Read Nugunu Behébelée 10 Bible Online

Behébelée 10 - Nugunu bible

Behébelée 10

¹Gicele gá Mɔ́sɛsɛ gɛ́ lɔ́mɔ́ goana gieninye gá moóma má besé mɔ́ɔmɔ má úlenemú, caá akɛ́ mammana ya mɔ́. Akɛ́ bɛbáágá bá manɔ́ŋɔ́ bɛ́ɛbɛ bedúmbí bɛbáágá naá Asaŋa bá fitefitiemú go fáanana, nnyómá iŋkimée kanɛ tɔmbɛ́nɔ́ɔ, aŋa gicele gɛ́ oyamɔ́, bɛ́ dɛ báá na bogaaga bá go ŋa goŋaá mɔtɔ a báyɛkɛna Asaŋa, a bɛ́ɛmba kanɛ biílo.

²Aáŋa bó mba lɛ́ nɔ́ɔnɔ, gásɛ́ gɛ́ mba lɛ́ ba go íyie batɔ kanɛ biílo naá boayá bá Asaŋa go oŋɛndɔ táŋɛ́ yúmmue, bá dɛ gɔnɔ́ béeniŋinye bɛlɔgɔ bábɔ́, bá dɔmbɔ go fáanana bɛbáágá bá manɔ́ŋɔ́ go busío buimée.

³Kanɛ́ gofáanana gá bɛbáágá bá manɔ́ŋɔ́ bɛ́ɛbɔ, gó mba lɛ́ gó ŋanana goŋaá batɔ bɛ́ ɛ́dana naá busío nnyómá iŋkimée, bá béeniŋenye bɛlɔgɔ bábɔ́.

⁴Bó do báá ba go báŋa go goŋaá manɔ́ŋɔ́ má bɛnɔ́mɛ bá gúlúge na má bibébí má úlie bɛlɔgɔ bá batɔ.

⁵Go busío moánɛ, gɔ́ɔ, Kilítusu go go úle naá cí, a mbaá gálɛ́dá a amɔ́: «O lɛ́ kanɛ go lɛ́ga bɛbáágá bá manɔ́ŋɔ́, akɛ́ bɛbáágá bá boóma búncodío, kanɛ́ o mba páá nnyɔ́dɔ.

⁶Nnyama sá go lókononyo na bɛbáágá bá manɔ́ŋɔ́ má go go fáanana go bɛlɔgɔ, mó lɛ́ kanɛ go go nɔ́ɔ.

⁷Gɔ́ɔ ndɔ́mɔ́ oyɛ́dáalú caá: “Yɔmɔ́ɔ mɔ́ɔnyɔ, goŋaá, go busío bámɛ moatɛ́, gɔ́ɔ bó lɔ́mɔ́ ɔ́ŋɔ́ɔlú naá kálata ya gicele náana: Asaŋa, ŋguú úlé go go ŋa ndɛ́ga yahɔ”.»

⁸A manɛ go oya daŋɛ́daŋɛ a amɔ́: «O do mbá lɛ́ga bɛbáágá bá manɔ́ŋɔ́, akɛ́ bɛbáágá, akɛ́ nnyama sá go lókononyo naá gɛdálɛ́ná, akɛ́ bɛbáágá bá manɔ́ŋɔ́ bá go fáanana go bɛlɔgɔ, mó lɛ́ kanɛ go go nɔ́ɔ.» Ŋgáa dɛ bélinciginye goŋaá bó lɔ́mɔ́ bɛbáágá bɛ́ɛbɛ gicele gɛ́ oyamɔ́.

⁹Gɔ́ɔ o oyɛdamɔ́ a amɔ́: «Yɔmɔ́ɔ mɔ́nyɔ́ɔ, ŋguú úlé go go nco ŋa ndɛ́ga yahɔ.» U ú úlíe bɛbáágá bá manɔ́ŋɔ́ bá busío, a báá hɛŋá na gɛ́ɛgɛ gɛ́hɛ́.

¹⁰Yésu Kilítu a mba hóógío ndɛ́ga ya Asaŋa; a báá bí íŋéné mɔ́ɔ moatɛ́ gémmue na gémmue go busío buimée, nɔ́ɔ gɔ́ɔ, dɛ lɔ́mɔ́ sogónáalú go gɛlɔgɔ.

¹¹Udúmbí bɛbáágá naá Asaŋa uŋkimée a dɛ́lɛmana miisí miimée go go hóogonyo buelí bɛ́hɛ́; a fáanana bɛcamɛna biimée bɛbáágá bímmue eé bímmue bɛ́ɛbɛ bɛ́ lɔ́mɔ́ kanɛ bogaaga bá go úlie bɛlɔgɔ[43].

¹²Kanɛ́ Kilítusu mɔ́ɔ a mba fáá gɛbáágá gá manɔ́ŋɔ́ táŋɛ́ gímmue, a báá lukúméné naá boayá bá ombɔ́gɔ onɔ́mɛ yá Asaŋa go busío buimée.

¹³Hɔ́ɔ háa a gɛ́ganamɔ́ goŋaá Asaŋa i íyie babɛlɔ́bɛlɔ bɛ́hɛ́ bɛdálɛ́ná bɛgɔ́ndɔ́ bɛ́hɛ́[44].

¹⁴Náana gɔ́ɔ, go gɛbáágá táŋɛ́ gímmue, a mbií íyíe bɛtɛ́nɛ́ɛ go busío buimée, biimée báaba a bó sogonamɔ́ gɛlɔgɔ.

¹⁵Gimmúmpúu gá Giliíli a có dúfenye nɔ́ɔnɔ; tɔ́nɔ a gálagala a amɔ́:

¹⁶«Daadáa a amɔ́, gɛlada bugúle gɛ́ɛgɛ nná gódamɔ́ nabɔ́ naá nnyimé ya medúgú moánɛ gɛ́ lɔ́mɔ́ náana; nná ága bicele bámɛ naá ɛdɛ́má yabɔ́, mbɛ́ dɛla naá muúne mábɔ́.

¹⁷Cɛ ŋgá gɔnɔ béeniŋinye bɛlɔgɔ bábɔ́ akɛ́ bɛoba bábɔ́[45].»

¹⁸Gɔ́ɔ, anáa bá báá ná manɛ́ go héehinye bɛlɔgɔ, bó do báá gɔnɔ́ na ndénégé go go fáa gɛbáágá go gɛlɔgɔ.

¹⁹Náana gɔ́ɔ bolimóní, dɛ sɛmamɔ́ odɛ́má go go íŋene naá Kɛ́gɛ́ná ya Asaŋa go manɔ́ŋɔ́ má Yésusu.

²⁰Dɛ bɛanana hɔ́ɔlɔ́ gɛpáa na gɛkɔ́sɔ gá pɛ́ gɛ́ɛgɛ a mbaá buuné naá sanda ya goodo, nɔ́ɔnɔ gó lɛ́ aá, go boɔtɔ bɛ́hɛ́.

²¹Dɛ bɛanana Ufuŋe yá udúmbí bɛbáágá naá Asaŋa, dílímínyéelú naá nnyaŋá ya Asaŋa.

²²Ŋgáa dɛ báyɛkɛna kanɛ́ Asaŋa na odɛ́má tɛ́nɛ́ɛ dácɛ na gioliminyo; odɛ́má sogónáalú go bɛbɛ́ bá mbééníŋínyí na nnyɔ́dɔ sogáalú na giseŋgélégédée gá miimpo[46].

²³Kanɛ go yoda bɛnamá, ŋgáa dɛ gumbene toodo odɛ́máa yɛ́ɛyɛ dɛ dúmenyemú, goakɛ́ Asaŋa a dɛ súgénée tánɔ sɛ́hɛ́.

²⁴Ŋgáa dɛ beŋine beŋine, dɛ bégúlumeninye naá gɛnɔ́ɔ́nɛ́nɔ́ na goŋanana gá bɛnɔ́gɔ́ bá moóma.

²⁵Dɛ dɛ fíídíe biimbó bɛ́cɔ́ nnyimé aŋa bóntió bá lɔ́mɔ́ gɔ́lɔ́ɔlú ndoŋá ya go ŋanana. Kanɛ́ ŋgáa dɛ ɛ́dana naá busío dɛ bégíndenye, dɛ ɛ́na goŋaá buisí bá mesúgidinye bó ná lɛ́ mekúígíi.

²⁶Ɛɛ́ɛŋ, dɛ amɔ́ dɛ dúmbenye na go lɔgɔ go ndɛ́ga yɛcɔ́ naá nnyimé ya go íyime mammana, gɛbáágá gá manɔ́ŋɔ́ gɛ́ dɛ báá hɔ́ɔ go go úlie bɛlɔgɔ.

²⁷Goana dɛ gɛ́ganamɔ́ na mayayɔ́ gosómba gá bɛsɛnɛ na gɛbɔlɔ́gɔdɔ gá íyuke gɛ́ɛgɛ gɛ́ háananamɔ́ go bogodonyo babɛlɔ́bɛlɔ bá Asaŋa.

²⁸Mɔtɔ a amɔ́ a báca gicele gá Mɔ́sɛsɛ, a háanana na nigúe kanɛ mahana, aáŋa batɔ báandɛ́ ɛ́na lí bádadɔ́, bó olimonyo goŋaá a lɛ́ na gɛoba[47].

²⁹No béeniŋenye no amɔ́, mɔtɔ mɔ́ɔnyɔ a fánɛna fanɛnamɔ́ Moɔnɔ́ bá Asaŋa, a dɛ hálámánánáa manɔ́ŋɔ́ má gɛlada bugúle máama má mbaá mo sogóná bɛlɔgɔ, a sɛga Gimmúmpúu gá Giliíli mɔ́ɔnyɔ a lɔ́mɔ́ mbɔ́gɔ́ ya niibo ná Asaŋa, no do ɛ́nánáa goŋaá a háanana na gɛantá gá gɛbɛ́ gá noséésényée gó dómba o?

³⁰Dɛ íyimene dɛ amɔ́ mɔ́ɔnyɔ a mbaá gálɛ́dá a amɔ́: «Yɔmɔ́ɔ mɔ́ɔ mbégundenyemú, yɔmɔ́ɔ páananamɔ́ onyɔ moánɛ bɔ́ɔbɔ a háananamɔ́ na bɔ́ɔ!» A mba gɔnɔ́ gálɛda a amɔ́: «Daadáa a ŋga sómbáa bɛsɛnɛ bá boɛ́nɔ bɛ́hɛ́[48].»

³¹Bó lɛ́ na mayayɔ́ makɔ́nɔ́ go go oba naá magálá má Asaŋa ogɔ́sɔ.

³²Bééníŋényéemú nɔnɔ aŋa no mbɔɔ́ ɔyɔ́ɔ naá mabayɛga. Naá medúgú moánɛ, aŋa no mbaá bɛáa gise gá Asaŋa, no mbɔɔ́ ɔ́bɛ́gɔ́nɔ́ɔ makɔ́nɔ́ na gɛlalaga gá nɛnoa.

³³Háalá, bá sɛga bá gunde bá míneminie báaba daŋɛ́daŋɛ, héení, no ɔ́bɛgɔnɔ olɔŋɔ na báaba bá mbaá lɔmɔ́ bá bó míneminie.

³⁴Mammana no mbɔ ɔ́bɛ́gɔ́nɔ́ɔ olɔŋɔ na báaba bá mbaá lɔmɔ́ naá ncíbo ya gɛaŋɔ́, no bɔ́ɔ́ ɔ́bɔ́nɔ́ɔ bese aŋa batɔ bá mbaá bɔgɔ́nɔ́ɔ moóma mɛ́nyɔ́, goakɛ́ no mba lɛ́ no íyimene goŋaá, no bɛanana gɛantáanta gá bonɔ́mɛ bá kanɛ mmanɛ́náa go busío buimée.

³⁵No do yímíe kanɛ́ toodo odɛ́máa yɛnyɔ́; naá yɛ́ gɔ́ɔ no ŋgaá bɛáa gɛantáanta gá bɛsoɛná.

³⁶No háanana go bágóɛga go go hóogonyo ndɛ́ga ya Asaŋa, nɔ́ɔnɔ no lɔ go bɛa bɔ́ɔbɔ a mbaá dáná.

³⁷Bó lɛ́ ɔ́ŋɔ́ɔlú goŋaá: «Asaŋa amɔ́: Gɔnɔ́ moɔnɔ́ ba gɛcamɛna sɔŋkɛdɛgɛdɛ, goana sɔŋkɛdɛgɛdɛ, mɔ́ɔnyɔ a mbaá lɔmɔ́ ba go úle, a guú úlé, a dɛ gaá gɛ́gáa go úle.

³⁸Mɔtɔ bamɛ ba gɛtɛ́nɛ́ɛ, go go ágana odɛ́má yɛ́hɛ́ naá yɔmɔ́ɔ, a ŋgɔ ɔyɔ́ɔ; kanɛ́ a amɔ́ a píidie nnyimé, cɛ ná gɔnɔ bɛa bɛyaŋa nɛhɛ́[49].»

³⁹Bɛɛcɔ́ɔ kanɛ́ dɛ dɛ báá batɔ bá go fíidie Asaŋa nnyimé goŋaá dɛ yíme, kanɛ́ dɛ lɔ́mɔ́ batɔ báaba dɛ olimonyomú goŋaá dɛ bɛa gisódio.