Read Nugunu Behébelée 7 Bible Online

Behébelée 7 - Nugunu bible

Behébelée 7

¹Mɛlɛkɛsɛdɛ́gɛ bendiemi, ufuŋe yá Sálɛmɛ, udúmbí bɛbáágá naá Asaŋa ba Páábɔ́ naá Mmoɛná Héení, mɔ́ɔ a mbɛɛ́ ɛ́dá giluméní na Ábalaháma go goncogunde gɛ́hɛ́ gá nɛnoa na mefuŋe. Mɛlɛkɛsɛdɛ́gɛ go fona Ábalaháma.

²Mɔ́ɔ, Ábalaháma a mbaá mo fáá gɛɔdɔ́ɔ gá buimée bɔ́ɔbɔ a mbaá gɔ́lɔ́ naá nɛnoa. Moatɛ́, Mɛlɛkɛsɛdɛ́gɛ a lɛ́ ufíno yɔ́ɔyɔ yó lɔ́mɔ́ naá cí goŋaá, «ufuŋe yá botɛ́nɛ́ɛ;» a lɛ́ gɔnɔ́ tɔ́nɔ ufuŋe yá Sálɛmɛ, nɔ́ɔnɔ gó lɛ́ aá, «ufuŋe yá buumbénú[30].»

³A lɛ́ kanɛ isée, kanɛ nnyeedíi, kanɛ mbɔ́sɔmɔ, kanɛ medúgú mɛ́hɛ́ má go bébíene, kanɛ medúgú má gɛɔyɔ gɛ́hɛ́ go mana; kanɛ́ a lɔ́mɔ́ gieninye gá Moɔnɔ́ ba Asaŋa mɔ́ɔnyɔ a báasamɔ́ udúmbí bɛbáágá go bɛcamɛna biimée.

⁴Núúnée nɔnɔ bogɔ́nɔ́ɔ bá Mɛlɛkɛsɛdɛ́gɛ! Ábalaháma mɔ́ɔnyɔ isée kɔ́nɔ́ɔ ba biisée bá boɛ́nɔ bá Ɛ́sɛlahɛ́ɛlɛ a mba mo fáá gɛmánya gá gɛɔdɔ́ɔ gá bodáŋɔ bɔ́ɔbɔ a mbaá gɔ́lɔ́nɔ́ɔ naá nɛnoa.

⁵Kanɛ́, aŋa gicele gɛ́ oyamɔ́, baaná bá Léfi báaba bá yɔgɔnɔmɔ́ buelí bá budúmbí bɛbáágá naá Asaŋa, bɔ́ɔ bá bɛananamɔ́ bogaaga bá go olona gɛɔdɔ́ɔ gá bonɔ́mɛ naá boɛ́nɔ[31], bolimóní bábɔ́; asáa gɔgɔ́ bɔ́ɔ biimée ɛnana ya Ábalaháma.

⁶Mɛlɛkɛsɛdɛ́gɛ mɔ́ɔnyɔ a lɔ́mɔ́ a dɛ báá banáalú naá mbɔ́sɔmɔ sábɔ́, a báá foná kanɛ́ mɔ́ɔnyɔ a mbaá bɛáa tánɔ sá Asaŋa. Ábalaháma a báá mo fáá gɛɔdɔ́ɔ gá bonɔ́mɛ.

⁷Mammana, ogɔ́nɔ́ɔ mɔ́ɔ a fonamɔ́ ba sɔŋɛ.

⁸Kɔ́ɔ baaná bá Léfi báaba bó olonamɔ́ gɛɔdɔ́ɔ gá bonɔ́mɛ, bá lɛ́ batɔ báaba bá gúenenemú, kanɛ́ háalá, Ŋgɔ́ŋɛ́ yɛ oya daŋɛ́daŋɛ yɛ amɔ́ mɔ́ɔnyɔ ɔ ɔyɔ.

⁹Dɛ lɛ́ bá go oyɛda go busío bá Ábalaháma dɛ amɔ́, akɛ́ Léfi mɔ́ɔnyɔ a mbaá lɔmɔ́ o olona gɛɔdɔ́ɔ gá bonɔ́mɛ, mɔ́ɔ tɔ́nɔ, a mba lɛ́ a soanana gɛɔdɔ́ɔ.

¹⁰Mammana, akɛ́ aŋa Léfi a mbaá ŋá a gá lɛ́ a dɛ bébíéné naá gɛcamɛna gɛ́ɛgɛ Ábalaháma a mbaá luméné na Mɛlɛkɛsɛdɛ́gɛ, a mba ŋá a ná lɛ́ naá manɔ́ŋɔ́ mɛ́hɛ́.

¹¹Ndɛ́ga ya Asaŋa ɛ dɛ mbáa lɛ ba go bóhóogio mammana na buelí bá budúmbí bɛbáágá naá Asaŋa bɔ́ɔbɔ ncíbo ya Boya Léfi ɛ mbaá lɛ ɛ yɔgɔnɔ. Bɔ́ɔ bá mba lɛ́ bá yɔgɔnɔ go mbɔ́gɔ́ ya gicele gɛ́ɛgɛ bá mbaá fáá boɛ́nɔ. Aáŋa bó mba lɛ́ nɔ́ɔnɔ, gásɛ́ udúmbí bɛbáágá naá Asaŋa uncodío a lɛ́ kanɛ go bologa naá nogɔgɔ́ ná Mɛlɛkɛsɛdɛ́gɛ; bá mbaá lɛ ba go mo iyide naá nogɔgɔ́ ná Álɔŋɔ.

¹²Godúmbie gá buelí bá budúmbí bɛbáágá naá Asaŋa naá ɛmbɔ́gɔ incodío, gó úlene kanɛ cuŋí na gonúgie gá gicele.

¹³Gɔ́ɔ, mɔ́ɔnyɔ Ŋgɔ́ŋɛ́ sɛ́ gálagalamɔ́ go busío bɛ́hɛ́ háalá, ɔ ɔ́bɛnɔnɔ na nigúli nɛ́ɛnɛ akɛ́ mɔtɔ ummue kɔ́ɔ bá gá báasamɔ́ bá dɛ mo iyídé go go yɔgɔnɔ naá gɛdálɛ́ná.

¹⁴Dɛ íyimene bese na bese dɛ amɔ́ Daadáa bɛcɔ́ ɛ ɛ́damɔ́ go úlene naá nigúli ná Yóda, kanɛ́ Mɔ́sɛsɛ naá bakálata bɛ́hɛ́, a gá báasa a dɛ oyɛ́dá a amɔ́, mɔtɔ ummue naá nigúli moánɛ a lɛ́ ba go yɔgɔnɔ buelí bá budúmbí bɛbáágá naá Asaŋa.

¹⁵Ŋgoyáamɔ́ gɔnɔ́ yɛ́ɛyɛ ɛ dúfenyemú nɔ́ɔ daŋɛ́daŋɛ yɛ́yɛ́ɛ yɛ amɔ́: udúmbí bɛbáágá naá Asaŋa uncodío mɔ́ɔnyɔ a lɔ́mɔ́ bológáalú a lɛ́ gieninye gá Mɛlɛkɛsɛdɛ́gɛ.

¹⁶A lɛ́ kanɛ go bɛ́ɛmba udúmbí bɛbáágá naá Asaŋa aŋa gicele gá batɔ gɛ oyamɔ́, kanɛ́ bó lɔ́mɔ́ go bogaaga bá gɛɔyɔ gɛ́ɛgɛ gɛ́ lɔ́mɔ́ kanɛ mmanɛ́náa.

¹⁷Ŋgɔ́ŋɛ́ sɛ́ɛsɛ sɛ́ oya go busío bɛ́hɛ́ sɛ́ amɔ́: «O lɛ́ udúmbí bɛbáágá naá Asaŋa go bɛcamɛna biimée, naá nogɔgɔ́ ná Mɛlɛkɛsɛdɛ́gɛ[32].»

¹⁸Háalá gɔ́ɔ dɛ ɛ́namɔ́ manɛ́ goŋaá Asaŋa a mbu úlíe gicele gá cóá, goakɛ́ gɛ́ mba lɛ́ gɛ́ kanɛ bogaaga, gɛ́ gɛ́ dɛ dúgúnée mɔtɔ go boóma.

¹⁹Gɛ́ lɛ́ kanɛ go hóogio goŋaá mɔtɔ a húme gɛtɛ́nɛ́ɛ naá busío bá Asaŋa. Dɛ lɛ go gɔnɔ go ɛ́na goŋaá, godɔ́ɔdɔ, Asaŋa a á có fáá sótáa ya mbémineminie, yɛ́ɛyɛ ɛ có fáananamɔ́ bogaaga bá go mo báyɛkɛna.

²⁰Gɔnɔ́, bó lɛ́ kanɛ go báŋa hɔ́ɔlɔ́ Asaŋa a gá lɛ́ kanɛ go bálɛa. Batɔ báaba bóncodío bá mbɛ ɛ́yánáa bedúmbí bɛbáágá naá Asaŋa kanɛ gobálɛa moánɛ.

²¹Yésusu mɔ́ɔ, a mbɛ ɛ́yá udúmbí bɛbáágá naá Asaŋa go mbálɛɛná yɛhɛ́, gɔ́ɔgɔ a mbaá mo oyáná a amɔ́: «Yɔmɔ́ɔ Daadáa ŋgaá bálɛáa, cɛ gɔnɔ́ gundene na nnyimé na dogálɔ dámɛ; ndɔ́mɔ́ caá: o lɛ́ udúmbí bɛbáágá naá Asaŋa go bɛcamɛna biimée.»

²²Hɔ́ɔlɔ́ gɔ́ɔ Yésusu ɛ ɛ́yamɔ́ sótáa ya tánɔ ya gɛlada bugúle.

²³Gɔnɔ́, báaba bóncodío bá lɛ́ gɛca báaba bá mbɛɛ́ ɛ́yánáa bedúmbí bɛbáágá naá Asaŋa, goakɛ́ nigúe nɛ́ mba lɛ́ nɛ́ bó legene goŋaá onyɔ moánɛ a dɛ lɔbɔ́ naá odɛ́nɛ́ moánɛ.

²⁴Kanɛ́ mɔ́ɔ, gɔ́ɔgɔ a líhemú go bɛcamɛna biimée, buelí bɛ́hɛ́ bá budúmbí bɛbáágá naá Asaŋa bó lɛ́ kanɛ mmanɛ́náa.

²⁵Go busío moánɛ, a lɛ́ naá odɛ́nɛ́ yá go sódio púmúpúmúu, báaba bá dómbanamɔ́ gɛ́hɛ́ go go báyɛkana Asaŋa, goakɛ́ a lɛ́ gɔgɔ́ ogɔ́sɔ go go gaŋɛmɛdana go busío bábɔ́.

²⁶Yésusu a lɛ́ kanɛ́ mammana udúmbí bɛbáágá ba ogɔ́nɔ́ naá Asaŋa, mɔ́ɔnyɔ a háananamɔ́ nɛcɔ́. A lɛ́ gimmúmpúu, kanɛ giédie, a dɛ lɔgɔ́ɔ, a lɛ́ yáŋónáalú na bologílógí, búlúgíelú naá mmoɛná gúunú.

²⁷Mɔ́ɔ, a dɛ fáánánáa bɛbáágá naá mbɔ́dɔ ya bagɔ́nɔ́ɔ bá bedúmbí bɛbáágá naá Asaŋa báaba bóncodío. Bɔ́ɔ bá fáanana bɛbáágá miisí miimée, manɛ́ go bɛlɔgɔ bábɔ́ bá moatɛ́, naá nnyimé hɔ́ɔlɔ́, kanɛ́ go bɛ́ɛbɛ bá boɛ́nɔ. Mɔ́ɔ, a mba fáá gɛbáágá gémmue na gémmue go busío buimée, a báá bííŋéné mɔ́ɔ moatɛ́ moatɛ.

²⁸Bagɔ́nɔ́ɔ bá bedúmbí bɛbáágá naá Asaŋa báaba bá bó dílimenyemú aŋa gicele gɛ́ oyamɔ́, bá lɛ́ batɔ bá bɛnamá kanɛ bogaaga. Kanɛ́, mɔ́ɔnyɔ Asaŋa a mbaá dílímínyée ogɔ́nɔ́ɔ ba bedúmbí bɛbáágá naá Asaŋa na mbálɛɛná yɛ́ɛyɛ a mbaá bálɛáa, hɔ́ɔlɔ́ gicele gɛ́ báá gó dóana go húme, a lɔ́mɔ́ Moɔnɔ́ bɛhɛ́ ba moatɛ́. Asaŋa a mba mo íyíe gɛtɛ́nɛ́ɛ go busío buimée.