Read Nugunu Sáakɛ 3 Bible Online

Sáakɛ 3 - Nugunu bible

Sáakɛ 3

¹Bolimóní bámɛ, no do fúmbée go goŋaá degédegé naá kadɛ́gadɛ́ɛ yɛnyɔ́ yɛ ɛ́ya muloodio. No íyimene no amɔ́ gosómba gá gɛsɛnɛ gá bɛɛcɔ́ɔ báaba dɛ loodonyomú gó ŋga bɛ́ɛ́mbá na bogaaga makɔ́nɔ́ gó dómba gɔ́ɔgɔ bá ŋgaá sómbá gá batɔ bóntió.

²Bɛɛcɔ́ɔ biimée dɛ ŋanana biédie gɛca. Aáŋa mɔtɔ a dɛ ŋanánáa giédie naá bɔ́ɔbɔ a gálagalamɔ́, a lɛ́ mammana ya mɔtɔ, a lɛ́ ba go bégumbene uŋkimée bɛhɛ́.

³Gɔ́ɔgɔ dɛ áganamɔ́ nnyádɛ ikíkísi há gɛkɔ́ŋɔ go nyuudé, bó lɔ́mɔ́ go goŋaá ɛ có ɔ́bɛnɔ, dɛ gunde dɛ indenye nnyɔ́dɔ ya yɛ́ iŋkimée akɛ́ ɛ búe mbɔ́dɔ ɛhanɛ́ɛ.

⁴Ɛ́ná nɔnɔ gɔnɔ́ sitíme, akɛ́ ɛ bɛ́ɛmba gɛantáa nɛɛ́nɛ, gɛantá gá ufufu gɛ́ gunde gɛ́ yɛ dídigene, goana moɔnɔ́ ba gɛbosa naá nnyimé ya yɛ́ mɔ́ a yɛ indenyemú go golɛ́galɛga gá ugógí.

⁵Nɔ́ɔ gɔ́ɔ tɔ́nɔ gɛlɛ́mbɛ gɛ́ lɔ́mɔ́; akɛ́ aŋa gɛ́ lɔ́mɔ́ sɔŋɛ naá nyuudé ná mɔtɔ, gɛ́ bébúlugenye go bɛantá bá moóma. No ɛ́nana aŋa moɔnɔ́ ba gɛlɛ́mbɛ gá íyuke a lɔ́mɔ́ ba go lókonyo gɛsaádaga gá bodɛ́agadɛ́ giimée púmú.

⁶Gɛlɛ́mbɛ gɛ́ lɛ́ aŋa íyuke. Bobɛ́ bá cí yɛ́ɛyɛ iŋkimée bó lɛ́ naá gɛ́. Gɛ́ lɛ́ gɛnamá gímmue naá nnyɔ́dɔ yɛcɔ́, gɛ́ sélemendenye bobɛ́ bɔ́ɔbɔ buimée naá nnyɔ́dɔ yɛcɔ́, bó yɛ díeŋenye. Gɛ́ fóana íyuke hɛ́ɛhɛ hɛ́ díeŋenyemú gɛɔyɔ gá mɔtɔ go busío buimée, goakɛ́ hɛ́ ɛ́damɔ́ go úlukenye naá gɛbɔlɔ́gɔdɔ gá íyuke há kanɛ go fúenene.

⁷Mɔtɔ a gumbenenemú nnyama sá bɛsɔgɔ, munoní, nnyɔ́gɔ na nnyama sá miimpo.

⁸Kanɛ́ mɔtɔ a dɛ báá ba go gumbene gɛlɛ́mbɛ gɛ́hɛ́, gɛ́ lɛ́ ogɔnɔ́ yá kanɛ kóódínyóo; gɛlɛ́mbɛ gɛ́ lɛ́ dácɛ na ɛlɔgɔ há go ónanɛna.

⁹Na gɛlɛ́mbɛ, dɛ búlugenye Asaŋa Daadáa bɛcɔ́. Na gɛ́ gɔnɔ́, dɛ yɔmɔ batɔ báaba Asaŋa a mbaá gedíe go púényí yɛhɛ́[9].

¹⁰Na nyuudé nímmue eé nímmue dɛ fona dɛ gunde dɛ yɔmɔ. Bolimóní bámɛ, dɛ dɛ háánánáa go ŋanana nɔ́ɔnɔ.

¹¹Miimpo má bese na miimpo má go noanana mó do bósó má go húmene naá nobɛ́láa númmue eé númmue akɛ́ sɔŋɛ.

¹²Bolimóní bámɛ, búkodóo bó do báá ba go úme álɔndɔ, tɔ́nɔ bufédú bó do báá ba go úme bíkodóo. Nɔ́ɔ gɔ́ɔ tɔ́nɔ miimpo má bese má lɔ́mɔ́ má dɛ bósó ba go húmene naá nobɛ́láa ná miimpo má go noanana.

¹³Kanɛ́ aáŋa mɔtɔ ummue naá bɛɛnyɔ́ɔ a béeniŋenye a amɔ́ a lɛ́ na nciŋí makɔ́nɔ́, ŋgá a yɛ dúfie naá gobɔ́gɔ́lɔnɔ gɛ́hɛ́, a ŋanana bisi bá moóma go nciŋí yɛhɛ́, a bésiisenye.

¹⁴Kanɛ́ aáŋa no lɛ́ na gɛbɛ́ gá hɛagá na ndoŋá ya go mánɛgana basɔ́gɔ́ɔ, no fúmbe goana besé yɛnyɔ́ ya moatɛ́, no do háánánáa go béségi, no do inyé mammana.

¹⁵Mbɔ́dɔ ya nciŋí aŋa yɛ́ɛyɔ nɔ́ɔnɔ ɛ dɛ ɛ́dá go úlene naá Asaŋa, bó lɔ́mɔ́ goana nciŋí ya cí yɛ́ɛyɛ, nciŋí ya batɔ, nciŋí ya ohándá.

¹⁶Hoóma háaha gɛbɛ́ gá ndoŋá ya hɛagá na gománɛgana basɔ́gɔ́ɔ mó lɔ́mɔ́ hɔ́ɔ, moóma mó do ɛndáa hɔ́ɔ bese akɛ́ sɔŋɛ, gó gunde moóma mobɛ́ mó báŋanana tɔ́nɔ hɔ́ɔ.

¹⁷Kanɛ́ nciŋí ya go ɛ́da go úle naá Asaŋa ɛ lɛ́ goana bese aá bese, ɛ fáanana buumbénú naá kadɛ́gadɛ́ɛ ya batɔ, ɛ dɛ bébúlúgényée, ɛ gɔ́lɔnɛnɔ mahana, ɛ ŋanana bisi bá moóma kanɛ go iye, kanɛ makoɛla.

¹⁸Batɔ báaba bá lɔ́mɔ́ na buumbénú, bá gunde bá fáanana basɔ́gɔ́ɔ buumbénú, buelí bábɔ́ bɔ́ɔbɔ bá yɔgɔnɔmɔ́ bó úme bɛnɔ́gɔ́ bá bɛsamɔ́.