Read Nugunu 1 Píele 1 Bible Online

1 Píele 1 - Nugunu bible

1 Píele 1

¹Yɔmɔ́ɔ Píele, apótɛlɛ ba Yésu Kilítu, ŋgɔ́ŋɛnɔmɔ́ batɔ báaba Asaŋa a mbií iyídé, bɔ́ ɔyɔmɔ́ naá osalɔ, sálámándáalú naá bigísi bá cí bá Pɔ́ŋɔ, bá Gelesíi, bá Kapadósɛ, bá Esíi na bá Bitiníi.

²Gɔgɔ́ aŋa Asaŋa Isée a mbaá kɛsɛ́dá otóotoɛ, nɔ́ɔ gɔ́ɔ a mbaá nyó iyídé, a báá nyó yáŋóná, go bogaaga bá Gimmúmpúu gá Giliíli, go goŋaá no ɛ́da go ɔ́bɛnɔnɔ na Yésu Kilítu, manɔ́ŋɔ́ mɛ́hɛ́ má nyó sogona. Ŋgáa Asaŋa a nyó boogo, a nyó fáa buumbénú fundufundu.

³Ŋgáa dɛ búlugenye Asaŋa, Isée ba Daadáa bɛcɔ́ Yésu Kilítu. Go gɛantáanta gɛ́hɛ́ gá ŋgɛ́na mahana, a báá ŋaáa goŋaá dɛ gɔnɔ bébíene, dɛ bɛa toodo odɛ́máa yɛ́ɛyɛ ɛ lɔ́mɔ́ ɛ dɛ gúénénée, gá Yésu Kilítu mɔ́ɔnyɔ a mbaá mo fúfúné naá begúe.

⁴Dɛ bɛa tɔ́nɔ bonɔ́mɛ bá bigíndé bɔ́ɔbɔ bó lɔ́mɔ́ bó do yɛkáa, bó do gɔ́lɔ́nɔ́ɔ biílo, bó do núgényée nɛnɔ́gɔ́. Bonɔ́mɛ moánɛ, Asaŋa a nyó bɛ́dɛganɛna naá mmoɛná,

⁵bɛɛnyɔ́ɔ báaba Asaŋa a nyó beŋebeŋemú na bogaaga bɛ́hɛ́ go gioliminyo gɛ́nyɔ́ goŋaá no bɛa gisódio gɛ́ɛgɛ gɛ́ lɔ́mɔ́ pɛnɛ́ɛ go go bóloodio dalaŋanyɛ naá gomana gá cí.

⁶Go busío moánɛ, aŋgánáa nɔnɔ na bɛyaŋa, akɛ́ bó húme goŋaá gɛcamɛna kanɛ go dómba, no lumenene na bɛdɔmbɔ mbɔ́dɔ iŋkimée.

⁷Bɛdɔmbɔ bɛ́ɛbɛ no lumenenemú na bɛ́ bɛ́ɛbɔ, bɛ́ lɔ́mɔ́ go go ɛ́na aáŋa gioliminyo gɛ́nyɔ́ gɛ́ lɛ́ mammana; akɛ́ góolo yɛ́ɛyɛ ɛ lɔ́mɔ́ boóma bá go dɛ́aŋadɛaŋa, bá yɛ séncugenye naá íyuke go go ɛ́na aáŋa ɛ lɛ́ mammana. Bó lɔ́mɔ́ nɔ́ɔ caŋa mmue na gioliminyo gɛ́nyɔ́ gɛ́ɛgɛ gɛ́ lɔ́mɔ́ ntɔ́nɔ gɛ́ dómba góolo. Nɔ́ɔ gɔ́ɔ no ŋgaá bɛáa bileebie, mbúlugie na nigúmi naá buisí bá goncogunde gá Yésu Kilítu.

⁸No mo maamana, bɛɛnyɔ́ɔ kanɛ go mo ɛ́na, no ágana odɛ́má yɛ́nyɔ́ naá mɔ́ɔ, bɛɛnyɔ́ɔ kanɛ go mo ɛ́na gɔnɔ́[1]; boóma moánɛ bɔ́ no ɔ́bɔnɔmɔ́ bese makɔ́nɔ́, no aŋganamɔ́ na bɛyaŋa bá nigúmi bá kanɛ go oya,

⁹aŋa no bɛamɔ́ gisódio gɛ́ɛgɛ gɛ́ lɔ́mɔ́ aŋa bɛsoɛná bá gioliminyo gɛ́nyɔ́.

¹⁰Mbúsí sá Asaŋa sá cóá sɛ́ mba gɔ́lɛ́nɔ́ go fúmbe, sɛ́ hɛnyahɛnya go go lɛnca nɛ́ɛnɛ Asaŋa a mbaá lɛ ba go sódio batɔ; sɛ́ mba lɛ́ sɛ́ dóogonyo gɛnɔ́gɔ́ gá boóma gɛ́ɛgɛ Asaŋa a mbaá nyó gedínyée.

¹¹Na Giliíli ba Kilítusu mɔ́ɔnyɔ mbúsí sá Asaŋa sɛ́ɛsɔ sɛ́ mbaá lɛ nɛhɛ́, sɛ́ mba lɛ́ sɛ́ oya makánya máama Kilítusu a mbaá lɛ ba go bɛa, na nigúmi nɛ́ɛnɛ nɛ́ mbaá lɛ ba go biene naá nnyimé yɛ́ɛyɔ. Kɔ́ɔ sɛ́ mbaá lɛ sɛ́ fúmbe go go lɛnca gɛcamɛna na nɛɛ́nɛ masɔ́mɔ mɔ́ɔmɔ má mbaá lɛ ba go bádómbana[2].

¹²Asaŋa a báa lɛ gó bó dúfie goŋaá gɛcamɛna na nɛɛ́nɛ masɔ́mɔ mɔ́ɔmɔ má mbaá lɛ ba go bádómbana, bó do mbáa lɛ go busío bábɔ́, kanɛ́ bá mbaá lɛ bá dúmbenye cɔ́mɔ yɛ́ɛyɔ go busío bɛ́nyɔ́. Cɔ́mɔ moánɛ yɛ́ godɔ́ɔdɔ buuyí Gɛnɔ́gɔ́ gá Cɔ́mɔ bá mbaá nyó oyánɛ́náa na bogaaga bá Gimmúmpúu gá Giliíli ba go ɛ́da go úle naá mmoɛná, akɛ́ bɛɛ́ŋgɛlɛsɛ bá fúmbe go íyime masɔ́mɔ moánɛ tɔ́nɔ.

¹³Go busío moánɛ, bɛ́ɛ́mba nɔnɔ mobɛ́dɛ́ pɔnyɛ́ɛ, boóma bó do nyó yúŋídínyée, ágá nɔnɔ toodo odɛ́máa yɛ́nyɔ́ iŋkimée naá boóma bá besé bɔ́ɔbɔ Asaŋa a ná nyó fáamɔ́ naá buisí bá Yésu Kilítu goncogunde.

¹⁴Aŋa baaná bá ŋgɔ́bɛnɔ, no do biené bɛdɛ́mádɛ́má bá cóá bá gɛcamɛna gɛ́ɛgɛ no mbaá ŋá no gá lɛ́ naá bumbúdíi.

¹⁵Caŋa mmue aŋa Asaŋa mɔ́ɔnyɔ a mbaá nyó dɔ́ŋɛ́nɔ́ a lɔ́mɔ́ kanɛ cigí, bɛɛnyɔ́ɔ tɔ́nɔ, ŋgáa gobɔ́gɔ́lɔnɔ gɛ́nyɔ́ guimée go bɛ́ɛmba kanɛ cigíi,

¹⁶goakɛ́ Ŋgɔ́ŋɛ́ yɛ oya yɛ amɔ́: «Bɛ́ɛ́mba nɔnɔ kanɛ cigíi aŋa yɔmɔ́ɔ ndɔ́mɔ́ kanɛ cigíi[3].»

¹⁷Gɔ́ɔgɔ no bósógolonyomú, aáŋa no fínenye Asaŋa no amɔ́ Baaba, no mo hálamanana; no bɛa gɛnɔ́gɔ́ gá gobɔ́gɔ́lɔnɔ gɛcamɛna gɛ́ɛgɛ no gɔ́ ɔyɔmɔ́ naá cí, goakɛ́ mɔ́ɔ a dɛ iyée batɔ, a sómba gɛsɛnɛ gá onyɔ moánɛ aŋa meŋiigíe mɛ́hɛ́ má lɔ́mɔ́.

¹⁸No íyimene goŋaá páŋɔ́ yɛ́ɛyɛ no mbaá bɛáa go busío bá gɛbɛ́ gá gɛɔyɔ gɛ́ɛgɛ biisée bɛ́nyɔ́ bá mbaá nyó dúmbínyée, ɛ dɛ mbáa lɛ na moóma má go dɛ́aŋana aŋa muinyí, ɛ́na góolo.

¹⁹Bó mbaá lɛ kanɛ́ na ntɔ́nɔ ya manɔ́ŋɔ́ má Kilítusu, máama má lɔ́mɔ́ aŋa má moɔnɔ́ ba gɛdómbáa ba kanɛ giédie, kanɛ biílo.

²⁰Asaŋa a mba dóána go mo iyide otóotoɛ yá go gedie cí go gisódio gɛ́nyɔ́; gɔ́ɔ godɔ́ɔdɔ a ncomɔ́ nyó mo lincie naá mesúgidinye má bɛcamɛna.

²¹Gɛ́hɛ́ gɔ́ɔ no áganamɔ́ odɛ́má yɛ́nyɔ́ naá Asaŋa mɔ́ɔnyɔ a mbaá mo fúfúné naá begúe, a báá gɔnɔ́ mo fáa bugúmigumi; boóma moánɛ bɔ́ no áganamɔ́ odɛ́má yɛ́nyɔ́ na toodo odɛ́má yɛ́nyɔ́ naá Asaŋa.

²²No mba sogónáa ɛdɛ́má yɛnyɔ́ aŋa no mbɔɔ́ ɔ́bɛ́nɔ́ mammana go go ɔyɔ naá gɛnɔ́ɔ́nɛ́nɔ́ gá bulimóní kanɛ makoɛla. Maamánɛ́náa nɔnɔ bɛcamɛna biimée na odɛ́má yá kanɛ biílo.

²³Íyíme nɔnɔ no amɔ́ no lɛ́ gɔnɔ́ bébíénéelú; bó do báá na masámá má mɔtɔ goakɛ́ má gúenene, kanɛ́ bó lɔ́mɔ́ na masámá máama má lɔ́mɔ́ má dɛ gúénénée, na nogálɔ ná Asaŋa nɔ́ɔnɔ nó ɔyɔmɔ́, nó lɔ́mɔ́ hɔ́ɔ gɛcamɛna giimée.

²⁴Ɛɛ́ɛŋ! Ŋgɔ́ŋɛ́ yɛ oya yɛ amɔ́, mɔtɔ a gúenenemú aŋa mbínyí, bonɔ́gɔ́ bɛ́hɛ́ bó lɔ́mɔ́ aŋa gióli gá mbínyí. Mbínyí ɛ kóta, gióli gɛ́ oba.

²⁵Kanɛ́ nogálɔ ná Daadáa, nɔ́ɔ, nó gɛ́ga bɛcamɛna biimée[4]. Kɔ́ɔ nogálɔ moánɛ, nó lɔ́mɔ́ Gɛnɔ́gɔ́ gá cɔ́mɔ gɛ́ɛgɛ bá mbaá nyó dúménínyée.