Read Nugunu Fɛlɛmɔ́ŋɔ 1 Bible Online

Fɛlɛmɔ́ŋɔ 1 - Nugunu bible

Fɛlɛmɔ́ŋɔ 1

¹Yɔmɔ́ɔ Póolo mɔ́ɔnyɔ naá ncíbo ya gɛaŋɔ́ go busío bá Yésu Kilítu, na Timotée, ondimóní bɛcɔ́, dɛ á go ɔ́ŋɛ́nɔ́ kálata yɛ́ɛyɛ. Maamɔ́ɔ Fɛlɛmɔ́ŋɔ, ondimóní bɛcɔ́ ba buelí mɔ́ɔnyɔ dɛ maamanamɔ́ makɔ́nɔ́,

²na Apɛa, ondimóní bɛcɔ́ ba okɔ́dɔ, na Elesípe, ondimóní bɛcɔ́ ba nɛnoa, na giimbó gá boolímínyí gɛ́ɛgɛ gɛ́ bábándamɔ́ naá mamɔ́ nnyaŋá,

³Ŋgáa Asaŋa Isée bɛcɔ́ na Daadáa Yésu Kilítu bá nyó boogo, bá nyó fáa buumbénú.

⁴Bɛcamɛna biimée bɛ́ɛbɛ mbósógolonyomú, ko béeniŋenye kunde páanana Asaŋa bamɛ bibéhiigí,

⁵ŋgɔ́bɔnɔ bó oya bá amɔ́ o maamana boolímínyí biimée, o gɔnɔ go olimonyo Daadáa Yésu Kilítu.

⁶Mbósógolonyo Asaŋa goŋaá gibénebiginye gɛ́ɛgɛ gɛ́ có ladamɔ́ naá gioliminyo nahɔ gɛ́ bíenye golɛnca gá besé iŋkimée yɛ́ɛyɛ dɛ bɛananamɔ́ naá gɛɔyɔ gɛ́cɔ́ naá boayá bá Kilítusu.

⁷Ondimóní bamɛ Fɛlɛmɔ́ŋɔ, mbɔ́dɔ yɛ́ɛyɛ o maamanamɔ́ boolímínyí ɛ lɛ́ páalú bɛyaŋa makɔ́nɔ́ na magɛ́nda, goakɛ́ go á bó gúlúmínyée naá gioliminyo.

⁸Boóma moánɛ bɔ́, akɛ́ aŋa ndɔ́mɔ́ na bufilíi buimée bá Kilítusu go páa, ko gaŋa goŋaá o ŋa boóma bɔ́ɔbɔ bó sɛmɛgananamɔ́,

⁹kanɛ́ cɛ gaá ŋaáa nɔ́ɔnɔ, tómbamɔ́ go lɛ́galɛga go go bósógolonyo go busío bá gɛnɔ́ɔ́nɛ́nɔ́. Naá mbɔ́dɔ yɛ́ɛyɛ ndɔ́mɔ́, yɔmɔ́ɔ Póolo, gilunú gá mɔtɔ, yɔmɔ́ɔ gɔnɔ́ naá ncíbo ya gɛaŋɔ́ go busío bá Yésu Kilítu,

¹⁰ko bósógolonyo go busío bá Onésime, moɔnɔ́ bamɛ ba gioliminyo mɔ́ɔnyɔ ndɔ́mɔ́ mo bíénéelú naá ncíbo ya gɛaŋɔ́.

¹¹Cóá, Onésime a dɛ á gá lɛ a go óhigonyo, kanɛ́ godɔ́ɔdɔ, a ná lɛ́ mɔ́ɔnyɔ a gaá ná go ohígínyóo, a ŋgóhiginyo tɔ́nɔ yɔmɔ́ɔ.

¹²Ŋgaá go mo gundínyée, akɛ́ aŋa a lɔ́mɔ́ gigísi gámɛ gá odɛ́má.

¹³Bó á lɛ bó nnɔ́ɔnɔnɔ goŋaá ndɔbɛnɔ nɛhɛ́ háalá gɛcamɛna gɛ́ɛgɛ ká lɔ́mɔ́ naá ncíbo ya gɛaŋɔ́ go busío bá Gɛnɔ́gɔ́ gá Cɔ́mɔ, a ŋgoyoyo naá undukí yáhɔ.

¹⁴Kanɛ́, cɛ á gá maamánáa go ŋa boóma bá nɔ́ɔnɔ kanɛ goŋaá dɛ á húmé ukelú. Cɛ lɛ́gálɛ́gáa goŋaá o ŋa besé naá gɛgaŋa; goana naá golɛ́galɛga gáhɔ.

¹⁵Gódaga, Onésime a lɔ́mɔ́ go úlúkínyéelú go moɔnɔ́ ba gɛcamɛna goŋaá a gɔnɔ nco gunde no bɛ́ɛmba nɛhɛ́ go busío buimée.

¹⁶Godɔ́ɔdɔ, a dɛ báá gɔnɔ́ goana gɛɔlɛ́, kanɛ́ bese makɔ́nɔ́ a dómba gɛɔlɛ́. A lɛ́ ondimóní bɛcɔ́ ba odɛ́má naá Kilítusu, dómbáa dómbáa go busío bámɛ, kanɛ́ cɛ ncó gɔnɔ go oya go busío báhɔ, mɔ́ɔ mɔtɔ, mɔ́ɔ gɔnɔ́ uŋgoolímínyí ba Kilítusu.

¹⁷Kanɛ́ aáŋa go íyimene goŋaá ndɛ́ ugúle bahɔ, mo gɔ́lɔ́ɔmɔ́ aŋa o lɔ́mɔ́ ba go kɔ́lɔ yɔmɔ́ɔ.

¹⁸Aáŋa a lɛ́ go ŋaáalú gɛbɛ́ gá boóma, ɛ́na lí, a go bɛananɛna boóma, o ŋgúhene yɔmɔ́ɔ.

¹⁹Na ombɔ́gɔ yámɛ moatɛ́ moatɛ gɔ́ɔ ko ɔ́ŋɛnɔmɔ́ caá: Yɔmɔ́ɔ Póolo, nná go bó gundinye. Kanɛ́ maamɔ́ɔ o do bófoolío goŋaá o mbɛananɛna tɔ́nɔ ufínó, ufínó moánɛ yó lɔ́mɔ́ maamɔ́ɔ moatɛ́.

²⁰Ɛɛ́ɛŋ, ondimóní bamɛ, ŋgaá go bósógólídío, ŋŋɛɛnáamɔ́ boóma bɔ́ɔbɔ ko úhenemú bɔ́ɔbɔ go gɛnɔ́ɔ́nɛ́nɔ́ gɛ́ɛgɛ naá Daadáa, o puugie odɛ́má naá Kilítusu.

²¹Naá gɛcamɛna gɛ́ɛgɛ ko ɔ́ŋɔnɔmɔ́, ŋgíyimene caá o gaá ŋaáa bɔ́ɔbɔ ko úhenemú. Kɔnɔ go íyimene caá o gaá ŋaáa bó dómba nɔ́ɔnɔ.

²²Naá gɛcamɛna gímmue eé gímmue, kedínyéemú nɛgɛlɛ́, goakɛ́ mbéeniŋenye goŋaá Asaŋa a nɔ́ ɔ́bɔ mbósógólí sɛ́nyɔ́ a ŋa goŋaá nco nyó huenye.

²³Ɛpafalásɛ, mɔ́ɔnyɔ dɛ lɔ́mɔ́ nɛhɛ́ naá ncíbo ya gɛaŋɔ́ go busío bá Yésu Kilítu, a á go bédíígényée.

²⁴Mélékusu, Alɛsɛtálakɛ, Dɛ́masɛ, na Lókasɛ, basɔ́gɔ́ɔ bámɛ bá buelí, bá á go bédíígényée tɔ́nɔ.

²⁵Ŋgáa niibo ná Daadáa Yésu Kilítu nɛ́ bɛ́ɛmba nɛnyɔ́.