Read Nugunu Sáakɛ 5 Bible Online

Sáakɛ 5 - Nugunu bible

Sáakɛ 5

¹Godɔ́ɔdɔ yɛ́ɛyɛ háalá, bɛɛnyɔ́ɔ banɔ́mɛnɔmɛ, dámbá nɔnɔ edúu no ɔ́bɔ! Baŋáa nɔnɔ ukelú naá mmoɛná go busío bá bɛɛmba bɛ́ɛbɛ bɛ́ nyó ɛndanɛnamɔ́!

²Bonɔ́mɛ bɛ́nyɔ́ bó lɛ́ yɛkáyɛká, nɛnyáa nɛ́ báá fágáa bɛla bɛ́nyɔ́.

³Ŋgéŋeŋée sɛ́ á bogódónyóo góolo yɛnyɔ́ na muinyí mɛ́nyɔ́[12]; ŋgéŋeŋée sá ndiemi sɛ́ sɛ́ ŋgaá nyó baláa, sɛ́ bogodonyo nnyɔ́dɔ sɛ́nyɔ́ aŋa íyuke. No á ncó bándɛna bonɔ́mɛ naá medúgú má cí go mana.

⁴No lɛ́ inyéelú go soɛna boyogóní báaba bá yɔgɔnɔmɔ́ ntɛ́mɛ́ sɛ́nyɔ́ go gɛbɛ́ gá odɛ́má[13]. Ɔ́bɔ́ nɔnɔ aŋa bá baŋamɔ́! Mbií sábɔ́ sɛ́ ɛ́dá bola naá edúu yá Daadáa ba mmoɛná na ba cí iŋkimée.

⁵No ɔ́ ɔyɔ́ɔ naá besé na naá bonɔ́mɛ naá cí yɛ́ɛyɛ. No báá bédúgée no báá nɛmɛ́náa aŋa bidúgé bɛ́ɛbɛ bá nɛ́ ɛ́danamɔ́ na bɛ́ naá nɛóna.

⁶No lɛ́ fáalú besi gɛoba, no báá bó ónáa, bɔ́ɔ kanɛ go nyó báaŋɛga.

⁷Boɔmɛ, bégumbénéemú nɔnɔ odɛ́má bó ɛ́da go éme naá goncogunde gá Daadáa. Caŋa mmue aŋa uyogóní ntɛ́mɛ́ a bégumbenenemú odɛ́má a gɛ́gana dobólá dá busío na dá mesúgudinye goŋaá dó naa, cí ɛ mo fáa bɛnɔ́gɔ́ bá masámá[14].

⁸Bɛɛnyɔ́ɔ tɔ́nɔ bégumbénéemú nɔnɔ odɛ́má yɛ́nyɔ́ na bogaaga, goakɛ́ goncogunde gá Daadáa gó ná lɛ́ mekúígíi.

⁹Boɔmɛ, no do dúménínée goŋaá Asaŋa a dɛ nyó sómbɛ́ná gɛsɛnɛ. Ɛ́ná nɔnɔ, usúmbí bɛsɛnɛ a lɛ́ moánɛ naá busío bá ncíbo.

¹⁰Boɔmɛ, gɔ́lɔ́ nɔnɔ gieninye gá mbégumbene odɛ́máa naá gɛɔ́bɛgɔ naá mbúsí sá Asaŋa.

¹¹Dɛ oya goŋaá sɛ́ lɛ́ na mmagɔ goŋaá sɛ́ mba bégumbéné odɛ́má bese bese. No mbɔ ɔ́bɔ́ gobégumbene gá odɛ́má gá Yóobe gɛcamɛna gɛ́ɛgɛ a mbaá lɔmɔ́ ɔ ɔ́bɛgɔnɔ, no báá gɔnɔ́ go ɔ́bɔ aŋa Asaŋa a mbaá mo ŋaáa naá nnyimé ya gɛɔ́bɛgɔ gɛ́hɛ́. No ɛ́nana goŋaá Asaŋa a lɛ́ dácɛ na odɛ́má yá besé na na odɛ́má yá mahana[15].

¹²Boɔmɛ, búncoó bɔ́ɔbɔ bó dómbamɔ́ bó lɔ́mɔ́ goŋaá no do bálɛáa, akɛ́ mmoɛná, akɛ́ cí, akɛ́ kasɛ́á mbálɛɛná incodío. Kanɛ́ ŋgáa «ɛɛ́ŋ» bɛnyɔ́ a sɛmɛgana gɛcamɛna gɛ́ɛgɛ no báá nó olímínyóo, «akɛ́ɛ» bɛnyɔ́ a sɛmɛgana gɛcamɛna gɛ́ɛgɛ no báá ná sáŋóná, go goŋaá Asaŋa a dɛ nyó sómbɛ́ná gɛsɛnɛ[16].

¹³Aáŋa ummue naá bɛɛnyɔ́ɔ ɔ ɔ́bɛgɔnɔ, ŋgáa a bósógolonyo. Aáŋa a lɛ́ naá bɛyaŋa, ŋgáa a ágana ɛsagɔ ya mbúlugie.

¹⁴Aáŋa ummue naá bɛɛnyɔ́ɔ a nóma, ŋgáa a dɔ́ŋɛnɔ bafɛanɔ́ɔ bá giimbó gá bakɛlɛ́tɛnɛ, bá nco bósógolonyo go busío bɛ́hɛ́ bá mo fúe megúdé go ufíno yá Daadáa[17].

¹⁵Mbósógólí ya gioliminyo ɛ goó oyóo ogɔnɔ́gɔnɔ, Asaŋa a mo éŋugie, aáŋa a á ŋaáa gɛlɔgɔ, a mo héehinye.

¹⁶Bóoyánɛ́nánɛ́náamɔ́ nɔnɔ kanɛ́ bɛlɔgɔ bɛ́nyɔ́, no gunde na mɔ́ɔnyɔ a bósógolonyo go busío bá sɔ́gɔ́ɔ, goŋaá no éŋugene. Mbósógólí ya gɛtɛ́nɛ́ɛ gá mɔtɔ ɛ ŋanana bɛantáanta bá moóma.

¹⁷Elíi a mba lɛ́ tɔ́nɔ mɔtɔ gɔgɔ́ aŋa bɛɛcɔ́ɔ: a mba bósógólónyóo Asaŋa odɛ́má yɛ́hɛ́ uŋkimée goŋaá nobólá nó do naáa, gɔ́ɔ dobólá dó mbaá dɛ́lɛ́mɛ́ná nnyómá ɛ́dadɔ́ na gigísi dó do naáa naá cí.

¹⁸Kanɛ́ naá nnyimé hɔ́ɔlɔ́, gɛ́hɛ́ go gɔnɔ bósógolonyo go goŋaá nobólá nó naa, dobólá gá dɔ́ go nco gunde, cí ɛ báá fáá manyáanya[18].

¹⁹Boɔmɛ, aáŋa ummue naá bɛɛnyɔ́ɔ a á naná a báá síé pɛ́ ya mammana, ondimóní untió a báá ncó mo gundie naá pɛ́ ya ndiemi,

²⁰íyímé nɔnɔ no amɔ́ mɔ́ɔnyɔ a ncomɔ́ gunde na ulogílógí naá pɛ́ ya bese yɛ́ɛyɔ, a ná sódio giliíli gá ulogílógí mɔ́ɔnyɔ go nigúe, a gɔnɔ ŋa go goŋaá gɛcɛcá gá bɛlɔgɔ gɛ́ bɛ́ɛmba hééhínyéelú[19].