Read Nugunu Behébelée 3 Bible Online

Behébelée 3 - Nugunu bible

Behébelée 3

¹Kɔ́ɔ bó lɔ́mɔ́ bolimóní, bɛɛnyɔ́ɔ báaba no ɔ́bɛnɔnɔmɔ́ na Asaŋa mɔ́ɔnyɔ a mbaá nyó dɔ́ŋɛ́nɔ́ biimée, ágá nɔnɔ oŋgíso yɛ́nyɔ́ naá Yésusu. Mɔ́ɔ Asaŋa a mbaá dómá, goŋaá a bɛ́ɛmba ogɔ́nɔ́ɔ ba bedúmbí bɛbáágá naá gioliminyo gɛ́ɛgɛ dɛ dúmenyemú.

²A lɛ́ na pídefide na Asaŋa mɔ́ɔnyɔ a mbaá mo dílímínyée naá odɛ́nɛ́ yɔ́ɔyɔ, a báá háá naá yɔ́, gɔgɔ́ aŋa Mɔ́sɛsɛ a mbaá háá naá odɛ́nɛ́ yɔ́ɔyɔ Asaŋa a mbaá mo fáá go boɛ́nɔ bɛ́hɛ́[13].

³Nigúmi ná Yésusu nɛ́ dómbana nɛ́ɛnɛ ná Mɔ́sɛsɛ; caŋa mmue, nigúmi ná mɔtɔ mɔ́ɔnyɔ a fóagamɔ́ nnyaŋá nɛ́ dómbana nnyaŋá moatɛ́.

⁴Mammana, nnyaŋá iŋkimée ɛ bɛanana ufúégí ba yɛ́, kɔ́ɔ ufúégí ba buimée a lɔ́mɔ́ Asaŋa.

⁵Naá boayá bá Mɔ́sɛsɛ, a mba bɛ́ɛ́mbá na pídefide naá odɛ́nɛ́ yɔ́ɔyɔ Asaŋa a mbaá mo dílímínyée hɔ́ɔ. A báá bɛ́ɛ́mbá uyogóní go go dúmbeninye boɛ́nɔ bɛ́hɛ́ buimée bɔ́ɔbɔ Asaŋa a gálagalamɔ́.

⁶Kanɛ́ Kilítusu a lɛ́ na pídefide moánɛ aŋa Moɔnɔ́, naá odóɛ yá boɛ́nɔ bɛ́hɛ́. Boɛ́nɔ bɛ́hɛ́ moánɛ bó lɔ́mɔ́ bɛɛcɔ́ɔ, dɛ amɔ́ dɛ bégumbenine[14] toodo odɛ́máa na bɛyaŋa go bɔ́ɔbɔ dɛ áganamɔ́ odɛ́má yɛ́cɔ́ hɔ́ɔ.

⁷Nɔ́ɔnɔ gɔ́ɔ, aŋa Gimmúmpúu gá Giliíli o oyamɔ́ a amɔ́: «Ínoni, no amɔ́ no ɔ́bɔ ukelú yá Asaŋa.

⁸No do lelíe odɛ́má yɛ́nyɔ́, aŋa gɔ́ɔgɔ biisée bɛ́nyɔ́ bá mbaá ŋaáa. Bá báá fíídíe Asaŋa nnyimé, bá bɛ́ɛ́ ɛ́dá go go mo gogona naá giolóo gá bodɛ́agadɛ́.

⁹Buisí bɔ́ɔbɔ biisée bɛ́nyɔ́ bá mbaá kogónáa go go ɛ́na bɔ́ɔbɔ kaá ná ŋaáa, gɔ́ɔ bá mbɛɛ́ ɛ́ná meŋiigíe mámɛ

¹⁰nnyómá otíno áhandɛ́. Go busío moánɛ gɔ́ɔ mbɔɔ́ ɔ́bɛ́nɔ́ ogɛlɛ yɔ́ɔyɔ mpímí, mbáá gálɛ́dá caá: Bɛcamɛna biimée, odɛ́má yábɔ́ yó lɛ́ naá gonana; batɔ béení bá lɛ́ kanɛ go lɛnca pɛ́ sámɛ.

¹¹Mammana, ndɛ́ bálɛáalú naá mpímí caá: dɛ nɛ́ ɛ́na bese bese aáŋa bá ní íŋene naá gofuuge gámɛ[15].»

¹²Bolimóní, bébeŋéemú nɔnɔ kanɛ́ goŋaá ummue naá bɛɛnyɔ́ɔ olɔŋɔ a dɛ bɛ́ɛ́mbá na gɛlalaga gá odɛ́má gá kanɛ go olimonyo gɛ́ɛgɛ gɛ́ mo ádonamɔ́ na Asaŋa ogɔ́sɔ.

¹³Kanɛ́ bégúlúménínyéemú nɔnɔ miisí miimée, gɛcamɛna giimée gɛ́ɛgɛ dɛ gálagalamɔ́ dɛ amɔ́ ínoni, bó ŋa goŋaá ummue naá bɛɛnyɔ́ɔ gɛlɔgɔ gɛ́ dɛ mo belé odɛ́má yɛ́hɛ́ yó ɛ́da go lala.

¹⁴Kanɛ́ bɛɛcɔ́ɔ bábáa dɛ ɛ́yamɔ́ báaba bɛ́ ɛndamɔ́ olɔŋɔ na Kilítusu, bó úhene goŋaá dɛ bégumbenine tíŋítíŋí gó ɛ́da húme naá mesúgidinye gioliminyo gɛ́cɔ́ gɛ́ɛgɛ dɛ mbaá bɛáa naá mabayɛga.

¹⁵Aŋa bó lɔ́mɔ́ ɔ́ŋɔ́ɔlú goŋaá: «Ínoni, no amɔ́ no ɔ́bɔ ukelú yá Asaŋa, no do lelíe odɛ́má yɛ́nyɔ́, aŋa gɔ́ɔgɔ biisée bɛ́nyɔ́ bá mbaá ŋaáa, bá báá fíídíe Asaŋa nnyimé[16].»

¹⁶Baánɛ́ɛ kanɛ́ bá mbɔɔ́ ɔ́bɔ́nɔ́ɔ, bá báá gundé, bá báá suúu go fíidie gá Asaŋa nnyimé o? Ábɔ caá gɔgɔ́ bɔ́ɔ báaba Mɔ́sɛsɛ a mbaá bó húmíe naá gɛdɔŋɔ gá Egíbítene o?

¹⁷A mbɔɔ́ ɔ́bɛ́nɔ́ kanɛ́ baánɛ́ɛ mpímí go nnyómá otíno áhandɛ́ o? Ábɔ caá gɔgɔ́ bɔ́ɔ biiménénée báaba bá mbaá ŋaáa gɛlɔgɔ, bá báá fúé púmú naá giolóo gá bodɛ́agadɛ́ o?

¹⁸Go busío bá baánɛ́ɛ gɔ́ɔ, a mbaá bálɛáa a amɔ́, bá dɛ ŋgí íŋene naá mɔ́ gofuuge o? Ábɔ caá gɔgɔ́ bɔ́ɔ báaba bá mbaá mo ŋaáa edúu[17] o?

¹⁹Gɔ́ɔ dɛ ɛ́nanamɔ́ dɛ amɔ́, bá lɛ́ kanɛ go íŋene naá mɔ́ gofuuge go gɛlalaga gábɔ́ gá odɛ́má.