Read Nugunu Behébelée 5 Bible Online

Behébelée 5 - Nugunu bible

Behébelée 5

¹Kɔ́ɔ, udúmbí bɛbáágá ba ogɔ́nɔ́ uŋkimée naá Asaŋa mɔ́ɔnyɔ bí iyidemú naá kadɛ́gadɛ́ɛ ya batɔ, a lɛ́ dílímínyéelú go busío bá batɔ go gɛɔyɔ gábɔ́ gɛ́ɛgɛ na Asaŋa. Buelí bɛ́hɛ́ bó lɔ́mɔ́ go íŋenene Asaŋa pááná na bɛbáágá go bɛlɔgɔ.

²A lɛ́ naá odɛ́nɛ́ yá go lɛnca biiménénée báaba bá lɔ́mɔ́ bá dɛ íyíménée mammana ya pɛ́, bá gunde bá nanogana, goakɛ́ a lɛ́ mɔ́ɔ moatɛ́ tɔ́nɔ na bonɔ́nɔ́ bá nnyɔ́dɔ maayá miimée aŋa bɔ́ɔ.

³Go busío moánɛ, a háanana go íŋenene bɛbáágá go bɛlɔgɔ, go gɛondá gɛ́hɛ́ moatɛ́ moatɛ, gɔnɔ́ tɔ́nɔ go busío bá boɛ́nɔ[22].

⁴Mɔtɔ moatɛ́ moatɛ a dɛ bósó go bédílimenye naá odɛ́nɛ́ yá nigúmi moánɛ, Asaŋa mɔ́ɔ a dɔ́ŋɔnɔmɔ́, aŋa bó mbaá bɛ́ɛ́mbá go busío bá Álɔŋɔ.

⁵Caŋa mmue na Kilítusu, a lɛ́ kanɛ go báfáa mɔ́ɔ moatɛ́ moatɛ nigúmi go go ɛ́ya Ufuŋe yá udúmbí bɛbááagá naá Asaŋa. Mɔ́ɔnyɔ a mbaá mo oyana a amɔ́: «O lɛ́ Moɔnɔ́ bamɛ, ínoni, ŋgɛɛ́ ɛ́yá tɛ́ɔ,» mɔ́ɔ a mbaá mo fáá odɛ́nɛ́ moánɛ.

⁶Bó lɛ́ nɔ́ɔ caŋa mmue na nogálɔ gɔnɔ́ nɔ́ɔnɔ: «O lɛ́ udúmbí bɛbáágá naá Asaŋa bɛcamɛna biimée, naá nogɔgɔ́ ná Mɛlɛkɛsɛdɛ́gɛ[23].»

⁷Aŋa Yésusu a mbaá lɛ naá cí, a mba bósógólónyóo, a yɛ́bɛnayɛbɛna ukelú ogɔ́nɔ́ gɔnɔ́ na mbií, mɔ́ɔnyɔ a mbaá lɛ na bogaaga bá go mo sódio go nigúe[24]. Asaŋa a mba mo ɔ́bɔ́, goakɛ́ a mba lɛ́ a mo hálamanana.

⁸Gɔgɔ́ akɛ́ aŋa a mbaá lɔmɔ́ Moɔnɔ́ ba Asaŋa, a mba hóónáa ŋgɔ́bɛnɔ naá gɛɔ́bɛgɔ giimée gɛ́ɛgɛ a mbaá bɛáa.

⁹Aŋa Asaŋa a mbaá maná buimée bɔ́ɔbɔ a mbaá gedíe go busío bɛ́hɛ́, Yésusu go ɛ́ya usódí go bɛcamɛna biimée go busío bá báaba bá mo ɔ́bɛnɔnɔmɔ́.

¹⁰Asaŋa a báá mo dílímínyée tɔ́nɔ naá odɛ́nɛ́ yá Ufuŋe yá udúmbí bɛbáágá naá Asaŋa naá nogɔgɔ́ ná Mɛlɛkɛsɛdɛ́gɛ.

¹¹Naá bosɔ́mɔ bɔ́ɔbɔ, dɛ bɛanana gɛcɛcá gá moóma gá go oya, kanɛ́ mó lɛ́ ndɔlɛ go falona gá mɔ́, goakɛ́ goɔ́bɔnɔ gɛ́nyɔ́ gó do báá fɛaŋɔ.

¹²Gásɛ́ fueké, no ná lɛ́ naá odɛ́nɛ́ yá muloodio go basɔ́gɔ́ɔ; kanɛ́ ɛ́ná nɔnɔ aŋa no lɔ́mɔ́ naá odɛ́nɛ́ yá go gɔnɔ nyó húunenye moóma má busío busío naá nogálɔ ná Asaŋa. Naá goŋaá bá nyó fáa manyáanya, no gá lɔ́mɔ́ naá odɛ́nɛ́ yá go nyó fáanana mabáanyɛ.

¹³Uŋkimée mɔ́ɔnyɔ a gá lɔ́mɔ́ naá mabáanyɛ, a dɛ lɛncánáa nogálɔ ná tɛ́nɛ́ɛ, goakɛ́ a gá lɛ́ moɔnɔ́ odɔmbɔ́[25].

¹⁴Bagɔ́nɔ́ bɔ́ɔ bá nyáananamɔ́ manyáanya, goakɛ́ naá gɛɔyɔ gábɔ́, bá báa go hóona go lɛncana moóma má besé na má mobɛ́.