Read Nugunu Behébelée 6 Bible Online

Behébelée 6 - Nugunu bible

Behébelée 6

¹Go busío moánɛ, ŋgáa dɛ dɔmbɔ go hóona moóma má busío busío mɔ́ɔmɔ mó núunemú Kilítusu, dɛ goma naá kúunye ya bagɔ́nɔ́, dɛ dɛ gundé gúndée go go góna mogoná mɔ́ɔmɔ mó lɔ́mɔ́ aŋa: gofíidie nnyimé go meŋiigíe máama má ɛ́danamɔ́ na mɔtɔ naá nigúe, gooliminyo gá Asaŋa,

²gohúunenye gá mbɔ́dɔ mbɔ́dɔ sá biyuminye, na godálana gá batɔ ɛmbɔ́gɔ, púfuge ya begúe, na gosómbana gá batɔ bɛsɛnɛ go busío buimée.

³Asaŋa a amɔ́ a có fáa bogaaga, boóma bɔ́ɔbɔ dɛ gaá ná ŋaáa bɔ́bɔ́ɔ.

⁴Bó lɛ́ kanɛ́ ndɔlɛ go busío buimée goŋaá, batɔ báaba bá báá ná manɛ́ go bɛa gise, bá bɔ́ɔ́ ɔ́bɛ́dɛ́nɔ́ pááná ya Asaŋa, bá báá dáŋábá Gimmúmpúu gá Giliíli,

⁵bá bɔ́ɔ́ ɔ́bɔ́ gosɛma na gɛnɔ́gɔ́ gá nogálɔ ná Asaŋa, na magaaga má cí máama má úlenemú.

⁶Bá amɔ́ bá gɔnɔmɔ́ nco go inye Asaŋa, bó lɛ́ ndɔlɛ go busío buimée goŋaá bá gɔnɔ góŋona gɛɔyɔ gábɔ́, goakɛ́ bá gɛ́ ɛ́dana naá busío go bɔ́ɔ moatɛ́, bá gɔnɔ gilene Moɔnɔ́ ba Asaŋa naá kolósi, bá mo dambɛgana go cigí sá batɔ.

⁷Gɔ́ɔgɔ nobólá nó naananamɔ́ gɛcamɛna giimée, cí ɛ mɛna miimpo má nɔ́; ɛ lɛ go ɛ́da go besenye magónɛ́dá máama mó oyoyomú uyogóní. Hɔ́ɔlɔ́ gɔ́ɔ Asaŋa a yɛ fonamɔ́.

⁸Kanɛ́ yɛ amɔ́ yɛ ɛ́da go besenye tudú sá cɛ́ndɛ́ na sá ɛmandɔ, ɛ lɛ́ go dugúnú. Ɛ lɛ́ mekúígíi goŋaá bá yɛ yɔmɛnɔ; gosúgudinye gá yɛ́ gó lɔ́mɔ́ golɔ́kɔ naá íyuke[26].

⁹Kanɛ́ bɛɛnyɔ́ɔ, bolimóní bá odɛ́má, akɛ́ aŋa dɛ gálagalamɔ́ náana, dɛ lɛ́ na toodo odɛ́má goŋaá, no lɛ́ naá pɛ́ ya bese yɛ́ɛyɛ ɛ lɔ́mɔ́ gisódio.

¹⁰Mammana Asaŋa a lɛ́ gɛtɛ́nɛ́ɛ; a dɛ báá bá go bófoolio buelí bɛ́nyɔ́ na gɛnɔ́ɔ́nɛ́nɔ́ gɛ́ɛgɛ no mbaá dúfíe go ufíno yɛ́hɛ́, aŋa gɔ́ɔgɔ no mbaá bííŋéné go go yɔgɔnɛnɔ boolímínyí cóá cóá, akɛ́ godɔ́ɔdɔ.

¹¹Ndɛ́ga yɛcɔ́ ɛ lɔ́mɔ́ goŋaá, uŋkimée naá bɛɛnyɔ́ɔ a ága bogaaga búmmue eé búmmue go goŋaá naá mesúgidinye no dáŋaba buimée bɔ́ɔbɔ no áganamɔ́ odɛ́má yɛ́nyɔ́ kɔ́ɔ.

¹²Dɛ dɛ maamánáa goŋaá no bɛ́ɛmba bɛnɔ́nɔ́, kanɛ́ no bienene gɛgɔ́ndɔ́ gá báaba go gioliminyo gábɔ́ na ɛbágóɛga hábɔ́, bá dáŋabanamɔ́ besé sɛ́ɛsɛ Asaŋa a mbaá dáná.

¹³Gɔ́ɔgɔ Asaŋa a mbaá dánɛ́ná Ábalaháma, a mba bálɛáa go ufíno yɛ́hɛ́ yá moatɛ́ moatɛ, goakɛ́ mɔtɔ untió ba go mo dómba a dɛ mbáa lɛ hɔ́ɔ goŋaá a bálɛa go ufíno yá onyɔ moánɛ.

¹⁴A mba gálɛ́dá a amɔ́: «Mammana, mammana, nná go sugune gɛfona, ko fáa ɛnana kanɛ ombanɔ[27].»

¹⁵Ábalaháma go bágóɛga go go gɛ́gana tánɔ moánɛ, gɔ́ɔ a yɛ ɛ́namɔ́ ɛ báá bóhóógío.

¹⁶Batɔ bá bálɛanana go ufíno yá gɛkɔ́nɔ́nɔ́ɔ gá mɔtɔ gɛ́ɛgɛ gɛ́ bó dómbanamɔ́; hɔ́ɔlɔ́ cuŋí incodío ɛ dɛ báá gɔnɔ́, goŋaá bɔ́ ɔ́bɛnɔnɔ na mbálɛa yɛ́ɛyɛ tɛ́fá moánɛ ɛ fáananamɔ́.

¹⁷Aáŋa Asaŋa a mba gálɛ́dá nɔ́ɔnɔ a báá bálɛáa, bó mbaá lɛ goŋaá a dúfie báaba a mbaá bó dánɛ́ná goŋaá tánɔ yɛhɛ́ ɛ lɛ́ kanɛ nnúgínyée.

¹⁸Kɔ́ɔ moóma mó lɛ́ móandɛ́ mɔ́ɔmɔ mó lɔ́mɔ́ kanɛ nnúgínyée: mbele naá boayá bá Asaŋa ɛ dɛ báá kɔ́ɔ[28]. Moóma mɔ́ɔmɔ mɔ́ɔ mó có gúlumenyemú makɔ́nɔ́, bɛɛcɔ́ɔ báaba dɛ mbaá fíídíe nnyimé go buimée, go go bɛa mbémineminie yɛ́ɛyɛ ɛ lɔ́mɔ́ dánáalú.

¹⁹Mbémineminie moánɛ ɛ nona gɛɔyɔ gɛ́cɔ́ sibisibi aŋa gidílímínyí sitíme; yɛ íŋenene gúunú ɛ báca sanda ya goodo ya Nnyaŋá ya Asaŋa ya mmoɛná[29],

²⁰anáa Yésusu a mbaá dóánánáa a bíí íŋéné go busío bɛ́cɔ́, mɔ́ɔ a lɔ́mɔ́ Ufuŋe yá udúmbí bɛbáágá naá Asaŋa go bɛcamɛna biimée naá nogɔgɔ́ ná Mɛlɛkɛsɛdɛ́gɛ.