Read Nugunu Sáakɛ 2 Bible Online

Sáakɛ 2 - Nugunu bible

Sáakɛ 2

¹Bolimóní bámɛ, bɛɛnyɔ́ɔ báaba no áganamɔ́ odɛ́má yɛ́nyɔ́ naá Daadáa bɛcɔ́ Yésu Kilítu mɔ́ɔnyɔ a gúmemú a dómbana boóma buimée, no do ɛ́dá go gɔnɔ go iye batɔ[4].

²Ŋgáa dɛ gɔ́lɔ gieninye gɛ́ɛgɛ: no lɛ́ ndukíi ndukíi naá nɛganda ná gioliminyo, batɔ báandɛ́ bá lɛ go úle bá bíi íŋéné, ummue bálɛŋá bálɛŋá bese bese, mmándɔ sá góolo naá monɔɔ́nnɔɔ́; mɔ́ɔnyɔ untió osógasoga na biyeyi bá bɛla go nnyɔ́dɔ.

³Bɛɛnyɔ́ɔ no lo go ága oŋgíso go mɔ́ɔnyɔ a lɔ́mɔ́ bálɛŋá bálɛŋá bese bese, no amɔ́ gɛ́hɛ́ aá: «Ogɔ́nɔ́ɔ, maamɔ́ɔ úlé ncó lukumene naá busío háalá.» No lo go oyana osógasoga no amɔ́: «Maamɔ́ɔ lɔbɛ́nɔ tɛ́nɛ́ɛ hɔ́ɔlɔ́, ɛ́na lí ncó lukumene go cí háalá.»

⁴No amɔ́ no ŋa nɔ́ɔnɔ, no á dúfíe go goŋaá no iye batɔ, no lɛ́ batɔ báaba bá lɔ́mɔ́ na bɛbɛ́ bá mbééníŋínyí bá go dádona naá gosómba gɛ́nyɔ́ gá bɛsɛnɛ.

⁵Bolimóní bámɛ bá odɛ́má, ɔ́bɔ́ nɔnɔ: Asaŋa a mba dómbáa go lɔɔ basógasoga naá cí yɛ́ɛyɛ go goŋaá bó oliminyo Yésu Kilítu, bá bɛa mammana ya bonɔ́mɛ yɛ́ɛyɛ naá gioliminyo, bá gɔnɔ dáŋaba Bufuŋe bá Asaŋa bɔ́ɔbɔ a mbaá dánɛ́ná báaba bá mo maamanamɔ́.

⁶Kanɛ́ bɛɛnyɔ́ɔ no sesesesie basógasoga! Ábɔ caá bɛnɔ́mɛ bá batɔ bɛ́ɛbɔ bɛ́ bɛ́ nyó óbigonyomú o? Caá bɛ́ bɛ́ ɛ́danamɔ́ nɛnyɔ́ naá ncíbo sá mógáláa o?

⁷Caá bɛ́ bɛ́ gálamɔ́ dobɛ́ go gɛnɔ́gɔ́ gá ufíno gá Yésusu mɔ́ɔnyɔ Asaŋa a mbaá nyó fáá go goŋaá no bɛ́ɛmba boɛ́nɔ bɛ́hɛ́ o?

⁸Kanɛ cuŋíi, aáŋa no hóogonyo gicele gá Bufuŋe, aŋa gɛ́ lɔ́mɔ́ ɔ́ŋɔ́ɔlú náana: o maamana sɔ́gɔ́ɔ aŋa maamɔ́ɔ moatɛ́, no ŋanana bese.

⁹Kanɛ́ no amɔ́ no ɛ́da go iye batɔ, no ŋanana gɛoba, gicele gɛ́ nyó gumbenene go goŋaá no á gɛ́ bácaáa.

¹⁰Akɛ́ mɔtɔ a hóogonyo bicele biimée bɛ́ɛbɛ Asaŋa a mbií íŋéné, a amɔ́ a báca akɛ́ gímmue, a á bácaáa biimée.

¹¹Mammana, mɔ́ɔnyɔ a mboó oyɛ́dá a amɔ́: «O do ŋaáa gɛdáŋa», a mbo oyɛ́dá tɔ́nɔ a amɔ́: «O do óná mɔtɔ[5]!» Gɔ́ɔ bó lɔ́mɔ́, akɛ́ o do ŋaáa gɛdáŋa, go amɔ́ go óna mɔtɔ, go á dómbá gicele.

¹²Gálágáláa nɔnɔ, no ŋanana, no íyime go goŋaá Asaŋa a ná nyó bide na gicele gɛ́ɛgɛ gɛ́ lɔ́mɔ́ na bogaaga bá go có dúgune.

¹³Mammana, naá gɛcamɛna gá umbidí, mɔtɔ mɔ́ɔnyɔ a lɔ́mɔ́ kanɛ go ɛ́na basɔ́gɔ́ɔ mahana, Asaŋa a dɛ ŋgá mo ɛ́na tɔ́nɔ mahana; kanɛ́ mɔtɔ mɔ́ɔnyɔ a gɔ́lɔnɔmɔ́ basɔ́gɔ́ɔ mahana, a dɛ dagádánáa naá busío bá usúmbí bɛsɛnɛ, goakɛ́ mahana má Asaŋa má dómbana buimée.

¹⁴Bolimóní bámɛ, bó do dúgúnée mɔtɔ goŋaá o oyɛda a amɔ́ a ágana odɛ́má yɛ́hɛ́ naá Asaŋa aáŋa a dɛ ŋanánáa moóma mɔ́ɔmɔ mó dúfenyemú nɔ́ɔnɔ. Mbɔ́dɔ ya gioliminyo moánɛ ɛ dɛ sódónyóo.

¹⁵Ŋgáa dɛ eninye goŋaá: ondimóní bɛnyɔ́ naá gioliminyo a lɛ́ nnyɔ́dɔ gɔdɔɔ́, mɔ́ɔ kanɛ boóma bá go nyáa.

¹⁶Kanɛ́ ummue naá bɛɛnyɔ́ɔ a lɛ go mo oyana a amɔ́: «Go ɛ́da bese, o bóósobonyo, o nyáanya o hóogio.» Bó gaá ná mo dúgúné goakɛ́ aáŋa a dɛ mo fáá boóma bɔ́ɔbɔ a baŋamɔ́?

¹⁷Nɔ́ɔnɔ gɔ́ɔ gioliminyo gɛ́ lɔ́mɔ́ aáŋa gɛ́ lɛ́ kanɛ meŋiigíe, gɛ́ moatɛ́ gɛ́ lɛ́ godugúnú.

¹⁸Ŋgáa dɛ oyɛda dɛ amɔ́: mɔtɔ ummue a amɔ́ a gálɛda a amɔ́: «Maamɔ́ɔ o lɛ́ na gioliminyo, yɔmɔ́ɔ na meŋiigíe.» Yɔmɔ́ɔ caá: «Túfíemú gioliminyo gáhɔ kanɛ meŋiigíe, yɔmɔ́ɔ ko dúfie gioliminyo gámɛ na meŋiigíe.»

¹⁹Aáŋa go olimonyo goŋaá Asaŋa a lɛ́ táŋɛ́ ummue, bó lɛ́ bese; akɛ́ bɛgáda bá biliíli bɛ́ olimonyo tɔ́nɔ nɔ́ɔnɔ, bɛ́ dagadana na bofoá[6].

²⁰Maamɔ́ɔ olelí odóɛ mɔ́ɔnyɔ! O lɛ́galɛga go ɔ́bɔ go amɔ́ gioliminyo kanɛ meŋiigíe gɛ́ lɛ́ go dugúnú lí?

²¹Ŋkádɛ gɛ́ mbaá ŋaáa kanɛ́ go goŋaá Asaŋa ɛ ɛ́na isée kɔ́nɔ́ɔ bɛcɔ́ Ábalaháma gɛtɛ́nɛ́ɛ gá mɔtɔ o? Bó mbaá lɛ go meŋiigíe mɛ́hɛ́ gɔ́ɔgɔ a mbaá gɔ́lɔ́ ohaŋa bɛhɛ́ Ɛ́saga, a báá mo dálá naá gɛdálɛ́ná go go íŋene Asaŋa aŋa gɛbáágá[7].

²²Ɛ́ná goŋaá gioliminyo gɛ́hɛ́ na meŋiigíe mɛ́hɛ́ mó mba lɛ́ mó ɛnda cɔ́bɛcɔ́bɛ, gɔnɔ́ go meŋiigíe mɛ́hɛ́ gɔ́ɔ gioliminyo gɛ́hɛ́ gɛ́ mbaá bédúfíe mammana.

²³Nɔ́ɔ gɔ́ɔ boóma bɔ́ɔbɔ Ŋgɔ́ŋɛ́ yɛ oyamɔ́ bó bédúfenyemú: «Ábalaháma a mba ágá odɛ́má yɛ́hɛ́ naá Asaŋa, go busío bá ndiemi bɔ́ Asaŋa a mbaá mo ɛ́ná gɛtɛ́nɛ́ɛ gá mɔtɔ, a báá mo dɔ́ŋɛ́nɔ́ a amɔ́: “Ugúle bamɛ.”»

²⁴No ɛ́nana kanɛ́, Asaŋa ɛ ɛ́nanamɔ́ mɔtɔ gɛtɛ́nɛ́ɛ go meŋiigíe máama má úlenemú naá gioliminyo, caá akɛ́ go gioliminyo gɛ́ aá gɛ́.

²⁵Bó mba bɛ́ɛ́mbá tɔ́nɔ nɔ́ɔnɔ go odáŋadaŋa ba okɔ́dɔ mɔ́ɔnyɔ Aláhaba. Asaŋa a mba mo ɛ́ná gɛtɛ́nɛ́ɛ go meŋiigíe mɛ́hɛ́ go gɔ́ɔgɔ a mbaá beŋé batɔ bá gɛlɛ́ŋa bá Beyúdene naá mɔ́ nnyaŋá, a báá bó indíe naá pɛ́ intió go go gúluge bá dɛ bó ɛ́ná[8].

²⁶Gɔ́ɔ bó lɔ́mɔ́ caŋa táŋɛ́ mmue, aŋa nnyɔ́dɔ yɛ́ɛyɛ ɛ lɔ́mɔ́ kanɛ gɔnɔ́ giliíli ɛ lɔ́mɔ́ kúe, nɔ́ɔ gɔ́ɔ tɔ́nɔ gioliminyo gá kanɛ meŋiigíe gɛ́ lɔ́mɔ́ godugúnú.