Read Nugunu 1 Píele 2 Bible Online

1 Píele 2 - Nugunu bible

1 Píele 2

¹Dɔmbɔ́ nɔnɔ kanɛ́ go ŋanana buimée bɔ́ɔbɔ bó lɔ́mɔ́ bobɛ́, mebelébélíe miimée, makoɛla mbɔ́dɔ iŋkimée, gɛdɛ́mádɛ́má; no dɛ́ɛna tɔ́nɔ go dúme basɔ́gɔ́ɔ.

²Bɛ́ɛ́mba nɔnɔ aŋa baaná badɔmbɔ́, no maamana makɔ́nɔ́ mammana ya mabáanyɛ yɛ́ɛyɛ ɛ lɔ́mɔ́ nogálɔ ná Asaŋa. Nɔ́ɔnɔ, no goma naá mɔ́ɔ, gó ɛ́da go éme aŋa Asaŋa a ná nyó sódiomú.

³Ɛɛ́ɛŋ no á bɛ́ɛ́nɛ́ná bɛɛnyɔ́ɔ moatɛ́ ɛŋɛndɔ inikíi Daadáa a lɔ́mɔ́ usi.

⁴Mo báyɛkɛ́náamɔ́ nɔnɔ, mɔ́ɔ a lɔ́mɔ́ ɛdánɛ́ nɛgɔ́sɔ nɛ́ɛnɛ batɔ bá mbuú umbé, kanɛ́ Asaŋa a báá nɛ́ iyídé, nɛ́ lɛ́ ntɔ́nɔ naá busío bɛ́hɛ́.

⁵Aŋa Daadáa a lɔ́mɔ́ ɛdánɛ́ nɛgɔ́sɔ, bɛ́ɛ́mba nɔnɔ tɔ́nɔ adánɛ́ agɔ́sɔ, no íŋene naá gɛfóaga gá nnyaŋá yɛ́ɛyɛ Giliíli ba Asaŋa a gɛ́gamɔ́ kɔ́ɔ. Nɔ́ɔnɔ no bɛ́ɛmba nigúli ná Bedúmbí bɛbáágá naá Asaŋa go go mo fáanana bɛbáágá bá giliíli bɛ́ɛbɛ bɛ́ mo fɛɛnanɛnamɔ́ gá Yésu Kilítu.

⁶Ɛɛ́ɛŋ bó lɛ́ naá Ŋgɔ́ŋɛ́ goŋaá: «Ɛ́ná, ŋgií iyídé ɛdánɛ́ ná ntɔ́nɔ nɛ́ɛnɛ tábɛgamɔ́ naá Síyono, naá bugído bá gɛfóaga. Kɔ́ɔ, mɔtɔ uŋkimée mɔ́ɔnyɔ a ágamɔ́ toodo odɛ́máa yɛhɛ́ kɔ́ɔ, a dɛ ŋgá nóa odóɛ.»

⁷Bó lɛ́ mbúlugie go bɛɛnyɔ́ɔ boolímínyí, kanɛ́ go báaba bá lɔ́mɔ́ bá dɛ olímónyóo, ɛdánɛ́ nɛ́ɛnɛ befúégí bá mbuú umbé, nɛ́ lɛ́ ɛ́yáalú ɛdánɛ́ ná bugído.

⁸Ɛdánɛ́ moánɛ nɛ́ lɛ́ tɔ́nɔ nɛ́ɛnɛ batɔ bá kúkenenemú, bó obana[5]. Bá kúkenenemú kanɛ́ nɔ́ɔnɔ goŋaá bí inyene go oliminyo nogálɔ ná Asaŋa; bó mba lɛ́ gedíelú nɔ́ɔnɔ go busío bábɔ́.

⁹Kɔ́ɔ, bɛɛnyɔ́ɔ, no lɛ́ boɛ́nɔ bɔ́ɔbɔ Asaŋa a mbií iyídé, no lɛ́ nigúli ná Bedúmbí bɛbáágá nɛ́ɛnɛ nɛ́ yɔgɔnɔmɔ́ go ufuŋe ogɔ́nɔ́, gɛdɔŋɔ gɛ́ɛgɛ gɛ́ lɔ́mɔ́ gimmúmpúu; boɛ́nɔ bɔ́ɔbɔ Asaŋa a mbaá fáŋá go go bɛ́ɛmba bɛ́hɛ́. A mba nyó iyídé goŋaá no ɛ́da go gúmenye biidí bá moóma bá mɔ́ɔnyɔ a mbaá nyó yuuné naá mbíno a báá nyó ágá naá gɛbonyaga gɛ́hɛ́ gá gise[6].

¹⁰Cóá, no do mbáa lɛ boɛ́nɔ bá Asaŋa, kanɛ́ godɔ́ɔdɔ, no ná lɛ́ boɛ́nɔ bɛ́hɛ́. No mba lɛ́ cóá no do íyímé no amɔ́ Asaŋa a nyó ɛ́nana mahana, kanɛ́ godɔ́ɔdɔ, a á nyó ɛ́ná mahana[7].

¹¹Bámɛ bá odɛ́má, no lɛ́ batɔ bá nɛdómba gɔnɔ́ biinyí naá cí yɛ́ɛyɛ; go busío moánɛ gɔ́ɔ nyó oyanɛnamɔ́ ndatɛnanɛna caá, ásɛ́gánáa nɔnɔ moóma mobɛ́ mɔ́ɔmɔ odɛ́má yɛ́nyɔ́ yó nyó dómanamɔ́ go mɔ́, moóma mɔ́ɔmɔ mó nyó díeŋenyemú bɛnyɔ́ moatɛ́ moatɛ.

¹²Bɛ́áa nɔnɔ gɛnɔ́gɔ́ gá gobɔ́gɔ́lɔnɔ naá kadɛ́gadɛ́ɛ ya bindiolímínyóo Asaŋa; nɔ́ɔnɔ, akɛ́ bó húme goŋaá bá nyó básómbanɛna bá amɔ́ no lɛ́ bɛbɛ́ bá batɔ, bɛ́ ɛ́na bese bese bɛnɔ́gɔ́ bɛ́nyɔ́ bá meŋiigíe, bá gúmenye Asaŋa naá buisí bɛ́hɛ́ bá goúle.

¹³Go busío bá Daadáa, bɛ́ɛ́mba nɔnɔ na ŋgɔ́bɛnɔ na batɔ biiménénée báaba bí indenyemú gɛdɔŋɔ, na ufuŋe goakɛ́ a nona buimée,

¹⁴na baŋgɔ́mɔnɔ goakɛ́ ufuŋe mɔ́ɔ a bó dílimenyemú go go séesenye beŋií mobɛ́, go go ségi báaba bá ŋananamɔ́ besé[8].

¹⁵Mammana, Asaŋa mɔ́ɔ a lɛ́galɛgamɔ́ nɔ́ɔnɔ goŋaá, gɔ́ɔgɔ no ŋananamɔ́ nɔ́ɔnɔ, no gundenye batɔ bá kanɛ nciŋí kanɛ boóma bá go gálɛda.

¹⁶Ɔyɔ́ɔ nɔnɔ aŋa batɔ báaba bá lɔ́mɔ́ filíi; kanɛ go gɔ́lɔ́ bufilíi bɛ́nyɔ́ moánɛ aŋa sanda yɛ́ɛyɛ yɛ ɔsɛgɔnɔmɔ́ bobɛ́ bɛ́nyɔ́, kanɛ́ ɔyɔ́ɔ nɔnɔ aŋa bɛɔlɛ́ bá Asaŋa.

¹⁷Hálámánánáa nɔnɔ mɔtɔ uŋkimée, no maamana bolimóní bɛ́nyɔ́, no díine Asaŋa, no hálamanana ufuŋe.

¹⁸Ŋgáa boyogóní bá bɛ́ɛmba na ŋgɔ́bɛnɔ na kálamana iŋkimée naá boayá bá bagɔ́nɔ́ɔ bábɔ́, caá akɛ́ goana na bagɔ́nɔ́ɔ báaba bɔ́ ɔyɔmɔ́ nabɔ́ na gɛnɔ́gɔ́ gá odɛ́má na naá bopɔ́ɔ́, kanɛ́ tɔ́nɔ na báaba bá bó óbigonyomú.

¹⁹Mammana mɔtɔ mɔ́ɔnyɔ a díinemú Asaŋa, a báá kéléméné noséésényée nɔ́ɔnɔ a lɔ́mɔ́ a dɛ háánánáa na nɔ́, bó lɛ́ go busío bɛ́hɛ́ gɛantá gá besé.

²⁰Ɛɛ́ɛŋ, kasɛ́á besé ɛ lɔ́mɔ́ hɔ́ɔ go mɔtɔ mɔ́ɔnyɔ a kélemenemú noséésényée, mɔ́ɔ ŋaáalú gɛoba o? Kanɛ́ naá nnyimé ya go ŋa besé, o báá kéléméné noséésényée, bɔ́ɔbɔ bɔ́ bó lɔ́mɔ́ besé makɔ́nɔ́ naá busío bá Asaŋa.

²¹Go busío moánɛ gɔ́ɔ Asaŋa a lɔ́mɔ́ nyó dɔ́ŋɛ́nɔ́ɔlú goakɛ́ Kilítusu tɔ́nɔ a mbɔ ɔ́bɛ́gɔ́nɔ́ɔ go busío bɛ́nyɔ́, a báá nyó síéné gieninye goŋaá no bienene ɛbaná nɛ́hɛ́.

²²Mɔ́ɔ kanɛ akɛ́ go ŋa gɛbɛ́ gá boóma, mebelébélíe má dɛ bɛ́ɛmba akɛ́ naá mɔ́ nyuudé[9];

²³bá mo sɛga, a dɛ gundíe cigí, bá mo óbigonyo, a dɛ fúmbe go bégundie, kanɛ́ a gundenye buimée bɔ́ɔbɔ naá usúmbí bɛsɛnɛ ba gɛtɛ́nɛ́ɛ.

²⁴Kilítusu, naá nnyɔ́dɔ yɛhɛ́ ya moatɛ́ moatɛ, a báá bádóɛ́gɛ́ná bɛlɔgɔ bɛ́cɔ́ aŋa bá mbaá mo gilénée naá kolósi; bó mbaá lɛ nɔ́ɔnɔ goŋaá dɛ bɛ́ɛmba aŋa bigúe naá gɛlɔgɔ, go go ɔyɔ naá botɛ́nɛ́ɛ. Mpéŋé sɛ́hɛ́ sɛ́ sɛ́ lɔ́mɔ́ nyó éŋúgíelú.

²⁵Mammana, no mbaá ŋá no báa go nana aŋa bɛdómbáa[10]; kanɛ́ godɔ́ɔdɔ, nó á ncó gunde naá umbeŋíbéŋí, naá mɔ́ɔnyɔ a nyó beŋebeŋemú goŋaá gɛbɛ́ gá boóma gɛ́ dɛ nyó bolɛ́ná.