Read Nugunu Behébelée 9 Bible Online

Behébelée 9 - Nugunu bible

Behébelée 9

¹Naá gɛlada bugúle gá busío gɛ́ɛgɛ Asaŋa a mbaá ladá na batɔ, a mba bó dúfényée nɛ́ɛnɛ bá mbaá lɛ bá go mo búlugenye. Kɛ́gɛ́ná ya Asaŋa tɔ́nɔ ɛ mba lɛ́ hɔ́ɔ fóágáalú go go mo búlugenye kɔ́ɔ.

²Kanɛ́ Kɛ́gɛ́ná moánɛ, bó mbaá lɛ gincumu na cómba ɛ́handɛ́: Naá cómba ya busío anáa bá mbaá lɛ bá dɔ́ŋɔnɔ bá amɔ́ Gimmúmpúu gá Hoóma, mó mba lɛ́ kɔ́ɔ: gɛdálɛ́ná lámba, gɛdálɛ́ná na bɛlɛ́dɛ bá bɛbáágá.

³Naá cómba ya gáandɛ́ɛ, naá nnyimé ya sanda ya goodo, bá dɔ́ŋɔnɔ bá amɔ́ Mammana ya Gimmúmpúu gá Hoóma;

⁴mó mba lɛ́ kɔ́ɔ: gilókínyó baalabɛ́nda gedíelú na góolo tɔ́nɔ na gisímbí gá gɛlada bugúle lindényé lindényé púmú na góolo. Naá gisímbí gɛ́ɛgɔ gadɛ́ɛ, mó mba lɛ́ kɔ́ɔ: igúlúŋúndúu maáalú na góolo, manyáanya máama bá dɔ́ŋɔnɔmɔ́ bá amɔ́ mána má mbaá lɛ kɔ́ɔ, gidímbo gá Álɔŋɔ gɛ́ɛgɛ gɛ́ mbaá ágá bióli, gɔnɔ́ na bɛgɔ́gɔ́ bá gɛlada bugúle.

⁵Naá mmoɛná ya gisímbí, bieninye bá bɛɛ́ŋgɛlɛsɛ bɛ́andɛ́ bɛ́ dúfenye nigúmi ná Asaŋa bɛ́ kúbigenene hoóma há go úlenye bɛlɔgɔ, kanɛ́ háalá dɛ dɛ gɛɛ́ ɛ́dáná naá busío go go oya búmmue go búmmue[37].

⁶Aŋa muimée mó mbaá lɛ gedíelú nɔ́ɔnɔ bedúmbí bɛbáágá naá Asaŋa bá lɛ go ɛ́da go íŋenene naá cómba ya busío bɛcamɛna biimée go go yɔgɔnɔ buelí bábɔ́.

⁷Kanɛ́ naá cómba ya gáandɛ́ɛ, goana go ɔŋɛndɔ táŋɛ́ yúmmue go nnyómá, gɔ́ɔ goana ogɔ́nɔ́ɔ ba bedúmbí bɛbáágá naá Asaŋa a mbaá lɛ i íŋenene hɔ́ɔ. Aŋa i íŋenemú, a danda a fáa gɛbáágá gá manɔ́ŋɔ́ go bɛoba bɛ́hɛ́ bá moatɛ́, a lɛ go gɔnɔ fáa go bɛ́ɛbɛ bá boɛ́nɔ[38].

⁸Na moóma mɔ́ɔmɔ, Gimmúmpúu gá Giliíli a có dúfenye goŋaá aáŋa cómba ya busío ɛ gá lɛ́, pɛ́ ya go íŋene naá Mammana yá Gimmúmpúu gá Hoóma ɛ gá lɛ́ tɔ́nɔ buigéelú.

⁹Bɔ́ɔbɔ bó lɛ́ gieninye gá gɛcamɛna gɛ́ɛgɛ dɛ lɔ́mɔ́ kɔ́ɔ godɔ́ɔdɔ, goŋaá pááná na bɛbáágá bá manɔ́ŋɔ́ má nnyama mɔ́ɔmɔ bá mbaá lɛ bá fáanana Asaŋa mó do mbáa lɛ bá go dúgune mɔtɔ mɔ́ɔnyɔ a mbaá lɛ a yɔgɔnɔ buelí moánɛ goŋaá odɛ́má yɛ́hɛ́ yó bɛ́ɛmba bese.

¹⁰Buimée bɔ́ɔbɔ bó bádáfamɔ́ manyáanya, anyóa, na bɛsogona mbɔ́dɔ iŋkimée, mó lɛ́ goana biséégé bá batɔ, mó mba lɛ́ mó bɛanana bogaaga bá mɔ́ gó ɛ́da húme aŋa Asaŋa a mbaá lɛ bá go núgie na bá bofáa.

¹¹Kanɛ́ Kilítusu a mbu úle aŋa Ufuŋe yá udúmbí bɛbáágá naá Asaŋa go go nco có fáa besé sɛ́ɛsɛ sɛ́ úlenemú[39]. A mbi íŋéné naá gɛantáanta gá gincumu gá bese bese gɛ́ɛgɛ gɛ́ lɔ́mɔ́ gɛ́ dɛ bɛ́ɛ́mbá fóágáalú na ɛmbɔ́gɔ ya batɔ; gɔ́ɔgɔ gó lɛ́ aá, gɛ́ dɛ ɔ́bɛ́nɔ́nɔ́ɔ na cí yɛ́ɛyɛ.

¹²Gɔ́ɔgɔ Kilítusu a mbií íŋéné naá Mammana ya Gimmúmpúu gá Hoóma, a dɛ mbá fáa manɔ́ŋɔ́ má bibébí na má baaná bá gúlúge; a mbaá fáá manɔ́ŋɔ́ mɛ́hɛ́ má moatɛ́ go go có fáŋa go busío buimée.

¹³Manɔ́ŋɔ́ má bibébí na má bɛnɔ́mɛ bá gúlúge máama bá mbaá lɛ bá ságana batɔ bá bɛoba, gɔnɔ́, na madɔ́ɔ má ginnyeedíi gá gúlúge[40], mó mba lɛ́ mó bó íyenye bese naá oŋgíso yá Asaŋa, mó gunde mó soga nnyɔ́dɔ sábɔ́.

¹⁴Kanɛ́ nɛɛ́nɛ manɔ́ŋɔ́ má Kilítusu, mɔ́ɔ mɔ́ɔnyɔ a mbaá bííŋéné mɔ́ɔ moatɛ́ moatɛ go gɛbáágá naá Asaŋa go bogaaga bá Gimmúmpúu gá Giliíli, asáa gɔgɔ́ mɔ́ɔ kanɛ gɛoba, má ŋgaá lɔbɛ́nɔ́ kanɛ go soga bɛgáda bá meŋiigíe bá ɛdɛ́má yɛcɔ́, go go ɛ́dá naá busío dɛ yɔgɔnɛnɔ Asaŋa ogɔ́sɔ o?

¹⁵Go busío moánɛ gɔ́ɔ Kilítusu a lɔ́mɔ́ naá kadɛ́gadɛ́ɛ yɛ́ɛyɛ ɛ lɔ́mɔ́ na Asaŋa na batɔ go go góda gɛpáa gá gɛlada bugúle, gɛpáa gá tɛ́fá. Aáŋa Kilítusu a mba gúé, bó mbaá lɛ go go fáŋa batɔ go bɛoba bɛ́ɛbɛ bá mbaá ŋanánáa naá gɛcamɛna gá gɛlada bugúle gá busío. Kɔ́ɔ báaba Asaŋa a dɔ́ŋɔnɔmɔ́, bá dáŋabanamɔ́ tɛ́fá ya kanɛ mmanɛ́náa yɛ́ɛyɛ a mbaá dáná.

¹⁶Mammana anáa bá ŋamɔ́ tɛ́fá, bó úhene goŋaá mɔtɔ mɔ́ɔnyɔ a mbaá ŋaáa tɛ́fá a manɛ gúe.

¹⁷Tɛ́fá ɛ lɔ́mɔ́ na bogaaga naá gɛcamɛna gɛ́ɛgɛ mɔtɔ mɔ́ɔnyɔ a mbaá yɛ ŋaáa a báá ná manɛ́ go gúe, aáŋa caá nɔ́ɔnɔ, ɛ lɛ́ go dugúnú.

¹⁸Gó moánɛ, naá gɛlada bugúle gá busío, bó mbaá lɛ bó úhene goŋaá bá ságana manɔ́ŋɔ́ má nnyama.

¹⁹Gɔ́ɔgɔ Mɔ́sɛsɛ a mbaá maná go oyanɛna boɛ́nɔ buimée bɛlɔsɛnɔ aŋa gicele gɛ́ oyamɔ́, gɛ́hɛ́ go gɔ́lɔ manɔ́ŋɔ́ má baaná bá gúlúge na má bibébí, a báá nebígínyée na miimpo. Gɔ́ɔ a gɔ́lɔmɔ́ binúmpe bɛ́lɛ́ŋɛ́bɛlɛŋɛ bá gɛdómbáa na bifúge gedíelú na otáfɛ yá isópe, go ɛ́da go ságana kálata ya bicele na boɛ́nɔ kɛ́,

²⁰a gálagala a amɔ́: «Bɔ́ɔbɔ bó lɔ́mɔ́ manɔ́ŋɔ́ má gɛlada bugúle bɔ́ɔbɔ na Asaŋa nɛnyɔ́, no gumbene.»

²¹A báá ságánáa tɔ́nɔ manɔ́ŋɔ́ naá gincumu na moóma muimée má buelí bá nigúmi mɔ́ɔmɔ kɔ́ɔ.

²²Nɔ́ɔnɔ gó dúfenye goŋaá naá gooya gá gicele, bá sogonamɔ́ moóma gɛca na manɔ́ŋɔ́; kanɛ manɔ́ŋɔ́, ihéehinye há bɛoba hɛ́ dɛ báá naá boayá bá Asaŋa[41].

²³Moóma mɔ́ɔmɔ mó lɔ́mɔ́ bieninye bá bɛmammana bá moóma bɛ́ɛbɛ naá mmoɛná, gosogona gá mɔ́, gó mba lɛ́ go úhene mbɔ́dɔ ya goyɔgɔnɔ aŋa yɛ́ɛyɔ nɔ́ɔnɔ. Bó úhene kanɛ́ goŋaá bɛmmamana bá moóma bɛ́ɛbɛ naá mmoɛná bɛ́ moatɛ́ moatɛ, bá bɛ́ sogona na bɛmánya bá bɛbáágá bá manɔ́ŋɔ́ bɛ́ dómba hɔ́ɔlɔ́.

²⁴Kilítusu, mɔ́ɔ a lɛ́ kanɛ go íŋene naá Kɛ́gɛ́ná ya Asaŋa yɛ́ɛyɛ batɔ bá mbaá fóágá. Yɛ́ɛyɔ ɛ mba lɛ́ goana gieninye gá Kɛ́gɛ́ná ya mammana, a mbií íŋéné naá mmoɛná moatɛ́, go go dɛ́lɛmɛna go busío bɛ́cɔ́ naá boayá bá Asaŋa.

²⁵Kanɛ́ bó do mbáa lɛ goŋaá a gɛɛ́ ɛ́dá go fitefitie go bííŋene go gɛbáágá gá manɔ́ŋɔ́ aŋa Ufuŋe yá udúmbí bɛbáágá naá Asaŋa yó mbaá lɔmɔ́ yó íŋenene naá Kɛ́gɛ́ná na manɔ́ŋɔ́ máama má mbaá lɔmɔ́ má dɛ bɛ́ɛ́mbá mɛ́hɛ́.

²⁶Aáŋa gó mba lɛ́ nɔ́ɔnɔ, gásɛ́ a mba fitéfítíe go ɔ́bɛgɔnɔ gó dúme aŋa cí ɛ mbaá bayɛ́gá. Mɔ́ɔ, naá gɛcamɛna gá mesúgidinye gɔ́ɔ a mbaá bédúfíe, a báá bííŋéné go gɛbáágá gá manɔ́ŋɔ́ gɛ́hɛ́ gá moatɛ́ moatɛ go oŋɛndɔ táŋɛ́ yúmmue, gó mbaá lɛ go go menie gɛlɔgɔ.

²⁷Mɔtɔ a gúenene oŋɛndɔ táŋɛ́ yúmmue, naá nnyimé hɔ́ɔlɔ́, Asaŋa a sómba gɛsɛnɛ gɛ́hɛ́.

²⁸Tɔ́nɔ, Kilítusu a mba bííŋéné go gɛbáágá gá manɔ́ŋɔ́ oŋɛndɔ táŋɛ́ yúmmue, gó mbaá lɛ go go menie bɛlɔgɔ bá gɛcɛcá gá batɔ[42]. A ŋga ncó gunde go oŋɛndɔ yá gáandɛ́ɛ, caá akɛ́ gɔnɔ́ go gɛlɔgɔ, kanɛ́ go báaba bá mo gɛ́ganamɔ́ go go bɛa gisódio.