Read Nugunu Behébelée 2 Bible Online

Behébelée 2 - Nugunu bible

Behébelée 2

¹Kɔ́ɔ bó lɔ́mɔ́, aáŋa dɛ dɛ lɛ́gálɛ́gáa go sola, ŋgáa dɛ bágódɛna bese bese cɔ́mɔ yɛ́ɛyɛ dɛ mbɔɔ́ ɔ́bɔ́nɔ́ɔ.

²Ɛɛ́ɛŋ, cɔ́mɔ yɛ́ɛyɛ bɛɛ́ŋgɛlɛsɛ bá mbuú úlé na yɛ́, ɛ mba bédúfie goŋaá ɛ lɛ́ mammana, gɔ́ɔ mɔtɔ uŋkimée mɔ́ɔnyɔ a mbaá yɛ dómbɛ́ná, a báá gundé a báá yɛ ŋaáa edúu, a mba bɛáa noséésényée nɔ́ɔnɔ nó mbaá lɛ nó háanana.

³Nɛ́ɛnɛ kanɛ́ bɛɛcɔ́ɔ moatɛ́ moatɛ dɛ ŋgaá pambá go noséésényée dɛ amɔ́ dɛ sesidie mbɔ́dɔ ya gisódio aŋa yɛ́ɛyɛ náana o? Gisódio moánɛ, Daadáa mɔ́ɔ a mbaá dóáná go gɛ́ dúmenye; naá nnyimé hɔ́ɔlɔ́, báaba bá mbaá gɛ́ ɔ́bɔ́nɔ́ɔ, bá báá có dúfíe goŋaá gɛ́ lɛ́ mammana.

⁴Asaŋa tɔ́nɔ a báá latɛ́nɛ́ná ŋgoyáamɔ́ yabɔ́ na bieninye bá gobékúke, na muune, na bɛsɛɔ mbɔ́dɔ iŋkimée[8], gɔnɔ́ na pááná sá Gimmúmpúu gá Giliíli abá abá go ndɛ́ga yɛhɛ́.

⁵Mammana, Asaŋa a lɛ́ kanɛ go díliminye bɛɛ́ŋgɛlɛsɛ goŋaá bí indenye cí yɛ́ɛyɛ yá úlenemú, yɛ́ɛyɛ dɛ gálagalamɔ́ háalá. Gigísi gá Ŋgɔ́ŋɛ́ gíntió gɛ́ dúfenye daŋɛ́daŋɛ gɛ́ amɔ́:

⁶«Asaŋa, mɔtɔ a lɛ́ ɛkádɛ goŋaá o mo béeniŋenye o? Mɔtɔ a lɛ́ ɛkádɛ goŋaá o gɔ́lɔnɔ gɛdɔmbɔ nɛhɛ́ o?

⁷Go Moɔnɔ́ ba gɛcamɛna, o báá mo siisíe, a bɛ́ɛ́ ɛ́yá sɔŋɛ go bɛɛ́ŋgɛlɛsɛ; naá nnyimé hɔ́ɔlɔ́, o báá gɔnɔ́ mo fáa nokanya ná mbúlugie na nigúmi;

⁸o báá ágá boóma buimée naá bɛgɔ́ndɔ́ bɛ́hɛ́ cí.» Gɔ́ɔgɔ bó oyamɔ́ bá amɔ́ buimée bó lɛ́ naá bɛgɔ́ndɔ́ bɛ́hɛ́ cí, bó lɔ́mɔ́ goŋaá búmmue bó do báá hɔ́ɔ bɔ́ɔbɔ bó lɔ́mɔ́ bó do mo ɔ́bɛ́nɔ́nɔ́ɔ. Kanɛ́ godɔ́ɔdɔ, dɛ gá lɛ́ dɛ dɛ ɛ́ná goŋaá buimée bó lɛ́ naá bɛgɔ́ndɔ́ bɛ́hɛ́ cí.

⁹Dɛ ɛ́nanamɔ́ go goŋaá, mɔ́ɔnyɔ bá mbaá mo siisíe go moɔnɔ́ ba gɛcamɛna, a bɛ́ɛ́ ɛ́yá sɔŋɛ go bɛɛ́ŋgɛlɛsɛ, Yésusu, bá mba mo fáá nokanya ná mbúlugie na nigúmi go busío bá nigúe nɛ́ɛnɛ a mbɔɔ́ ɔ́bɛ́gɔ́nɔ́ɔ na nɛ́. Bó lɔ́mɔ́ go niibo ná Asaŋa gɔ́ɔ Yésusu a mbaá nyáá nigúe go busío bá batɔ biimée.

¹⁰Ɛɛ́ɛŋ, Asaŋa mɔ́ɔnyɔ a mbaá gedíe boóma buimée, gɔnɔ́, buimée bó ɔyɔmɔ́ go busío bɛ́hɛ́, a lɛ́galɛga goŋaá gɛcɛcá gá baaná gɛ́ dáŋaba nigúmi nɛ́hɛ́, bó mba lɛ́ mo nɔ́ɔlú goŋaá, a gíndie Yésusu a hóogio bosɔ́mɔ bɛ́hɛ́ na makánya máama a mbaá bɛáa, goakɛ́ Yésusu moánɛ mɔ́ɔ a lɔ́mɔ́ mbɔ́gɔ́ ya gisódio gá batɔ.

¹¹Mɔ́ɔnyɔ a sogonamɔ́ batɔ na batɔ kɛ́ báaba a bó sogonamɔ́, bá bɛanana Isée táŋɛ́ ummue, boóma moánɛ bɔ́ a lɔ́mɔ́ a dɛ nóánánáa odóɛ go go bó dɔ́ŋɛnɔ a amɔ́ bolimóní bɛ́hɛ́;

¹²a gunde a gálagala a amɔ́: «Nná dúmeninye bolimóní bámɛ ufíno yáhɔ, naá tɛ́mádɛ́má ya nɛgósa, ko gúmenye[9].»

¹³A gɔnɔ gálagala a amɔ́: «Yɔmɔ́ɔ, nná ágana odɛ́má yámɛ uŋkimée naá mɔ́ɔ,» gɔnɔ́ a amɔ́: «Yɔmɔ́ɔ mɔ́ɔnyɔ olɔŋɔ na baaná báaba Asaŋa a mbaá páá[10].»

¹⁴Kanɛ́ aŋa bó lɔ́mɔ́ goŋaá batɔ bá lɛ́ boóma búmmue na nnyɔ́dɔ na manɔ́ŋɔ́, mɔ́ɔ tɔ́nɔ caŋa mmue a mbɛ ɛ́yá mɔtɔ. Bó mbaá lɛ go goŋaá, go nigúe nɛ́hɛ́, a níŋiside mɔ́ɔnyɔ a mbaá lɛ na bogaaga bá nigúe kɔndɔ́ go cí, nɔ́ɔnɔ gó lɛ́ aá ohándá.

¹⁵Bó mba lɛ́ tɔ́nɔ go goŋaá a fáŋa biimée báaba, go go díine nigúe, bá mbaá lɛ bɛɔlɛ́ bá nɛ́ gɛɔyɔ gábɔ́ giimée.

¹⁶Ɛɛ́ɛŋ, a dɛ úlénée go gidúgune gá bɛɛ́ŋgɛlɛsɛ, kanɛ́, bó lɔ́mɔ́ go gidúgune gá ɛnana ya Ábalaháma[11].

¹⁷Kɔ́ɔ bó mba lɛ́ bó háanana goŋaá a manɛ go ɛ́ya aŋa bolimóní go boóma buimée, a lɛ go nco bɛ́ɛmba go busío bábɔ́, ogɔ́nɔ́ɔ ba bedúmbí bɛbáágá naá Asaŋa dácɛ na ŋgɛ́na mahana, gɔnɔ́ na pídefide naá buelí bá Asaŋa go go fúgune bɛlɔgɔ bá boɛ́nɔ[12].

¹⁸Godɔ́ɔdɔ, a lɛ́ ba go óhiginyo báaba bá lɔ́mɔ́ naá ɛsɔgɛdɔ, goakɛ́ mɔ́ɔ moatɛ́ a mba dómbá naá ɛsɔgɛdɔ na naá makánya moánɛ.