Read Nugunu Behébelée 11 Bible Online

Behébelée 11 - Nugunu bible

Behébelée 11

¹Gioliminyo gɛ́ lɔ́mɔ́ pɛ́ ya go bɛa boóma bɔ́ɔbɔ mɔtɔ a sɛmamɔ́ odɛ́má go bɔ́ɔ, gɛ́ lɛ́ tɔ́nɔ go íyime mammana ya bɔ́ɔbɔ bá lɔ́mɔ́ bá dɛ ɛ́nánáa.

²Go gioliminyo gábɔ́ gɔ́ɔ batɔ bá cóá bá mbaá fɛɛná Asaŋa.

³Go gioliminyo gɔ́ɔ dɛ íyimenemú goŋaá Asaŋa a mbaá gedíe mmoɛná na cí, na nogálɔ nɛ́hɛ́; mbɔ́dɔ ya goŋaá, bɔ́ɔbɔ bó ɛ́nɛganamɔ́, bó mba bégedíe na bɔ́ɔbɔ bó lɔ́mɔ́ bó do ɛ́nɛ́gánáa[50].

⁴Go gioliminyo gɔ́ɔ Ábɛlɛ a mbaá fáá Asaŋa gɛnɔ́gɔ́ gá gɛbáágá gɛ́ báá dómbá gɛ́ɛgɛ gá Kéyine. Go gɛ́ gɔ́ɔ, Asaŋa a mboó oyɛ́dá a amɔ́ a lɛ́ gɛtɛ́nɛ́ɛ ya mɔtɔ, goakɛ́ Asaŋa moatɛ́ a mbo olímínyóo pááná sɛ́hɛ́. Go gioliminyo gɔ́ɔ Ábɛlɛ a gá gálagalamɔ́, akɛ́ aŋa a mbaá gúé[51].

⁵Go gioliminyo gɔ́ɔ Ɛ́nɔgɔ a mbɛɛ́ ɛ́dá ogɔ́sɔ naá mmoɛná, a báá pambá go nigúe. Bá dɛ mbá gɔnɔ mo ɛ́na goŋaá Asaŋa a mba mo gɔ́lɔ́ naá boayá bɛ́hɛ́. Otóotoɛ, Ŋgɔ́ŋɛ́ sɛ́ mba dúfíe goŋaá Ɛ́nɔgɔ a mba fɛɛná Asaŋa[52].

⁶Kɔ́ɔ, kanɛ gioliminyo, mɔtɔ a dɛ bósó ba go fɛɛna Asaŋa. Mammana mɔ́ɔnyɔ a báyɛkanamɔ́ Asaŋa a háanana go oliminyo a amɔ́ a lɛ́ hɔ́ɔ, a soananɛna báaba bá mo fúmbemú.

⁷Go gioliminyo gɔ́ɔ, Nóe a mbɔɔ́ ɔ́bɔ́ bɔ́ɔbɔ Asaŋa a mbaá mo dóógínyóo; boóma bɔ́ɔbɔ bó mbaá ŋá bó gá lɛ́ bó do ɛ́nánɛ́náa. A bɔ́ɔ́ ɔ́bɛ́nɔ́ Asaŋa, a báá gedíe gilué gɛgɔ́nɔ́ go go sódio ncíbo yɛhɛ́ ya batɔ. Nɔ́ɔ gɔ́ɔ batɔ bá cí bá mbaá bɛáa noséésényée. Go gioliminyo gɛ́hɛ́ gɔ́ɔ Asaŋa a mbaá mo fáá bɛ́hɛ́ bodáŋɔ, a báá mo gɔ́lɔ́ aŋa gɛtɛ́nɛ́ɛ gá mɔtɔ[53].

⁸Go gioliminyo gɔ́ɔ, Ábalaháma a mbɔɔ́ ɔ́bɔ́ odɔ́ŋɛ́nɔ yá Asaŋa, a bɛ́ɛ́ ɛ́dá naá gɛdɔŋɔ gɛ́ɛgɛ gɛ́ mbaá lɔmɔ́ ba go ɔ́bɛnɔnɔ nɛhɛ́. A mba biené pɛ́, a dɛ íyímé anáa ɛ ɛ́danamɔ́.

⁹Go gioliminyo gɔ́ɔ, a mbɛɛ́ ɛ́dá lukumene aŋa uŋunyí naá cí yɛ́ɛyɛ bá mbaá mo dánɛ́ná. Bá mba lɛ́ bɔ́ ɔyɔ naá gincumu gábɔ́ olɔŋɔ na Ɛ́saga na Yɔ́kɔbɔ. Bɔ́ɔ tɔ́nɔ bá mba bɛáa tánɔ mmue eé mmue aŋa Ábalaháma[54].

¹⁰Ábalaháma a mba lɛ́ a gɛ́gana tɛ́sɔnɔ ya bɛlalaga bá mogoná yɛ́ɛyɛ Asaŋa moatɛ́ a mbaá lɛ ba go eninye a gunde a yɛ fóaga.

¹¹Go gioliminyo gɔ́ɔ, Sáála a mbaá bɛáa moɔnɔ́ naá bulunú bɛ́hɛ́, goakɛ́ a mba lɛ́ i íyimene goŋaá Asaŋa a dɛ súgénée tánɔ yɛhɛ́.

¹²Gó moánɛ, naá mɔtɔ táŋɛ́ ummue mɔ́ɔnyɔ a mbaá lɔmɔ́ a ná lɛ́ mekúígíi na nigúe, gɛcɛcá gɛ́ mbaá bébíénée aŋa muotóti mɔ́ɔmɔ naá mmoɛná, kanɛ ombanɔ aŋa ɛcánána hɛ́ɛhɛ naá boayá bá máŋɛ́[55].

¹³Naá gioliminyo gɔ́ɔ biimée bá mbaá gúénénée kanɛ go ɛ́na moóma mɔ́ɔmɔ Asaŋa a mbaá dánáa; kanɛ́ naá gioliminyo, bá mba mó ɛ́ná, bá báá mó békelényée halaháláa, bɛ́ ɛ́da bó oya bá amɔ́, bá lɛ́ biinyí gɔnɔ́ basalɔsálɔ́ɔ naá cí[56].

¹⁴Báaba bá gálagalamɔ́ náana, bá dúfenye dalaŋanyɛ goŋaá bá lɛ́ naá gofúmbe gá gɛdɔŋɔ.

¹⁵Aáŋa bá mba lɛ́ bá béeniŋenye gɛdɔŋɔ gɛ́ɛgɛ bá mbuú úlúkíe hɔ́ɔ, gásɛ́ bá mba bɛáa pɛ́ ya go gunde hɔ́ɔ.

¹⁶Mammana, bá mba lɛ́ bá lɛ́galɛga gɛmánya gá gɛdɔŋɔ, nɔ́ɔnɔ gó lɛ́ aá, gɛdɔŋɔ gá mmoɛná. Gó moánɛ Asaŋa a lɔ́mɔ́ a dɛ nóánánáa odóɛ goŋaá bá mo fínenye bá amɔ́, Asaŋa babɔ́; mammana, a lɛ́ bó fóágɛ́náalú tɛ́sɔnɔ.

¹⁷Go gioliminyo gɔ́ɔ, Ábalaháma a mbií íŋéné Ɛ́saga go gɛbáágá aŋa Asaŋa a mbaá mo gogóná. A bíí íŋéné gimmuée gɛ́hɛ́ gá moɔnɔ́, asáa gɔgɔ́, mɔ́ɔ a báa go bɛa tánɔ

¹⁸yɛ́ɛyɛ Asaŋa a mba mo oyáná a amɔ́: «Na Ɛ́saga gɔ́ɔ, o ŋgaá bɛáa ɛnana yɛ́ɛyɛ mmbaá go dánɛ́ná[57].»

¹⁹Ábalaháma a mba bééníŋínyée a amɔ́ Asaŋa a bɛanana bogaaga bá go fúfune Ɛ́saga naá begúe; gó moánɛ Asaŋa a mbaá mo gundínyée moɔnɔ́ bɛhɛ́ aŋa ɛ ɛ́ ɛ́dá go úle naá begúe.

²⁰Go gioliminyo gɔ́ɔ Ɛ́saga a mbaá fáá Yɔ́kɔbɔ na Eseyúu gɛfona go medúgú má go ɛ́da go úle.

²¹Go gioliminyo gɔ́ɔ Yɔ́kɔbɔ a mbaá foná baaná bá Yósɛbɛ, a ná lɛ́ mekúígíi na nigúe. A báá bédímbígéné gidímbo gɛ́hɛ́, a báá búlúgényée Asaŋa[58].

²²Go gioliminyo gɔ́ɔ Yósɛbɛ, a ná lɛ́ ba go gúe, a mboó oyáná baaná bá Ɛ́sɛlahɛ́ɛlɛ a amɔ́ bá ná húme naá Egíbítene. A báá bó oyáná aŋa bá ná ŋamɔ́ na gigúe gɛ́hɛ́[59].

²³Go gioliminyo gɔ́ɔ bebíéní bá Mɔ́sɛsɛ bá mbaá mo ɔsɛ́gɔ́ ɛfɛ́ ɛdadɔ́ naá gobébíene gɛ́hɛ́; bá bɛ́ɛ́ ɛ́ná goŋaá a lɛ́ gɛnɔ́gɔ́ gá moádɔmbɔ́, bá báá ŋaáa ufuŋe ogɔ́nɔ́ edúu kanɛ bofoá.

²⁴Go gioliminyo gɔ́ɔ Mɔ́sɛsɛ a mbaá básáŋóná goŋaá bá dɛ mo dɔ́ŋɛ́nɔ́ bá amɔ́, ohaŋa ba ombóla ba Falaɔ́ŋɔ, aŋa a mbaá gomá[60].

²⁵A bóó olímínyóo goŋaá bá mo séesenye olɔŋɔ na boɛ́nɔ bá Asaŋa, go dómba goŋaá a békelenye go moɔnɔ́ ba gɛcamɛna naá gɛlɔgɔ.

²⁶A báá gɔ́lɔ́ ibésiisie há Kilítusu aŋa gɛantáanta gá bonɔ́mɛ gɛ́ɛgɛ gɛ́ dómbanamɔ́ bɔ́ɔbɔ bá Egíbítene, goakɛ́ a mba lɛ́ oŋgíso naá bɛsoɛná bɛ́ɛbɛ bɛ́ úlenemú.

²⁷Go gioliminyo gɔ́ɔ Mɔ́sɛsɛ a mbuú úlúkíe naá Egíbítene kanɛ go díine mpímí ya ufuŋe ogɔ́nɔ́; a báá lɔbɛ́nɔ́ tɛ́ŋɛ́tɛŋɛ aŋa a núune Asaŋa mɔ́ɔnyɔ bá lɔ́mɔ́ bá dɛ ɛ́nánáa.

²⁸Go gioliminyo gɔ́ɔ a mbaá leebíe gibíné gá Pásɛ́ka ya Beyúdene, a bóo oyáná baaná bá Ɛ́sɛlahɛ́ɛlɛ a amɔ́ bá fúenene manɔ́ŋɔ́ naá ɛfɔ́dɔ ya nnyaŋá, goŋaá ɛ́ŋgɛlɛsɛ ba púugie a dɛ óná baaná bá busío bá Ɛ́sɛlahɛ́ɛlɛ.

²⁹Go gioliminyo gɔ́ɔ baaná bá Ɛ́sɛlahɛ́ɛlɛ bá mbaá bácaáa máŋɛ́ má goɛ́la aŋa bó mba lɛ́ cí ya kótáŋɛ́kotaŋɛ. Kanɛ́ aŋa batɔ bá Egíbítene bá mbaá íŋéné go go báca tɔ́nɔ, miimpo má báá bó mɛná[61].

³⁰Go gioliminyo gɔ́ɔ ɛmɛndɛ́ ya Yelíko ɛ mbaá gadɛ́gá, naá nnyimé ya baaná bá Ɛ́sɛlahɛ́ɛlɛ go yɛ bótíolidio medúgú mátáanɔ na máandɛ́.

³¹Go gioliminyo gɔ́ɔ odáŋadaŋa ba okɔ́dɔ Aláhaba a mbaá pambá goŋaá a dɛ gúe olɔŋɔ na batɔ báaba bá mbaá bááŋɛ́gá Asaŋa, goakɛ́ a mba gɔ́lɔ́ batɔ bá mbédémbí bese[62].

³²Kaá ná gɔnɔ́ go oyɛda ŋkádɛ? Gɛcamɛna gɛ́ gaá mbɛ́ɛ́mbɛ́ná sɔŋɛ go go gálagala go búmmue go búmmue moóma mɔ́ɔmɔ mó núunemú Sɛdɛyɔ́ŋɔ, Bálaga, Sámásɔnɛ, Yefetée, Défidi, Sémuele na mbúsí sá Asaŋa[63].

³³Bɔ́ɔ báaba go gioliminyo gábɔ́, bá mbaá mánɛ́gánáa bɛdɔŋɔ, bá báá ŋanánáa bɔ́ɔbɔ bó lɔ́mɔ́ tɛ́nɛ́ɛ, bá báá bɛáa bɔ́ɔbɔ Asaŋa a mbaá dáná, bá báá buigénée eŋgúdé yá ŋgoyóŋo.

³⁴Bá báá fúénénée bogaaga bá íyuke, bá báá sódógánáa nigúe ná kalafɔ, bá báá bégúlíményée naá nnyimé ya go nóma, bá báá bɛ́ɛ́mbá bɛyágáyága naá bidé, bá báá gúnée bedéede bá bámɛɛ́nɔ.

³⁵Go gioliminyo gɔ́ɔ bakɔ́dɔ bá mbɛɛ́ ɛ́ná begúe bábɔ́ bá fúfugene, bá báá ncó bó gundene. Kanɛ́ batɔ bóntió bá báá bɛáa noséésényée, bá bíí inyé goŋaá bá bó dúgune, go goŋaá bá fúfugene bá bɛa gɛnɔ́gɔ́ gá gɛɔyɔ[64].

³⁶Bóncodío bá báá bó fánɛ́náfánɛ́náa, bá báá bó gidée bɛságɔ; bá báá gódáa báaba iŋgolí, bá bó nɔɔnɔnɔ naá ncíbo ya gɛaŋɔ́.

³⁷Bá báá bó ónáa na adánɛ́, bá báá bó sómbáa na musiige; bá báá bó ónáa na kalafɔ. Boolímínyí bóncodío bá daladala na bɛla bá bɛɔbɔ bá bɛdómbáa ɛ́na lí bá mbúnyi; babɛlɔ́bɛlɔ bábɔ́ bá báá bó legé buimée, bá báá bó fáánánáa noséésényée na gɛgáda giimée[65].

³⁸Batɔ bá cí yɛ́ɛyɛ bá dɛ mbá lɛ naá olɔŋɔ yábɔ́; bɔ́ɔ báaba bá mbaá lɔmɔ́ bá daladala go biolóo bá madɛ́agadɛ́ na naá ɛgɔndɔ, bɔ́ ɔyɔ naá bikeŋgúlu na naá ambɛ́lá.

³⁹Bɔ́ɔ biimée, bá báá fɛɛná Asaŋa go gioliminyo gábɔ́, kanɛ́ bá lɛ́ kanɛ go bɛa bɔ́ɔbɔ Asaŋa a mbaá dáná.

⁴⁰Mammana Asaŋa a mba kɛsɛ́dá go busío bɛ́cɔ́ moóma má bese mó dómba; boóma moánɛ bɔ́ɔ, a mbaá lɔmɔ́ a dɛ lɛ́gá goŋaá bɔ́ɔ bɛ́ ɛ́da bola naá gobóhóogio gá mɔ́ kanɛ bɛɛcɔ́ɔ.