Read Nugunu Sáakɛ 1 Bible Online

Sáakɛ 1 - Nugunu bible

Sáakɛ 1

¹Yɔmɔ́ɔ Sáakɛ, uyogóní ba Asaŋa, uyogóní ba Daadáa Yésu Kilítu, ŋgaá nyó bédíígíe bɛɛnyɔ́ɔ boɛ́nɔ bá Asaŋa bɔ́ɔbɔ bó lɔ́mɔ́ sálámándáalú naá cí yɛ́ɛyɛ iŋkimée[1].

²Bolimóní bámɛ, gɛcamɛna giimée gɛ́ɛgɛ no lumenemú na gɛdɔmbɔ, gɔ́lɔ́ nɔnɔ gɛdɔmbɔ gɛ́ɛgɔ na bɛyaŋa.

³No íyimene, aáŋa gioliminyo gɛ́nyɔ́ gɛ́ lɛ́ gɛ́ndɛ́ŋɛ́gɛndɛŋɛ naá gɛdɔmbɔ, gɛdɔmbɔ gɛ́ɛgɔ gɛ́ nyó fáanana kélemene.

⁴Kanɛ́ ŋgáa kélemene yɛnyɔ́ moánɛ yɛ ɛ́dana gɔgɔ́ naá busío go goŋaá nó ba bɛ́ɛ́mbá kanɛ cigíi, no do taŋá bɛnɔ́gɔ́ bá caŋa naá bɛɛnyɔ́ɔ.

⁵Aáŋa mɔtɔ ummue naá bɛɛnyɔ́ɔ a dɛ bósó go íyimene ɛkádɛ gɛ́ɛgɛ a sɛmɛgananamɔ́ go ŋa, ŋgáa ɔ ɔŋɛnɔ Asaŋa nciŋí yɛ́ɛyɛ kɔ́ɔ, a gaá mo fáá[2], goakɛ́ Asaŋa a fáanɛna kanɛ go bide, kanɛ gɛmbɛ́ná.

⁶A sɛmɛganana go ɔŋɛnɔ na gioliminyo naá Asaŋa, kanɛ cuŋí, goŋaá mɔ́ɔnyɔ a suŋenenyemú a lɛ́ aŋa miimpo má máŋɛ́ máama puŋe ɛ búugebugiemú maayá miimée.

⁷Mbɔ́dɔ ya mɔtɔ aŋa yɛ́ɛyɔ nɔ́ɔnɔ ɛ dɛ fegé yɛ amɔ́ Daadáa a lɛ́ ba go mo fáa boóma bɔ́ɔbɔ a mo ɔŋɔnɔmɔ́.

⁸A lɛ́ egundegúndée naá gɛɔyɔ gɛ́hɛ́.

⁹Ŋgáa uŋgolímínyí mɔ́ɔnyɔ a lɔ́mɔ́ osógasoga a békelenye, goakɛ́ Asaŋa a á mo búlúgíe.

¹⁰Gɔnɔ́ ŋgáa uŋgolímínyí mɔ́ɔyɔ a lɔ́mɔ́ na bonɔ́mɛ a békelenye, goakɛ́ Asaŋa a á mo siisíe, i íyimene go goŋaá a ná gólogoda aŋa bióli bá mbínyí.

¹¹Gɔ́ɔgɔ aŋa buisí bó ɛ́damɔ́ bumuge na onɔmɔnɔmɔ yá bɔ́ yá gɛonyá, yó lɔ go kútie mbínyí, bióli bá sɛ́ bɛ́ bulugude, bonɔ́gɔ́ bá bɛ́ bó ságɛna. Nɔ́ɔnɔ gɔ́ɔ tɔ́nɔ onɔ́mɛnɔmɛ ba mɔtɔ a ŋgaá gúé naá kadɛ́gadɛ́ɛ ya medíge mɛ́hɛ́.

¹²Besé makɔ́nɔ́ na mɔtɔ mɔ́ɔnyɔ a kélemenenemú bɛdɔmbɔ, goakɛ́ naá nnyimé ya bɛdɔmbɔ bɛ́ɛbɔ gɔ́ɔ a ŋgaá bɛáa gɛɔyɔ, gɛ́ gɛ́ lɔ́mɔ́ bɛsoɛná bɛ́ɛbɛ Asaŋa a mbaá dánɛ́ná báaba bá mo maamanamɔ́.

¹³Gɔ́ɔgɔ mɔtɔ a lumenemú na ɛgogona, a dɛ háánánáa go oyɛda a amɔ́ Asaŋa mɔ́ɔ a mo sɔgɛdɔmɔ́. Mammana, mɔtɔ a dɛ bósó bá go bele Asaŋa go goŋaá a ŋa gɛbɛ́. Nɔ́ɔ gɔ́ɔ tɔ́nɔ Asaŋa a lɔ́mɔ́ a dɛ gogóná mɔtɔ.

¹⁴Kanɛ́ gɛdɛ́mádɛ́má gá mɔtɔ gɛ́ gɛ́ mo dómanamɔ́ go go ŋa gɛbɛ́.

¹⁵Aŋa mɔtɔ ɛ ɛ́damɔ́ go bienene gɛdɛ́mádɛ́má gɛ́hɛ́ aŋa gɛ́ mo dómanamɔ́, bó ná lɛ́ gɛlɔgɔ. A amɔ́ ɛ ɛ́danamɔ́ naá busío na go lɔgɔ, mesúgudinye mɛ́hɛ́ má lɔ́mɔ́ nigúe.

¹⁶Bolimóní bámɛ bá odɛ́má, no do bébelé.

¹⁷Pááná sá bonɔ́gɔ́ akɛ́báamɔ́ iŋkimée sɛ́ ɛ́damɔ́ go úlene naá mmoɛná, Asaŋa mɔ́ɔnyɔ a mbaá gedíe muotóti, ofɛ́, na buisí, mɔ́ɔnyɔ a lɔ́mɔ́ a dɛ núgényée, a dɛ fíídényée batɔ nnyimé go go bó dɛ́ɛna naá mbíno, mɔ́ɔ a lɔ́mɔ́ na sɛ́.

¹⁸Go ndɛ́ga yɛhɛ́ gɔ́ɔ a mbaá có fáá gɛɔyɔ go nogálɔ nɛ́hɛ́ ná mammana. Go goŋaá dɛ bɛ́ɛmba bá busío naá moóma muimée mɔ́ɔmɔ a mbaá gedíe.

¹⁹Bɛɛnyɔ́ɔ bolimóní bámɛ bá odɛ́má, íyíme nɔnɔ no amɔ́: Mɔtɔ a háanana go dámba edúu fɛaŋɔ go go bódólonyo basɔ́gɔ́ɔ, a dɛ gá lɛ́ gálɛda, a dɛ gá lɛ́ go ɔ́bɔ mpímí.

²⁰Mɔtɔ mɔ́ɔnyɔ ɔ ɔ́bɔmɔ́ mpímí a dɛ ŋanánáa boóma bá tɛ́nɛ́ɛ naá busío bá Asaŋa.

²¹Boóma bá ndiemi bɔ́ no háananamɔ́ go búumbene biílo biimée na buimée bɔ́ɔbɔ bó lɔ́mɔ́ bá gɛbɛ́; no bésiisie nnyɔ́dɔ go cí naá busío bá Asaŋa, no gɛ́ndɛgɛna Nogálɔ nɛ́hɛ́ nɔ́ɔnɔ a áganamɔ́ naá bɛnyɔ́ odɛ́má, goakɛ́ Nogálɔ nɛ́hɛ́ nó bɛanana bogaaga bá go nyó sódio.

²²No do bódólónyóo goana go mbódólonyo bɔ́ɔbɔ Asaŋa a nyó oyanɛnamɔ́, no do bébelé, no sɛmɛganana tɔ́nɔ go bó ŋanana.

²³Mɔtɔ mɔ́ɔnyɔ a bódólonyomú nogálɔ ná Asaŋa goana go mbódólonyo, kanɛ go ŋa aŋa nó oyamɔ́ a lɛ́ aŋa mɔtɔ mɔ́ɔnyɔ a bénúunemú naá gɛbálɛ́ŋana, a bénúune aŋa a lɔ́mɔ́.

²⁴Akɛ́ aŋa a báá ná bénúúnée nɔ́ɔnɔ, aŋa a fíidiemú nnyimé, hɔ́ɔ na hɔ́ɔ a bófoolio aŋa a báá ná lɔmɔ́.

²⁵Kanɛ́ mɔtɔ mɔ́ɔnyɔ a hɛnyahɛnyamɔ́ bicele bá Asaŋa bese bese a gunde a ŋanana aŋa bɛ́ oyamɔ́, mɔ́ɔ Asaŋa a ná mo fonamɔ́ go busío moánɛ naá gɛɔyɔ gɛ́hɛ́. A dɛ háánánáa go bódólonyo goana go mbódólonyo a bófoolio, kanɛ́ a háanana go ɔ́bɛnɔ.

²⁶Aáŋa mɔtɔ a béeniŋenye a amɔ́ a lɛ́ mammana ya uŋgolímínyí, kanɛ́ a báá lɔbɛ́nɔ́ a dɛ gumbéné nyuudé nɛ́hɛ́, a bébelebele, mbɔ́dɔ yɛhɛ́ ya goolimonyo ɛ lɛ́ go dugúnú.

²⁷Mammana ya go olimonyo ya kanɛ cigíi yɛ́ɛyɛ Asaŋa Isée a lɛ́galɛgamɔ́ ɛ lɔ́mɔ́: Goóhigonyo gá cíinini na bisí bá batɔ gɛcamɛna gɛ́ɛgɛ bá lɔ́mɔ́ naá goɔ́bɛgɔnɔ[3]. Ŋgáa tɔ́nɔ a bébeŋe go goŋaá bɛgáda bá moóma bɛ́ɛbɛ naá cí yɛ́ɛyɛ bɛ́ dɛ mo díéŋíe.