Read Nugunu Behébelée 4 Bible Online

Behébelée 4 - Nugunu bible

Behébelée 4

¹Gɔ́ɔ, gɛcamɛna giimée gɛ́ɛgɛ tánɔ ya Asaŋa ya go íŋene naá gofuuge gɛ́hɛ́ ɛ gá nonamɔ́, dɛ lɛ́ na bofoá bá goŋaá ummue naá bɛɛnyɔ́ɔ a dɛ síéné go boayá kanɛ go íŋene kɔ́ɔ.

²Mammana, dɛ mba bɛáa Gɛnɔ́gɔ́ gá Cɔ́mɔ caŋa mmue aŋa bɔ́ɔ báaba bá mbaá lɛ naá giolóo gá bodɛ́agadɛ́. Kanɛ́ Gɛnɔ́gɔ́ gá Cɔ́mɔ moánɛ gɛ́ lɛ́ kanɛ go bó dúgune go boóma, goakɛ́ báaba bá mbaá gɛ́ ɔ́bɔ́nɔ́ɔ, bá lɛ́ kanɛ go gɛ́ oliminyo[18].

³Kanɛ́ bɛɛcɔ́ɔ báaba dɛ lɔ́mɔ́ fídéelú aŋa gɛ́ oyamɔ́, dɛ ní íŋene naá gofuuge anáa a mboó oyɛ́dá a amɔ́: «Mammana, ndɛ́ bálɛáalú naá mpímí caá, dɛ nɛ́ ɛ́na bese bese aáŋa bá ní íŋene naá gofuuge gámɛ.» Asáa gɔgɔ́ Asaŋa a mba maná buelí bɛ́hɛ́ buimée púmú naá gobesie gá cí.

⁴Mammana bó lɛ́ ɔ́ŋɔ́ɔlú hoóma hóntió naá kálata ya Asaŋa goŋaá: «Gɔ́ɔ Asaŋa a dúugidemú naá buisí bá gátáanɔ na gáandɛ́ɛ go buelí bɛ́hɛ́ bɔ́ɔbɔ a mbaá yɔgɔ́nɔ́ɔ[19].»

⁵Naá hoóma hóntió naá kálata mmue eé mmue, bó lɛ́ ɔ́ŋɔ́ɔlú tɔ́nɔ goŋaá: «Aáŋa bá ní íŋene naá gofuuge gámɛ.»

⁶Kanɛ́ aŋa bó lɔ́mɔ́ gedíelú goŋaá bóncodío bá ní íŋene, báaba bá mbaá dóáná go bɛa Gɛnɔ́gɔ́ gá Cɔ́mɔ, bá báá lɔbɛ́nɔ́ kanɛ go íŋene go busío bá gɛlalaga gábɔ́ gá odɛ́má;

⁷ínoni, Asaŋa go gɔnɔ dána buisí naá gogálɛda gɛ́hɛ́ gɛcamɛna makɔ́nɔ́ naá nnyimé, naá kálata ya Défidi yɛ́ɛyɛ dɛ báá ná manɛ́ go buŋe hɔ́ɔ dɛ amɔ́: «Ínoni, no amɔ́ no ɔ́bɔ ukelú yá Asaŋa, no do lelíe odɛ́má yɛ́nyɔ́[20].»

⁸Mammana aáŋa gɔ́ɔ Yosué a mbɛɛ́ ɛ́dá nabɔ́ naá hoóma há gofuuge[21], gásɛ́ Asaŋa a lɛ́ kanɛ go gɔnɔ gálagala naá nnyimé hɔ́ɔlɔ́ go buisí búncodío.

⁹Gɔ́ɔ Asaŋa a fáananamɔ́ boɛ́nɔ bɛ́hɛ́ gofuuge go buisí bá sábadɛ caŋa mmue aŋa mɔ́ɔ a mbaá fuugídé naá buisí moánɛ.

¹⁰Mammana mɔtɔ mɔ́ɔnyɔ i íŋenemú naá gofuuge gá Asaŋa, mɔ́ɔ tɔ́nɔ a fuuge go buelí bɛ́hɛ́ aŋa Asaŋa a mbaá fuugídé go bɔ́ɔbɔ bɛ́hɛ́.

¹¹Ŋgáa dɛ bágáyɛga kanɛ́ go íŋene naá hoóma há gofuuge moánɛ, go goŋaá golala gá odɛ́má gó do ídíe mɔtɔ naá goyíme aŋa gó mbaá lɛ go biisée kɔ́nɔ́ɔ bá biisée bɛ́cɔ́.

¹²Nogálɔ ná Asaŋa nó lɛ́ nogɔ́sɔ gɔnɔ́ na bogaaga makɔ́nɔ́, no dɛ́a nó dómbana kalafɔ ya mɔnɔ maayá miimée máandɛ́. Nó íŋenene sulubutu naá odɛ́má gúunú, na naá ŋgoŋa na mɔfɔŋɔfɔŋɔ; nó bide golɛ́galɛga na mbééníŋínyí sá odɛ́má.

¹³Gigedie gá go nó bɔ́ɔsɛgɛnɔ gɛ́ dɛ báá; buimée bó lɛ́ baláŋɛ́balaŋɛ naá busío bá nɔ́. Na nɔ́ gɔ́ɔ dɛ ŋgoó oyáa bɛsɛnɛ bɛ́cɔ́.

¹⁴Aŋa bó lɔ́mɔ́ goŋaá dɛ bɛanana udúmbí bɛbáágá ba ogɔ́nɔ́ naá Asaŋa, a lɔ́mɔ́ Yésusu, Moɔnɔ́ ba Asaŋa mɔ́ɔnyɔ a mbií íŋéné naá mmoɛná gúunú, mammana ŋgáa dɛ bégumbenine gioliminyo gɛ́ɛgɛ dɛ dúmenyemú.

¹⁵Dɛ dɛ bɛanánáa Ufuŋe yá udúmbí bɛbáágá naá Asaŋa yɔ́ɔyɔ yó lɔ́mɔ́ yó do bósó ba go lɔbɛnɔ kanɛ go ɔ́bɔ nogánágana nɛ́cɔ́; yó mba bɛáa ɛsɔgɛdɔ mbɔ́dɔ iŋkimée aŋa bɛɛcɔ́ɔ, kanɛ́ mɔ́ɔ, a lɛ́ kanɛ go ŋa gɛlɔgɔ.

¹⁶Ŋgáa dɛ báyɛkɛna kanɛ́ na mbémineminie iŋkimée naá oŋgɛ́yɔ́ yá niibo ná Asaŋa, go goŋaá a có ɛ́na mahana, dɛ ɛ́na bese naá oŋgíso yɛ́hɛ́, a gunde o có dúgune naá gɛcamɛna gɛ́ɛgɛ gɛ́ háananamɔ́.