Read Nugunu Behébelée 1 Bible Online

Behébelée 1 - Nugunu bible

Behébelée 1

¹Cóá cóá, Asaŋa a mba gálágáláa biisée bá biisée kɔ́nɔ́ɔ bɛ́cɔ́, ɛŋɛndɔ gɛca, mbɔ́dɔ mbɔ́dɔ gá mbúsí sɛ́hɛ́.

²Kanɛ́ godɔ́ɔdɔ, naá medúgú má mesúgidinye máama, Asaŋa a có gálagala gá Moɔnɔ́ bɛhɛ́. Tɔ́nɔ, gá Moɔnɔ́ bɛhɛ́, a báá gedíe moóma muimée[1], a báá mo dílímínyée ugíndéginde ba buimée.

³Bugúmigumi bá Asaŋa bó bonya naá mɔ́ɔ, a lɛ́ mammana púényí yɛhɛ́, gɛgaaga gɛ́hɛ́ gá Nogálɔ gɛ́ nona boóma buimée. Naá nnyimé ya go soga batɔ bɛlɔgɔ bábɔ́, gɔ́ɔ a mbɛɛ́ ɛ́dá lukumene naá mmoɛná, naá boayá bá ombɔ́gɔ onɔ́mɛ yá Asaŋa[2] mɔ́ɔnyɔ a gúmemú naá buimée.

⁴Moɔnɔ́ a mbɛ ɛ́yá gɛantáanta a báá dómbá bɛɛ́ŋgɛlɛsɛ. Gɔ́ɔ Asaŋa a mbaá mo fáá ufíno yɔ́ɔyɔ yó dómbanamɔ́ yábɔ́ ufíno.

⁵Asaŋa a gá báasa a dɛ oyáná akɛ́ ɛ́ŋgɛlɛsɛ ummue a amɔ́: «O lɛ́ Moɔnɔ́ bamɛ, ínoni yɛ́ɛyɛ ŋgɛɛ́ ɛ́yá tɛ́ɔ.» Gó gunde a gá báasa a dɛ gálɛ́dá go ɛ́ŋgɛlɛsɛ ummue a amɔ́: «Ka ŋgɛ ɛ́yá Isée, mɔ́ɔ ɛ ɛ́ya Moɔnɔ́ bamɛ[3].»

⁶Kanɛ́ naá gɛcamɛna gɛ́ɛgɛ Asaŋa a mbaá dómá Moɔnɔ́ bɛhɛ́ ba busío[4] naá cí, a mba gálɛ́dá a amɔ́: «Bɛɛ́ŋgɛlɛsɛ bá Asaŋa biimée bá háanana go mo búlugenye.»

⁷Naá boayá bá bɛɛ́ŋgɛlɛsɛ a báá gálɛ́dá a amɔ́: «Asaŋa i íyenye bɛɛ́ŋgɛlɛsɛ bɛ́hɛ́ ifufu, boyogóní bɛ́hɛ́ bɛlɛ́mbɛ bá íyuke[5].»

⁸Kanɛ́ go busío bá Moɔnɔ́, a báá gálɛ́dá a amɔ́: «Asaŋa, Oŋgɛ́yɔ́ yáhɔ yá bufuŋe yó lɛ́ dábɛ́gáalú kanɛ mmanɛ́náa. Go indenye gɛdɔŋɔ gáhɔ naá botɛ́nɛ́ɛ na gidímbo gá bufuŋe.

⁹O maamana bɔ́ɔbɔ bó lɔ́mɔ́ tɛ́nɛ́ɛ, o bɛlabɛla bobɛ́; boóma moánɛ bɔ́ Asaŋa oóo, Asaŋa bahɔ a mbaá go iyídé, a báá go fúé megúdé má bɛyaŋa go odóɛ, a báá go búlúgíe gó dómba báaba bóncodío.»

¹⁰Asaŋa go gɔnɔ gálɛda a amɔ́: «Maamɔ́ɔ mɔ́ɔ Daadáa, naá mabayɛga, o mbaá gedíe cí, mmoɛná ɛ lɔ́mɔ́ buelí bá ɛmbɔ́gɔ yahɔ.

¹¹Muimée mɔ́ɔmɔ mó ná yíme, kanɛ́ maamɔ́ɔ o lɛ́ hɔ́ɔ. Muimée mɔ́ɔmɔ mó ná lune aŋa gɛla.

¹²O ná mó máŋa, mó núgie aŋa gɛla. Kanɛ́ maamɔ́ɔ o lɛ́ gɔgɔ́ caŋa mmue, gɛɔyɔ gáhɔ kanɛ mmanɛ́náa[6].»

¹³Asaŋa a gá báasa a dɛ oyáná akɛ́ ɛ́ŋgɛlɛsɛ ummue a amɔ́: «Ncó lukumene boayá bá ombɔ́gɔ onɔ́mɛ yámɛ, gó ɛ́da go éme aŋa nná ŋamɔ́ goŋaá babɛlɔ́bɛlɔ báhɔ bɛ́ ɛ́ya gɛdálɛ́ná bɛgɔ́ndɔ́ báhɔ[7].»

¹⁴Bɛɛ́ŋgɛlɛsɛ bá lɔ́mɔ́ biliíli bɛ́ɛbɛ bɛ́ yɔgɔnɛnɔmɔ́ Asaŋa; a bɛ́ dómana go go óhigonyo báaba bá háananamɔ́ go dáŋaba gisódio.