Read Nugunu 1 Píele 4 Bible Online

1 Píele 4 - Nugunu bible

1 Píele 4

¹Aŋa bó lɔ́mɔ́ goŋaá Kilítusu a mbɔ ɔ́bɛ́gɔ́nɔ́ɔ naá nnyɔ́dɔ yɛhɛ́, bɛɛnyɔ́ɔ tɔ́nɔ bɛ́ɛmba nɔnɔ pɛnɛ́ɛ go go ɔ́bɛgɔnɔ aŋa mɔ́ɔ; mɔtɔ mɔ́ɔnyɔ ɔ́bɛgɔnɔmɔ́ naá nnyɔ́dɔ a á ádógáná na gɛlɔgɔ,

²go go ɔyɔ naá nnyɔ́dɔ yɛhɛ́ gɛcamɛna gɛ́ɛgɛ gɛ́ mo síeninemú aŋa Asaŋa a lɛ́galɛgamɔ́; caá akɛ́ naá mbɔ́dɔ ya gɛdɛ́mádɛ́má gá batɔ.

³Cóá no lɛ́ dúmbíelú gɛcamɛna makɔ́nɔ́ go go ɔyɔ naá mbɔ́dɔ yɛ́ɛyɛ bindiíyímé Asaŋa bɛ́ maamanamɔ́, ŋgáa bó súge nɔ́ɔnɔ. Cóá no mba lɛ́ no ɔyɔ gɛbɛ́ gá gɛɔyɔ, no ŋanana bɔ́ɔbɔ nnyɔ́dɔ sɛ́nyɔ́ sɛ́ nyó dómanamɔ́ go bɔ́, no gúenene mɔgɛ́bɔ, bɛcamɛna biimée no lɛ́ go bɛdágá na anyóa, no búlugenye tɔ́nɔ moɔcɔ, bɔ́ɔbɔ bó lɔ́mɔ́ gɛbɛ́ makɔ́nɔ́.

⁴Kɔ́ɔ godɔ́ɔdɔ, aŋa no lɔ́mɔ́ no do gɔnɔ́ bó fídefide gɛcamɛna gɛ́ɛgɛ bá lɔ́mɔ́ go bɛbɛ́ bábɔ́ bá moóma go ŋanana, bó bó fáanana giemésé, bá lɛ go ɛ́da go nyó sɛga.

⁵Kanɛ́ bá ná básáaga go meŋiigíe mábɔ́ naá busío bá mɔ́ɔnyɔ a lɔ́mɔ́ pɛnɛ́ɛ go go sómbana bagɔ́sɔ na begúe bɛsɛnɛ.

⁶Ɛɛ́ɛŋ, go busío moánɛ gɔ́ɔ bá mbaá dúményée gɛnɔ́gɔ́ gá cɔ́mɔ akɛ́ naá begúe, go goŋaá aŋa bá sómbanamɔ́ batɔ bɛsɛnɛ go meŋiigíe má nnyɔ́dɔ, go bogaaga bá Gimmúmpúu gá Giliíli, bɔ́ ɔyɔ gɛɔyɔ gá Asaŋa.

⁷Gɛcamɛna gɛ́ á síéné sɔŋɛ, mamáná má cí má bola. Go busío moánɛ bɛáa nɔnɔ nciŋí, no gɛ́ga pɔnyɛ́ɛ, no bégumbenene odɛ́má go go bɛa bogaaga bá go bósógolonyo.

⁸Busío busío dómbáa nɔnɔ go maamanɛna na odɛ́má uŋkimée. Mammana, dɛ amɔ́ dɛ maamana basɔ́gɔ́ɔ, gɛmaamánɛ́ná gɛ́ɛgɔ gɛ́ úlene na ihéehinye há gɛcɛcá gá bɛlɔgɔ[17].

⁹Gɛ́ndɛ́gánɛ́náa nɔnɔ naá nnyaŋá sɛ́nyɔ́ kanɛ go bécíkilide odɛ́má.

¹⁰Bííŋénéemú nɔnɔ go go yɔgɔnɛnɔ basɔ́gɔ́ɔ onyɔ moánɛ go pááná yɛ́ɛyɛ Asaŋa a lɔ́mɔ́ mo fáalú. Bɛ́ɛmba nɔnɔ bɛnɔ́gɔ́ bá bebídígíní bá gitúu gitúu bá pááná sá Asaŋa.

¹¹Asaŋa a amɔ́ a fáa mɔtɔ bogaaga bá dogálɔ, ŋgáa bó bɛ́ɛmba go go dúmbenye dogálɔ dɛ́hɛ́; a amɔ́ a bɛ́ɛmba naá odɛ́nɛ́ yá buelí, ŋgáa a bó yɔgɔnɔ na bogaaga bɔ́ɔbɔ Asaŋa a mo fáananamɔ́, bó húme goŋaá gá Yésu Kilítu, batɔ bɛ́ ɛ́da go gúmenye Asaŋa go buimée. Mɔ́ɔ a lɔ́mɔ́ na nigúmi, na bogaaga, go mannyómá aá mannyómá. Aamɛnɛ.

¹²Bámɛ bá odɛ́má, no do békúkée makɔ́nɔ́ aáŋa no lɛ́ naá golɔ́kɔ gá gɛɔ́bɛgɔ, bó do bɛ́ɛ́mbá aŋa boóma bofáa bɔ́ bó nyó bolɛnamɔ́.

¹³Kanɛ́ békelényéemú nɔnɔ go busío bá goŋaá no gɔ́lɔnɔ bodáŋɔ naá gɛɔ́bɛgɔ gɛ́ɛgɛ Kilítusu a mbaá bɛáa, gó húme aŋa no ŋgaá bɛ́ɛ́mbá tɔ́nɔ naá gɛantáanta gá bɛyaŋa naá buisí bɔ́ɔbɔ a ŋgaá loodío nigúmi nɛ́hɛ́ go batɔ biimée.

¹⁴Besé nɛnyɔ́ makɔ́nɔ́ bá amɔ́ bá nyó sɛga goŋaá no lɛ́ bá Kilítusu, goakɛ́ Giliíli ba Asaŋa mɔ́ɔnyɔ a lɔ́mɔ́ na nigúmi a lɛ́ nɛnyɔ́.

¹⁵Bá séesenye batɔ báaba bá lɔ́mɔ́ buúníní ɛ́ná lí biíbi, bepelípélí ɛ́na lí bá ágana ombɔ́gɔ naá bɛsɛnɛ bá basɔ́gɔ́ɔ. Bɛɛnyɔ́ɔ, no do bɛ́ɛ́mbá nɔ́ɔ.

¹⁶Kanɛ́ mɔtɔ a amɔ́ a lumene na gɛɔ́bɛgɔ goŋaá a lɛ́ ba Kilítusu, a dɛ nóá odóɛ go busío moánɛ, moatɛ́ ŋgáa a dómba go búlugenye Asaŋa go ufíno yá Kilítusu yɔ́ɔyɔ a lɔ́mɔ́ na yɔ́.

¹⁷Ɛɛ́ɛŋ, gɛcamɛna gɛ́ á háá gɛ́ɛgɛ Asaŋa a bayɛganamɔ́ go sómbana batɔ bɛsɛnɛ manɛ́ naá nnyaŋá yɛhɛ́ ya moatɛ́. Kɔ́ɔ, a amɔ́ a bayɛga gɛ́cɔ́, gosúgudinye gá báaba bá lɔ́mɔ́ bá dɛ olímónyóo Gɛnɔ́gɔ́ gá Cɔ́mɔ gá Asaŋa gó ŋgaá bɛ́ɛ́mbá nɛɛ́nɛ o?

¹⁸Gɔnɔ́ mɔtɔ ba gɛtɛ́nɛ́ɛ a amɔ́ a bɛa gisódio naá gɛantá gá gɛdɔmbɔ mmoɛná, ŋkádɛ gɛ́ gɛ́ ŋgaá bolɛ́ná mbɛ́ sá batɔ sɛ́ɛsɛ sɛ́ lɔ́mɔ́ sɛ́ dɛ olímónyóo Asaŋa[18] o?

¹⁹Go busío moánɛ, ŋgáa báaba bɔ́ ɔ́bɛgɔnɔmɔ́ go golɛ́galɛga Asaŋa, bɛ́ ɛ́dana naá busío na go ŋanana besé. Ŋgáa bá bííŋene uŋkimée uŋkimée babɔ́ naá Asaŋa ugedí babɔ́ mɔ́ɔnyɔ a lɔ́mɔ́ a dɛ súgénée tánɔ sɛ́hɛ́.