Read Nugunu Behébelée 12 Bible Online

Behébelée 12 - Nugunu bible

Behébelée 12

¹Kanɛ́ naá boayá bɛ́cɔ́, dɛ lɛ́ géŋgélídíelú na gitúu gá ŋgominyo[66] naá gioliminyo. Ŋgáa dɛ búumbene buimée bɔ́ɔbɔ bó gundenyemú odɛ́dá yɛ́cɔ́ gilúututu, dómbá dómbáa gɛlɔgɔ gɛ́ɛgɛ gɛ́ có bánábɛganamɔ́ fɛaŋɔ fɛaŋɔ, dɛ díine aŋa gó háananamɔ́ kanɛ gɛdɔmbɔ.

²Ŋgáa dɛ ága oŋgíso naá Yésusu mɔ́ɔnyɔ a lɔ́mɔ́ mbɔ́gɔ́ ya gioliminyo gɛ́cɔ́ naá gobayɛga na naá mesúge. A mbo olímínyóo go gúe naá kolósi, kanɛ go nóa odóɛ go mbɔ́dɔ ya nigúe aŋa yɛ́ɛyɛ náana, goakɛ́, a mba lɛ́ a núune bɛyaŋa bɛ́ɛbɛ bɛ́ mbaá lɛ bɛ́dɛ́gɛ́náalú go busío bɛ́hɛ́; godɔ́ɔdɔ a lɛ́ ndukíi naá boayá bá ombɔ́gɔ onɔ́mɛ bá oŋgɛ́yɔ́ yá Asaŋa.

³Bééníŋényéemú nɔnɔ mbɔ́dɔ yɛ́ɛyɛ Yésusu a mbaá gɛ́ndɛ́gɛ́ná gobáaŋɛga gá bologílógí, go goŋaá no do sɛmbɛ́lɛ́dá, no oba bɛnamá.

⁴Naá gonuigenye gɛ́nyɔ́ gá gɛlɔgɔ, no gá lɛ́ no do nuigényée gó ɛ́da húme naá nigúe.

⁵No lɛ́ bófoolíolú dogálɔ dɔ́ɔdɔ Asaŋa a mbaá nyó téndényée na dɔ́ aŋa baaná a amɔ́: «Moɔnɔ́ bamɛ, bébeŋéemú o do fánɛ́ná noséésényée nɔ́ɔnɔ Daadáa a go fáamɔ́. O do sɛmbɛ́lɛ́dá bɛnamá gɔ́ɔgɔ a go goomɛnamɔ́.

⁶Mammana, Daadáa a séesenye mɔ́ɔnyɔ a maamanamɔ́, a gide mɔ́ɔnyɔ a lɛncanamɔ́ a amɔ́, a lɛ́ moɔnɔ́ bɛhɛ́[67].»

⁷Kéléméne nɔnɔ noséésényée nɔ́ɔnɔ Asaŋa a nyó fáananamɔ́. A nyó ŋananamɔ́ nɔ́ɔnɔ goŋaá a nyó gɔ́lɔnɔ aŋa baaná bɛ́hɛ́. Moɔnɔ́ a lɛ́ hɔ́ɔ mɔ́ɔnyɔ isée a lɔ́mɔ́ a dɛ gidée lí?

⁸Aáŋa Asaŋa a dɛ nyó gidée aŋa baaná bɛ́hɛ́ biimée, hɔ́ɔlɔ́ gó lɛ́ aá, no do báá baaná bɛ́hɛ́ bá cumu.

⁹Dɛ mba bɛáa biisée naá cí háalá, bá có gide, dɛ bó hálamanana. Nɛɛ́nɛ kanɛ́ dɛ lɔ́mɔ́ dɛ dɛ bósó ba go hálamanana Asaŋa Baaba bɛcɔ́ goŋaá dɛ bɛa gɛɔyɔ?

¹⁰Biisée bɛ́cɔ́ bá mba lɛ́ bá có gide go moɔnɔ́ ba gɛcamɛna, aŋa bá mbaá lɔmɔ́ bá lɛ́galɛga. Kanɛ́ Asaŋa a có gide go besé yɛcɔ́, goŋaá dɛ bɛa bodáŋɔ naá bummúmpúu bɛ́hɛ́.

¹¹Gɛcamɛna gɛ́ɛgɛ bá gidemú mɔtɔ, a súŋe busío, a dɛ báá na bɛyaŋa. Kanɛ́ naá nnyimé ya manoa mɔ́ɔmɔ, a lɛ go bɛa nciŋí, ɛ ɛ́da go ɔyɔ naá buumbénú na naá botɛ́nɛ́ɛ aŋa Asaŋa a lɛ́galɛgamɔ́.

¹²Go busío moánɛ, gaanónáa nɔnɔ ɛmbɔ́gɔ yɛnyɔ́ yɛ́ɛyɛ ɛ dugenemú, no gíndie enúu yɛ́nyɔ́ yáaya yá lɔ́mɔ́ kanɛ bogaaga.

¹³Ŋgáa bɛgɔ́ndɔ́ bɛ́nyɔ́ bɛ́ ɛnda naá pɛ́ sá tɛ́nɛ́ɛ[68], goŋaá mɔ́ɔnyɔ a cɔndɔmɔ́, a dɛ béyigídé, e éŋuge goana.

¹⁴Fúúmbée nɔnɔ go ɔyɔ naá buumbénú na mɔtɔ uŋkimée, no ɔyɔ naá bummúmpúu; aáŋa caá nɔ́ɔnɔ, akɛ́ mɔtɔ ummue naá bɛɛnyɔ́ɔ a dɛ ŋgɛ́ ɛ́na Daadáa.

¹⁵Bébeŋéemú nɔnɔ, mɔtɔ a dɛ hóámá a dɛ inyé niibo ná Asaŋa. Ɛmaŋa ndule hɛ́ dɛ íŋéné naá kadɛ́gadɛ́ɛ yɛnyɔ́ go go lɔgɔ giimbó gɛ́nyɔ́[69].

¹⁶Bébeŋéemú nɔnɔ goŋaá, akɛ́ ummue naá bɛɛnyɔ́ɔ a dɛ ɔyɔ́ɔ gɛɔyɔ gá hanyɔ́, a dɛ fánɛ́ná moóma má Asaŋa aŋa Eseyúu mɔ́ɔnyɔ a mbaá dúé odɛ́nɛ́ yɛ́hɛ́ yá moɔnɔ́ ogɔ́nɔ́ go manyáanya.

¹⁷Naá nnyimé, bá mba mo dóŋóná, gɛcamɛna gɛ́ɛgɛ a mbaá lɛ́gá go bɛa gɛfona gá isée; pɛ́ ya go núgie odɛ́nɛ́ yɛ́hɛ́ ɛ dɛ mbáa lɛ gɔnɔ́ hɔ́ɔ, akɛ́ aŋa a mbaá gɛ́ fúmbée na biósino[70].

¹⁸No lɛ́ kanɛ go báyɛkɛna boóma bɔ́ɔbɔ bá báláfamɔ́ aŋa ogɔndɔ, gɛgɔnyɛgɔnyɛ gá íyuke, duílilíe, mbíno na puŋe,

¹⁹goómba gá cɛ́bá na biuŋgúlú bá dogálɔ; báaba bá mbaá lɔmɔ́ bá bódólonyo go úhune goŋaá bá dɛ gɔnɔ́ bó gídene nogálɔ[71].

²⁰Mammana, bá dɛ mbáa lɛ ba go hóda gɛlɔsɛnɔ gɛ́ɛgɛ: «Mɔtɔ mɔ́ɔnyɔ a gaá ná báláfɛ́ná ogɔndɔ, akɛ́ bó bɛ́ɛmba nnyama, bó óna na adánɛ́.»

²¹Boóma bɔ́ɔbɔ bá mbaá lɔmɔ́ bá núune, bó mba bó gólío bofoá, gɔ́ɔ Mɔ́sɛsɛ a mbaá gálɛ́dá a amɔ́: «Ndɛ́ na bofoá, ŋgɛ́da ndíŋimene[72].»

²²Kanɛ́ no lɛ́ báyɛkɛ́náalú ogɔndɔ yá Síyono na naá tɛ́sɔnɔ ya Asaŋa ogɔ́sɔ, Yolósalɛmɛ ba mmoɛná anáa bitúu bitúu bá bɛɛ́ŋgɛlɛsɛ bɛ́ lɔ́mɔ́ go nɛganda ná go gedegedie gibíné.

²³No lɛ́ báyɛkɛ́náalú giimbó gá baaná bá busío go bébíene, báaba ifíno yabɔ́ ɛ lɔ́mɔ́ ɔ́ŋɔ́ɔlú naá mmoɛná. No báá báyɛkɛ́ná Asaŋa, usúmbí bɛsɛnɛ ba cí iŋkimée. No báá báyɛkɛ́ná bɛtɛ́nɛ́ɛ bá batɔ bɛ́ɛbɛ bɛ́ lɔ́mɔ́ ɛ́yáalú mammana.

²⁴No báá báyɛkɛ́ná Yésusu, mɔ́ɔnyɔ a lɔ́mɔ́ menebíe má gɛpáa gá gɛlada bugúle, na manɔ́ŋɔ́ mɛ́hɛ́ máama a mbuú udé, má lɔ́mɔ́ na bogaaga má dómbana má Ábɛlɛ[73].

²⁵Bébeŋéemú nɔnɔ kanɛ́ goŋaá no do inyé go ɔ́bɔ mɔ́ɔnyɔ a nyó gálagalamɔ́. Aáŋa báaba bá mbií inyé go ɔ́bɔ mɔ́ɔnyɔ a mbaá lɔmɔ́ a bó dóogoninyo naá cí[74], bá dɛ mbá pamba, nɛɛ́nɛ kanɛ́ bɛɛcɔ́ɔ dɛ lɔ́mɔ́ bá go pamba dɛ amɔ́ dɛ inye go ɔ́bɔ mɔ́ɔnyɔ a có gálagalamɔ́ naá mmoɛná gúunú o?

²⁶Mɔ́ɔ mɔ́ɔnyɔ ukelú yɛ́hɛ́ yó mbaá yiŋkímídíe cí cóá, ínoni, a á có fáá tánɔ yɛ́ɛyɛ a amɔ́: «Oŋɛndɔ yúmmue go mesúgudinye, nná yiŋkimidie caá akɛ́ goana cí, kanɛ́ tɔ́nɔ na mmoɛná kɛ́[75].»

²⁷Dogálɔ dɔ́ɔdɔ «oŋɛndɔ yúmmue go mesúgudinye» dó dúfenye dó amɔ́ Asaŋa a ŋga yiŋkímídíe moóma muimée mɔ́ɔmɔ a mbaá gedíe mó ságɛna, go goŋaá bɔ́ɔbɔ bó lɔ́mɔ́ bó do bɛ́ɛ́mbá bá go gadɛga bó gɛ́ga bɛcamɛna biimée.

²⁸Aŋa dɛ gɛ́ndɛganamɔ́ bufuŋe bɔ́ɔbɔ bó lɔ́mɔ́ kanɛ kélídínyée, ŋgáa dɛ nona niibo naá Asaŋa, dɛ mo búlugenye naá mbɔ́dɔ yɛ́ɛyɛ ɛ mo fɛɛnanɛnamɔ́, na ibésiisie na gohálamanana.

²⁹Mammana Asaŋa bɛcɔ́ a lɛ́ aŋa íyuke hɛ́ɛhɛ hɛ́ bogodonyomú[76].