋgubí ɛsaŋɔ́, na gɛdɛ́mádɛ́má gá muinyí.

⁸A sɛmɛganana go bɛ́ɛmba mɔtɔ mɔ́ɔnyɔ a gɛ́ndɛganamɔ́ batɔ bese bese naá mɔ́ hoóma, a lɛ́galɛga go ŋanana besé, mɔtɔ ba pɔ́ɔ́, mɔtɔ ba tɛ́nɛ́ɛ na gimmúmpúu, a bɛ́ɛmba mɔ́ɔnyɔ a bánonamɔ́ odɛ́má,

⁹bííŋénéelú sulubutu naá Nogálɔ ná mammana nɔ́ɔnɔ bá mbaá mo dúfényée. Gɔ́ɔ a gaá ná bɛáa bogaaga bá go gíndenye basɔ́gɔ́ɔ naá gɛnɔ́gɔ́ gá kúunenye, a dúfie báaba bá lɔ́mɔ́ bá dɛ lɛ́gálɛ́gáa go ɔ́bɔ go goŋaá bɔ́ɔ bá lɔ́mɔ́ na gɛoba[2].

¹⁰Ɛɛ́ɛŋ, belelí odóɛ bá dómba naá kadɛ́gadɛ́ɛ ya Beyúdene báaba bó olimonyomú Asaŋa, bɔ́ɔ bá lɔ́mɔ́ na dogálɔ dá kanɛ kɔ́ɔ na mebelébélíe.

¹¹Bá háanana go bó buige eŋgúdé, goakɛ́ bá bueŋenye ncíbo sá batɔ, bá bó húunenye moóma mɔ́ɔmɔ mó lɔ́mɔ́ mó do háánánáa go go bó nyɛ́ɛna go nobóda ná odóɛ gonóa.

¹²Ummue mɔ́ɔnyɔ naá bɔ́ɔ, ugélí babɔ́ moatɛ́ moatɛ, a mba gálɛ́dá a amɔ́: «Bɛɛnyɔ́ɔ batɔ bá Kɛlɛ́tɛ, no lɛ́ bɛcamɛna biimée baŋkanɔ́ŋkanɔ, bɛkándáa bá nnyama, banɔ́nɔ́nɔnɔ báaba bá lɔ́mɔ́ goana go manyáanya.»

¹³Ŋgoyáamɔ́ yɛhɛ́ yɛ́ɛyɛ ɛ lɛ́ mammana. Boóma moánɛ bɔ́ɔ o sɛmɛgananamɔ́ go bó gálɛda o súŋide busío, go goŋaá bá bɛa mammana ya gioliminyo,

¹⁴bá dɛ bííŋéné naá biidí bá kanɛ kɔ́ɔ bá Beyúdene, na naá bicele bá batɔ báaba bá béfíidenyemú mammana.

¹⁵Boóma buimée bó lɛ́ kanɛ biílo go báaba bá lɔ́mɔ́ kanɛ biílo. Kanɛ́ boóma bá kanɛ biílo bó do báá hɔ́ɔ go báaba bá lɔ́mɔ́ na biílo, bɔ́ɔ kanɛ gioliminyo, goakɛ́ nciŋí yabɔ́ na mbééníŋínyí ya odɛ́má yábɔ́ mó lɛ́ na biílo.

¹⁶Bó oya bá amɔ́ bɔ́ɔ bí íyimene Asaŋa, asáa gɔgɔ́ bá mo básáŋona naá meŋiigíe mábɔ́. Bá lɛ́ bɛbɛ́ bá batɔ, bá lala ɛdóɛ, kanɛ magɛ́nda má go ŋa boóma bá bese.