Read Nugunu 1 Píele 5 Bible Online

1 Píele 5 - Nugunu bible

1 Píele 5

¹Kúluminyemú kanɛ́ godɔ́ɔdɔ bafɛanɔ́ɔ báaba naá kadɛ́gadɛ́ɛ yɛnyɔ́, mbó gálagala goakɛ́ ndɛ́ ofɛanɔ́ɔ aŋa bɔ́ɔ, gɔnɔ́ ŋgominyo ya bɛdɔmbɔ bɛ́ɛbɛ Kilítusu a lɔ́mɔ́ luménénéelú na bɛ́; yɔmɔ́ɔ mɔ́ɔnyɔ mbɛananamɔ́ tɔ́nɔ bodáŋɔ naá nigúmi ná Kilítusu nɛ́ɛnɛ Asaŋa a ná dúfiemú, mbó oyanɛna caá:

²Aŋa bebeŋíbéŋí bidúgé, beŋébéŋée nɔnɔ bese biimbó bá boolímínyí bɛ́ɛbɛ Asaŋa a lɔ́mɔ́ nyó dóɛ́gɛ́náalú[19]. No bí indenye caá akɛ́ naá gɛgaŋa, kanɛ́ na gɛnɔ́gɔ́ gá odɛ́má aŋa Asaŋa a maamanamɔ́. No bɛ́ indenye caá akɛ́ go nobóda ná muinyí, kanɛ́ gó bɛ́ɛmba go go bííŋene na gɛnɔ́ɔnɛ́nɔ́.

³No do indényée biimbó bá boolímínyí bɛ́ɛbɛ Asaŋa a lɔ́mɔ́ nyó dóɛ́gɛ́náalú naá mbɔ́dɔ ya go bó míneminie, moatɛ́ ŋgáa bá núune gɛnɔ́gɔ́ gá gobɔ́gɔ́lɔnɔ go bɛɛnyɔ́ɔ.

⁴Gɔ́ɔ kanɛ́ aŋa ufuŋe, umbeŋíbéŋí bidúgé a ŋguú úlé, a ŋga nyó fá bɛsoɛná bá nigúmi bɛ́ɛbɛ bɛ́ lɔ́mɔ́ bɛ́ dɛ dɛ́áŋánáa.

⁵Caŋa mmue bɛɛnyɔ́ɔ bɛtɔmbɔ́ɔ bá batɔ, ɔ́bɛ́nɔ́nɔ́ɔ nɔnɔ bafɛanɔ́ɔ bɛ́nyɔ́; gɔnɔ́ bɛɛnyɔ́ɔ biimée naá gɛɔyɔ gɛ́nyɔ́ gá miisí miimée, bɛ́ɛ́mba nɔnɔ na ndoŋá ya ibésiisie naá kadɛ́gadɛ́ɛ yɛnyɔ́, goakɛ́ Ŋgɔ́ŋɛ́ yɛ oya yɛ amɔ́: «Asaŋa a bɛ́ɛ́yana báaba bá bébúlugenyemú, kanɛ́ a boogo báaba bá bésiisenyemú nnyɔ́dɔ go cí.»

⁶Go busío moánɛ, bésiisíemú nɔnɔ nnyɔ́dɔ go cí naá boayá bá Asaŋa mɔ́ɔnyɔ a lɔ́mɔ́ na bogaaga go buimée, bó húme aŋa a lɔ́mɔ́ ba go nyó búlugie naá gɛcamɛna gɛ́ɛgɛ a sómbamɔ́[20].

⁷Mo bádónɛ́náamɔ́ nɔnɔ gobényíigenye gɛ́nyɔ́ gá odɛ́má guimée goakɛ́ a nyó beŋebeŋe[21].

⁸Bégumbénéemú nɔnɔ, no bɛ́ɛmba pɛnɛ́ɛ, obɛlɔ́bɛlɔ bɛnyɔ́, Sátana, a bégéeŋenye, a fúmbe mɔtɔ ba go gumbene, aŋa gɛkándáa ga ŋgoyóŋo, a fúmbe bɛ́hɛ́ bá go nyáa.

⁹Bɛ́ɛ́mba nɔnɔ bɛyágáyága naá boayá bɛ́hɛ́, no lɔbɛnɔ tɛ́ŋɛ́tɛŋɛ naá gioliminyo, no íyime no amɔ́ bɛdɔmbɔ bímmue eé bímmue bɛ́ lɛ́ tɔ́nɔ go boolímínyí biimée báaba naá cí.

¹⁰No nɔ́ ɔ́bɛgɔnɔ go moɔnɔ́ ba gɛcamɛna, naá nnyimé hɔ́ɔlɔ́, Asaŋa mɔ́ɔnyɔ a lɔ́mɔ́ mbɔ́gɔ́ ya buimée bɔ́ɔbɔ bó lɔ́mɔ́ bá besé, naá gobálada gɛ́nyɔ́ gɔ́ɔgɔ na Kilítusu, a báá nyó dɔ́ŋɛ́nɔ́ go go dáŋaba nigúmi nɛ́hɛ́ ná kanɛ mmanɛ́náa, a ŋga gɔnɔ́ nyó díliminye mɔ́ɔ moatɛ́ moatɛ a nyó íyie tɛ́ŋɛ́tɛŋɛ, a nyó gíndie no bɛ́ɛmba kanɛ kélídínyée.

¹¹Mɔ́ɔ a gúmemú go bɛcamɛna biimée. Aamɛnɛ.

¹²Sɛlɛfɛ́ŋɛ mɔ́ɔ a ná ŋgóhígínyóo go go nyó ɔ́ŋɛnɔ moɔnɔ́ ba kálata yɛ́ɛyɛ; mmo gɔ́lɔnɔ aŋa ondimóní bamɛ ba pídefide naá gioliminyo. Ŋgaá ná nyó ɔ́ŋɛ́nɔ́ kálata yɛ́ɛyɛ go go nyó gúluminye, go go nyó dúfie mammana goŋaá Asaŋa a lɛ́ có ŋaáalú besé, no bágódɛna besé moánɛ tɛ́ŋɛ́tɛŋɛ.

¹³Giimbó gá boolímínyí gɛ́ɛgɛ Asaŋa a lɔ́mɔ́ iyídéelú háalá naá Bábɛlɔnɛ gɛ́ á nyó bédíígényée, tɔ́nɔ na Mélékusu, moɔnɔ́ bamɛ naá gioliminyo.

¹⁴Bédíígénínyée nɔnɔ na kude aŋa bolimóní. Ŋgáa buumbénú bó bɛ́ɛmba na bɛɛnyɔ́ɔ biimée báaba no lɔ́mɔ́ báladáalú na Kilítusu.