Read Nugunu Behébelée 13 Bible Online

Behébelée 13 - Nugunu bible

Behébelée 13

¹Ɛ́dánáa nɔnɔ naá busío no maamanɛna aŋa naá bulimóní.

²No do bófoolío go gɛ́ndɛgɛna biinyí báaba bá bolanamɔ́ naá bɛɛnyɔ́ɔ bese, goakɛ́ naá goŋanana nɔ́ɔnɔ, bóncodío, naá kanɛ goíyime, bá mba gɛ́ndɛ́gánáa bɛɛ́ŋgɛlɛsɛ[77].

³Ŋgáa odɛ́má yɛ́nyɔ́ yó bɛ́ɛmba na báaba bá lɔ́mɔ́ naá ncíbo ya gɛaŋɔ́, caŋa mmue aŋa no lɛ́ olɔŋɔ nabɔ́ naá ncíbo ya gɛaŋɔ́. Bɛ́ɛ́mba nɔnɔ odɛ́má naá biimée báaba bá bó míneminiemú, goŋaá bɛɛnyɔ́ɔ tɔ́nɔ no bɛanana nnyɔ́dɔ yɛ́ɛyɛ ɛ lɔ́mɔ́ ba go ɔ́bɛgɔnɔ.

⁴Ŋgáa mɔtɔ uŋkimée a beŋe gicele gá nɛbáná. Onɔ́mɔtɔ́ na okɔ́dɔ bá bɛ́ɛmba na pídefide naá bɔ́ɔ báandɛ́, goakɛ́ batɔ bá gɛɔyɔ gá hanyɔ́ na badáŋadaŋa bá ŋga bɛáa noséésényée naá Asaŋa.

⁵No do ágáa gɛdɛ́mádɛ́má naá muinyí, kanɛ́ ɔ́bɔ́nɔ́ɔ nɔnɔ bese na bɔ́ɔbɔ no bɛananamɔ́, goakɛ́ Daadáa moatɛ́ o oyamɔ́ a amɔ́: «Cɛ ná bóso go go dɛ́ɛna, cɛ́ ná bóso go go fíidie nnyimé akɛ́ go buisí[78].»

⁶Go busío moánɛ gɔ́ɔ dɛ lɔ́mɔ́ ba go oyɛda na toodo odɛ́máa iŋkimée dɛ amɔ́: «Daadáa a lɛ́ mɔ́ɔnyɔ u úlenemú naá gidúgune gámɛ, cɛ báá bofoá na boóma. Mɔtɔ a dɛ báá ba go ŋa boóma namɛ[79].»

⁷No do bófoolío bogógí ɛlɔŋɔ bɛ́nyɔ́; bɔ́ɔ báaba bá mbaá nyó dúmbénínyée nogálɔ ná Asaŋa. No do bófoolío mbɔ́dɔ yɛ́ɛyɛ bɔ́ɔ bá mbɔɔ́ ɔyɔ́ɔ, bá báá gɔnɔ́ gúenene; no bɛa gioliminyo gɛ́ béeniŋinye gɛ́ɛgɛ gábɔ́.

⁸Yésu Kilítu a lɛ́ ummue eé ummue iyó, na ínoni; a ná bɛ́ɛmba nɔ́ɔnɔ go bɛcamɛna biimée.

⁹No do bádɛ́ɛ́ná, bá dɛ nyó neníe na kúunye sá go ɛ́da go úle akɛ́ áhanɛ́ɛ. Bó lɛ́ bese niibo ná Asaŋa nɛ́ gíndie odɛ́má yɛ́nyɔ́, gó dómba bɛlɔsɛnɔ bá goŋaá o do nyáá gɛnáa, o do nyáá gɛnáa. Báaba bá ŋananamɔ́ nɔ́ɔnɔ, bá gá báasa bá dɛ dáŋábá besé kɔ́ɔ[80].

¹⁰Bɛɛcɔ́ɔ dɛ bɛanana gɛ́cɔ́ gɛdálɛ́ná bɛbáágá. Bedúmbí bɛbáágá naá Asaŋa báaba bá yɔgɔnɔmɔ́ naá kɛ́gɛ́ná ya Asaŋa, bá dɛ bɛanánáa bogaaga bá go nyáa bɔ́ɔbɔ bɔ́ lɔ́mɔ́ kɔ́ɔ.

¹¹Udúmbí bɛbáágá ba ogɔ́nɔ́ naá Asaŋa a mba lɛ́ a nco kasana manɔ́ŋɔ́ má nnyama naá Mammana ya Gimmúmpúu gá Hoóma go go úlie bɛlɔgɔ; kanɛ́ bá mba lɛ́ bɛ́ ɛ́da lókononyo nnyama moánɛ halaháláa na nnyaŋá[81].

¹²Boóma moánɛ bɔ́ Yésusu a mbaá gúé halaháláa na tɛ́sɔnɔ[82]. Bó mbaá lɛ go go úlie bɛlɔgɔ bá boɛ́nɔ na manɔ́ŋɔ́ mɛ́hɛ́ má moatɛ́ moatɛ.

¹³Ŋgáa dɛ no ɛ́da kanɛ́ giluméní nɛhɛ́ halaháláa na tɛ́sɔnɔ, dɛ bádóɛgɛna dofáná dúmmue eé dúmmue aŋa mɔ́ɔ.

¹⁴Naá cí háalá, dɛ dɛ bɛanánáa tɛ́sɔnɔ ya busío buimée, kanɛ́, dɛ fúmbemú tɛ́sɔnɔ ya nembeli.

¹⁵Go ufíno yá Yésusu, ŋgáa dɛ no fáa Asaŋa kanɛ tɔmbɛ́nɔ́ɔ, mbúlugie yɛ́ɛyɛ ɛ lɔ́mɔ́ aŋa gɛbáágá gɛ́cɔ́ gɛ́ɛgɛ gɛ́ dúfenyemú goŋaá dɛ leebenye ufíno yɛ́hɛ́.

¹⁶No do inyé go ŋanana besé na go óhigoninyo; mbɔ́dɔ sá bɛbáágá sɛ́ɛsɔ sɛ́ sɛ́ fɛɛnanɛnamɔ́ Asaŋa.

¹⁷Ɔ́bɛ́nɔ́nɔ́ɔ nɔnɔ bogógí ɛlɔŋɔ bɛ́nyɔ́, no ŋanana buimée bɔ́ɔbɔ bá nyó oyanɛnamɔ́; bɔ́ɔ moatɛ́ báa bá beŋebeŋemú biliíli bɛ́nyɔ́, bá ŋgo oyánɛ́náa Asaŋa buelí bɔ́ɔbɔ bá á ná yɔgɔ́nɔ́ɔ. Bó óhígínyóomú nɔnɔ goŋaá bá yɔgɔnɔ buelí bábɔ́ na bɛyaŋa, kanɛ makánya naá odɛ́má; hɔ́ɔlɔ́ gɔ́ɔ no ŋgɛɛ́ ɛ́ná bese.

¹⁸Ɛ́dánáa nɔnɔ naá busío no bósógolonyo go busío bɛ́cɔ́, goakɛ́ odɛ́má yɛ́cɔ́ yó do có goománɛ́náa; goŋaá dɛ lɛ́galɛga go ɔyɔ bese naá pɛ́ iŋkimée.

¹⁹Nnyó ɔŋɔnɔ goŋaá no bósógolonyo makɔ́nɔ́ go busío bámɛ, goŋaá Asaŋa a páa bogaaga bá go nco nyó gundine fɛaŋɔ[83].

²⁰Ŋgáa Asaŋa ba buumbénú mɔ́ɔnyɔ a mbaá fúfúné Daadáa bɛcɔ́ Yésu Kilítu, gɛantáanta gá umbeŋíbéŋí bɛdómbáa naá kadɛ́gadɛ́ɛ ya begúe, go bogaaga bá gɛbáágá gá manɔ́ŋɔ́ mɛ́hɛ́ má gɛlada bugúle bá kanɛ mmanɛ́náa,

²¹a nyó fáa bogaaga bá go ŋanana buimée bɔ́ɔbɔ bó lɔ́mɔ́ bese go go ŋanana ndɛ́ga yɛhɛ́; ŋgáa a hóogio naá bɛɛcɔ́ɔ gá Yésu Kilítu, bɔ́ɔbɔ bó mo fɛɛnanɛnamɔ́. Nigúmi nɛ́ bɛ́ɛmba nɛhɛ́ go bɛcamɛna biimée. Aamɛnɛ.

²²Bolimóní, ŋgaá nyó úhúné goŋaá, no gɛ́ndɛgɛna dogálɔ dá kúluminye dɔ́ɔdɔ na kumbene odɛ́máa. Moatɛ́, kálata yɛ́ɛyɛ nnyó ɔ́ŋɛnɔmɔ́ yɛ́ɛyɛ ɛ dɛ ɔmpɔ́ɔ.

²³Íyíme nɔnɔ goŋaá bá á húmíe ondimóní bɛcɔ́ Timotée naá ncíbo ya gɛaŋɔ́[84]. A amɔ́ a bola fɛaŋɔ, dɛ gaá ncó nyó ɛ́na olɔŋɔ.

²⁴Mbédíígínínyéemú nɔnɔ bogógí ɛlɔŋɔ bɛ́nyɔ́ biimée, na boolímínyí biimée kɛ́. Basɔ́gɔ́ɔ báaba naá Itelíi bá á nyó bédíígényée.

²⁵Ŋgáa niibo ná Asaŋa nɛ́ bɛ́ɛmba nɛnyɔ́ biimée.