Read Nugunu 1 Píele 3 Bible Online

1 Píele 3 - Nugunu bible

1 Píele 3

¹Bɛɛnyɔ́ɔ tɔ́nɔ bakɔ́dɔ, bɛáa nɔnɔ ŋgɔ́bɛnɔ na banɔ́mɛ bɛ́nyɔ́[11]; no amɔ́ no ŋanana nɔ́ɔnɔ, akɛ́ bó húme goŋaá banɔ́mɛ bóncodío naá olɔŋɔ yɛ́nyɔ́ bí inye nogálɔ ná Asaŋa, gobɔ́gɔ́lɔnɔ gá bakɔ́dɔ bábɔ́ go ŋa goŋaá bá núgie gɛɔyɔ kanɛ nogálɔ ná bakɔ́dɔ bábɔ́,

²aŋa bá núunemú gɛnɔ́gɔ́ gɛ́nyɔ́ gá gobɔ́gɔ́lɔnɔ na go bó hálamanana gɛ́nyɔ́.

³No do fúmbée go bííyienye bɛnɔ́gɔ́ aŋa bíkodóo bá nyonyí, no lɔbɛnɔ go nɛnɔ́gɔ́ ná cóɛ go noga, go báágana gá ncɔ́ŋɔ́ sá góolo na bɛnɔ́gɔ́ bá ndɛŋɔ[12].

⁴Kanɛ́ ŋgáa gobɔ́gɔ́lɔnɔ gɛ́nyɔ́ gó bɛ́ɛmba bonɔ́gɔ́ bɛ́nyɔ́, bonɔ́gɔ́ bɔ́ɔbɔ bó lɔ́mɔ́ bó do yɛkáa; no bɛa ndoŋá ya bolɛbɛlɛbɛ na bopɔ́ɔ́; bɔ́ bó lɔ́mɔ́ na gɛantá gá ndénégé naá busío bá Asaŋa.

⁵Nɔ́ɔnɔ gɔ́ɔ cóá bimmúmpúu bá bakɔ́dɔ bɛ́ɛbɛ bɛ́ mbaá lɔmɔ́ bɛ́ ágana odɛ́má yábɔ́ naá Asaŋa, bɛ́ mbaá bálɛŋáa, bɛ́ bɛanana ŋgɔ́bɛnɔ na banɔ́mɛ bábɔ́.

⁶Gieninye gɛ́ lɔ́mɔ́ na Sáála, a mba bɛáa ŋgɔ́bɛnɔ na onɔ́mɛ Ábalaháma, a mo yekeeyekie moatɛ́ a amɔ́: «Ogɔ́nɔ́ɔ bamɛ[13].» Sáála mɔ́ɔnyɔ mɔ́ɔ no lɔ́mɔ́ ɛ́yáalú babóla bɛ́hɛ́ no amɔ́ no ŋanana besé, gɔnɔ́ aáŋa no do bádɛ́ɛ́ná boóma bó nyó gólio bofoá.

⁷Bɛɛnyɔ́ɔ banɔ́mɛ caŋa mmue ɔ ɔyɔ́ɔ nɔnɔ gɛɔyɔ émmué na bakɔ́dɔ bɛ́nyɔ́, no íyime no amɔ́ odɛ́nɛ́ yábɔ́ yó lɛ́ nnɔ́nɛ́ makɔ́nɔ́; bó hálámánánáamɔ́ nɔnɔ[14] goakɛ́ bá háanana go dáŋaba olɔŋɔ nɛnyɔ́ gɛɔyɔ gɛ́ɛgɛ Asaŋa a fáanɛnamɔ́ godugúnú. No ŋanana nɔ́ɔ goŋaá Asaŋa a gɔ́lɔ mbósógólí sɛ́nyɔ́.

⁸Cúgidinyemú caá, bɛáa nɔnɔ mbééníŋínyí yɛnyɔ́ táŋɛ́ mmue, no gɔ́lɛnɔnɔ mahana, no bɛa gɛnɔ́ɔnɛ́nɔ́ gá bulimóní, no ŋanana basɔ́gɔ́ɔ besé, no bɛ́ɛmba tɔ́nɔ na ibésiisie.

⁹Mɔtɔ a amɔ́ a nyó ŋa gɛbɛ́, no do mo gundínyée bobɛ́, a amɔ́ a nyó sɛgɛda, no do mo sɛgɛ́dá, moatɛ́ ɔŋɔ́nɔ́ɔ nɔnɔ goŋaá Asaŋa a mo fona[15], goakɛ́ go nɔ́ɔ gɔ́ɔ a mbaá nyó dɔ́ŋɛ́nɔ́ boɛ́nɔ bɛ́hɛ́ go goŋaá no dáŋaba gɛfona.

¹⁰Ŋgɔ́ŋɛ́ yɛ oya yɛ amɔ́: «Mɔtɔ mɔ́ɔnyɔ a maamanamɔ́ go bɛa gɛnɔ́gɔ́ gá gɛɔyɔ, ɛ ɛ́na medúgú má besé makɔ́nɔ́, a háanana go gumbene gɛlɛ́mbɛ gɛ́hɛ́ go bobɛ́, bɛlágálága bɛ́hɛ́ bɛ́ dɛ bɛáa dogálɔ dá mbele,

¹¹a fíidie bobɛ́ nnyimé, a ŋanana besé, a yɔgɔnɔ goana goŋaá buumbénú bó bɛ́ɛmba naá kadɛ́gadɛ́ɛ ya batɔ.

¹²Mammana oŋgíso yá Asaŋa yá lɛ́ na bɛtɛ́nɛ́ɛ bá batɔ, tɔ́nɔ edúu yɛ́hɛ́ yá lɛ́ tɔ́lɛ́ɛ go go ɔ́bɔ mbósógólí yabɔ́; kanɛ́ Daadáa a bagana busío go báaba bá ŋananamɔ́ bobɛ́.»

¹³No amɔ́ no bííŋenene go go ŋanana besé, mɔtɔ ba go nyó ŋa bobɛ́ a dɛ báá.

¹⁴Moatɛ́ bó amɔ́ bó húme goŋaá no ɔ́bɛgɔnɔ go gɛnɔ́gɔ́ gɛ́nyɔ́ gá gobɔ́gɔ́lɔnɔ no lɛ́ besé makɔ́nɔ́. No do dííné báaba bá fúmbemú go nyó ŋa bobɛ́, no do sómbásómbáa odɛ́má.

¹⁵Kanɛ́ gúményée nɔnɔ Kilítusu naá ɛdɛ́má yɛnyɔ́, mɔ́ɔ a lɔ́mɔ́ Daadáa; bɛ́ɛ́mba nɔnɔ bɛcamɛna biimée pɛnɛ́ɛ go go dúfie báaba ba nyó úhenemú anáa toodo odɛ́má yɛnyɔ́ yɛ úlenemú.

¹⁶No bó dúfenye naá bolɛbɛlɛbɛ na kálamana; no bɛ́ɛmba na odɛ́má yɔ́ɔyɔ yó lɔ́mɔ́ yó do nyó goománɛ́náa, gó húme goŋaá báaba bá nyó dúmemú go dobɛ́, báaba bá nyó bɛlabɛlamɔ́ go go bɔ́gɔ́lɔnɔ gɛ́nyɔ́ gá besé naá boayá bá Kilítusu, bɔ́ɔbɔ moánɛ bá nóa odóɛ.

¹⁷Ɛɛ́ɛŋ bó lɛ́ besé go ɔ́bɛgɔnɔ go gɔ́ɔgɔ o ŋananamɔ́ besé aáŋa Asaŋa a lɛ́galɛgamɔ́ nɔ́ɔ, gó dómba goŋaá go ɔ́bɛgɔnɔ go gɔ́ɔgɔ o ŋananamɔ́ gɛbɛ́.

¹⁸Mammana, Kilítusu moatɛ́ moatɛ a mba gúé go go úlie bɛlɔgɔ bá batɔ, bó mba lɛ́ oŋɛndɔ táŋɛ́ yúmmue go busío buimée. Mɔ́ɔ gɛtɛ́nɛ́ɛ gá mɔtɔ a báa gúé go busío bá báaba bá lɔ́mɔ́ bá dɛ bɛ́ɛmba tɛ́nɛ́ɛ go go ɛ́da nabɔ́ naá boayá bá Asaŋa. Bá báá mo óná, kanɛ́ Gimmúmpúu gá Giliíli a báá mo gundínyé gɛɔyɔ.

¹⁹Go bogaaga bɛ́hɛ́, a bɛ́ɛ́ ɛ́da o oya nogálɔ ná Asaŋa a bɛ́ɛ́ ɛ́dá húme akɛ́ naá biliíli bɛ́ɛbɛ naá ncíbo ya gɛaŋɔ́,

²⁰biliíli bɛ́ɛbɛ cóá cóá bɛ́ mbií inyé go ɔ́bɛnɔ Asaŋa, gɔ́ɔgɔ a mba lɛ́ a bégumbenene odɛ́má gɛcamɛna giimée gɛ́ɛgɛ Nóe a mbaá lɛ a fóaga gilué gɛgɔ́nɔ́. Batɔ báaba ba mbií íŋéné kɔ́ɔ bá mba lɛ́ sɔŋɛ, goana bánnámanyɛ́ báaba bá mbaá pambá; Asaŋa a báá bó sódío na miimpo[16].

²¹Miimpo máama má má lɔ́mɔ́ gieninye gá giyuminye gɛ́ɛgɛ gɛ́ nyó sódonyomú godɔ́ɔdɔ, gɛ́ dɛ báá gɛsogona gá biílo bá nnyɔ́dɔ, kanɛ́ bó lɔ́mɔ́ go bííŋene go go yɔgɔnɛnɔ Asaŋa na odɛ́má yɔ́ɔyɔ yó lɔ́mɔ́ yó do goománɛ́náa. Bó lɔ́mɔ́ na bogaaga bá púfuge naá begúe ya Yésu Kilítu gɔ́ɔ gɛ́ nyó sódonyomú.

²²A mba gundé naá mmoɛná, a lɛ́ ndukíi naá boayá bá ombɔ́gɔ onɔ́mɛ yá Asaŋa, a lɛ́ ufuŋe yá bɛɛ́ŋgɛlɛsɛ, ufuŋe yá agaŋa yáaya yóncodío eŋkimée na magaaga má mmoɛná.