Read Nugunu Behébelée 8 Bible Online

Behébelée 8 - Nugunu bible

Behébelée 8

¹Gɛantáanta gá boóma gá ndénégé gɛ́ɛgɛ dɛ lɛ́galɛgamɔ́ go nyó oyana gɛ́ lɔ́mɔ́ goŋaá: dɛ bɛanana gɛantáanta gá udúmbí bɛbáágá naá Asaŋa. Mɔ́ɔ mɔ́ɔnyɔ a mbaá lukúméné naá mmoɛná naá boayá bá ombɔ́gɔ onɔ́mɛ yá oŋgɛ́yɔ́ yá Bufuŋe[33].

²A yɔgɔnɔ naá gimmúmpúu gá hoóma, nɔ́ɔnɔ gó lɛ́ aá, naá mammana ya gincumu caá akɛ́ ya mɔtɔ go fóaga, kanɛ́ yɛ́ɛyɛ Daadáa a mbaá fóágá.

³Ufuŋe yá udúmbí bɛbáágá naá Asaŋa uŋkimée yó lɛ́ dílímínyéelú go go dúmbenye pááná na bɛbáágá; bó háanana goŋaá yɔ́ɔ tɔ́nɔ yó bɛa boóma bá go fáa go gɛbáágá.

⁴Aáŋa Kilítusu a mba lɛ́ naá cí, a dɛ mbáa lɛ ba go bɛ́ɛmba akɛ́ manɛ́ udúmbí bɛbáágá naá Asaŋa, goakɛ́ bóntió bá mba lɛ́ bá báá go gɔ́lɔ undukí moánɛ go go fáanana bɛbáágá aŋa gicele gɛ oyamɔ́.

⁵Kanɛ́ bedúmbí bɛbáágá naá Asaŋa bɔ́ɔbɔ, buelí bábɔ́ naá nnyaŋá ya Asaŋa bó mbaá lɛ gieninye, gifií gá bɛmammana bá moóma mɔ́ɔmɔ naá mmoɛná, aŋa gɛlɔsɛnɔ gɛ́ɛgɛ Asaŋa a mbaá fáá Mɔ́sɛsɛ go go fóaga gincumu. A mba lɛ́ mo oyánáalú amɔ́: «Ɛ́ná, o yɔgɔnɔ buelí buimée o bienene gieninye gɛ́ɛgɛ ndɔ́mɔ́ go dúfíelú naá ogɔndɔ[34].»

⁶Mammana, buelí bá Yésusu bó lɛ́ gɛkɔ́nɔ́nɔ́ɔ bó dómba hɔ́ɔlɔ́, goakɛ́, mɔ́ɔ a lɛ́ naá kadɛ́gadɛ́ɛ yɛ́ɛyɛ na Asaŋa na batɔ go go lada bugúle bá mammana bɔ́ɔbɔ bó dómbamɔ́, mbɔ́gɔ́ ya bɔ́ suméelú naá bɛmánya bá tánɔ.

⁷Aáŋa gɔ́ɔ gɛlada bugúle gá busío gɛ́ɛgɛ na batɔ gɛ́ mba lɔbɛ́nɔ́ kanɛ cigíi[35], gásɛ́ Asaŋa a lɛ́ kanɛ go gɛ́ núgie na gá gáandɛ́ɛ.

⁸Kanɛ́ bó lɔ́mɔ́ go bó goomɛna gɔ́ɔ Asaŋa a bó fáananamɔ́ a amɔ́: «Ɛ́ná nɔnɔ, medúgú má úlene, yɔmɔ́ɔ Daadáa, nná lada na ncíbo ya batɔ ya Ɛ́sɛlahɛ́ɛlɛ na ya Yóda, gɛpáa gá gɛlada bugúle.

⁹Bó do ná gɔnɔ bɛ́ɛmba aŋa bɔ́ɔbɔ mbaá ladá na biisée ba biisée kɔ́nɔ́ɔ bábɔ́, buisí bɔ́ɔbɔ mbaá bó gɔ́lɔ́ go ombɔ́gɔ go go bó húmie naá gɛdɔŋɔ gá Egíbítene. Go busío bá goŋaá bɔ́ɔ moatɛ́ moatɛ, bá lɛ́ kanɛ go lɔbɛnɔ naá gɛlada bugúle gámɛ, gɔ́ɔ, yɔmɔ́ɔ tɔ́nɔ, ndɔ́mɔ́ bó bembélídíelú. Daadáa mɔ́ɔ o oyamɔ́ nɔ́ɔnɔ.

¹⁰Gɛlada bugúle kanɛ́ gɛ́ɛgɛ nná ladamɔ́ na ncíbo ya batɔ bá Ɛ́sɛlahɛ́ɛlɛ go go bénebiginye nabɔ́ naá nnyimé ya medúgú mɔ́ɔmɔ gɛ́ lɔ́mɔ́ náana: Gɔ́ɔgɔ nná ŋamɔ́ mbó fáanana bicele bámɛ, bó lɔ́mɔ́ naá mbééníŋínyí sábɔ́, mbɛ́ dɛla naá odɛ́má yábɔ́, nná bɛ́ɛmba Asaŋa babɔ́, bɔ́ɔ, bá bɛ́ɛmba boɛ́nɔ bámɛ. Yɔmɔ́ɔ Daadáa, ŋgoyamɔ́ nɔ́ɔnɔ.

¹¹Ummue naá bɔ́ɔ a dɛ ŋgá gɔnɔ húunenye sɔ́gɔ́ɔ, ɛ́na ondimóní, a mo oyanɛna a amɔ́: Íyíme Daadáa! Ɛɛ́ɛŋ, biimée púmú bá ŋga ŋgíyímé, gihelege aŋa ogɔ́nɔ́.

¹²Mammana, nná bó héehinenye bɛoba na bɛlɔgɔ bábɔ́, cɛ ná gɔnɔ bɛ́ béeniŋenye[36].»

¹³Gɛpáa gá gɛlada bugúle gɛ́ɛgɛ Asaŋa o oyamɔ́ háalá, gɛ́ gundenye gɛ́ɛgɛ gá busío gɛcóa; kanɛ́ bɔ́ɔbɔ bó lɔ́mɔ́ bá cóá, gɔnɔ́ gilunú, bó lɛ́ pɛnɛ́ɛ go go yíme.