Read Nugunu 1 Sáŋa 1 Bible Online

1 Sáŋa 1 - Nugunu bible

1 Sáŋa 1

¹Dɛ nyó ɔ́ŋɛnɔmɔ́ go bɔ́ɔbɔ bó núunemú Nogálɔ mɔ́ɔnyɔ lɔ́mɔ́ gɛɔyɔ; a mba lɛ́ hɔ́ɔ otóotoɛ yá boóma buimée[1]: dɛ mba mo ɔ́bɔ́nɔ́ɔ, dɛ báá mo ɛ́ná na oŋgíso yɛ́cɔ́, dɛ mba mo bédíbíédíbíe, dɛ báá mo báláfɛ́ná na ɛmbɔ́gɔ yɛcɔ́.

²Gɔ́ɔgɔ aŋa Nogálɔ ba gɛɔyɔ mɔ́ɔnyɔ a mbaá bédúfíe, dɛ mba mo ɛ́ná; boóma moánɛ bɔ́ dɛ nyó oyanɛnamɔ́, dɛ nyó dúmeninye gɛɔyɔ gá kanɛ mesúge, gɛ́ɛgɛ gɛ́ mbaá lɛ naá Baaba; gɔnɔ́ bá báá có gɛ́ lincíe[2].

³Bɔ́ɔbɔ dɛ mbɛɛ́ ɛ́ná dɛ báá gundé dɛ bɔ́ɔ́ ɔ́bɔ́nɔ́ɔ, dɛ nyó bó dúmeninye tɔ́nɔ, goŋaá bɛɛnyɔ́ɔ tɔ́nɔ no bɛ́ɛmba báladáalú nɛcɔ́. Kanɛ́ gobálada gɛ́cɔ́ gó lɛ́ na Baaba, gɔnɔ́ na Moɔnɔ́ bɛhɛ́ Yésu Kilítu.

⁴Dɛ nyó ɔ́ŋɔnɔmɔ́ moóma mɔ́ɔmɔ goŋaá bɛyaŋa bɛ́cɔ́ bɛ́ bɛ́ɛmba dácɛ dɔgɛdɔgɛ.

⁵Cɔ́mɔ yɛ́ɛyɛ dɛ mbɔɔ́ ɔ́bɔ́nɔ́ɔ naá nyuudé ná Yésu Kilítu, dɛ nyó yɛ dúmeninye, ɛ lɔmɔ́ yɛ amɔ́: Asaŋa a lɛ́ gise, naá mɔ́ɔ, mbíno ɛ dɛ báá.

⁶Dɛ a amɔ́ dɛ oyɛda dɛ amɔ́ dɛ lɛ́ báladáalú na Asaŋa, gɔ́ɔ dɛ ɔ ɔyɔ naá mbíno, dɛ belebele, dɛ dɛ oyáa mammana.

⁷Aáŋa dɛ ɔyɔ naá gise aŋa gɔ́ɔgɔ mɔ́ɔ moatɛ́ moatɛ a lɔ́mɔ́ naá gise, dɛ lɛ́ báladáalú na basɔ́gɔ́ɔ, gó gunde manɔ́ŋɔ́ má Yésusu, Moɔnɔ́ bɛhɛ́, má có soga go bɛlɔgɔ biimée.

⁸Dɛ amɔ́ dɛ oyɛda dɛ amɔ́ dɛ lɛ́ kanɛ gɛlɔgɔ, dɛ bébelebele bɛɛcɔ́ɔ moatɛ́; mammana ɛ dɛ báá naá bɛɛcɔ́ɔ.

⁹Dɛ amɔ́ dɛ oya daŋɛ́daŋɛ bɛlɔgɔ bɛ́cɔ́, Asaŋa a có héehinenye, a gunde a có soga go bobɛ́ buimée, goakɛ́ a lɛ́ gɛtɛ́nɛ́ɛ, a dɛ súgénée tánɔ yɛhɛ́[3].

¹⁰Dɛ amɔ́ dɛ oyɛda dɛ amɔ́ dɛ lɛ́ kanɛ go lɔgɔ, dɛ íyenye Asaŋa umbelíbélí, Nogálɔ bɛhɛ́ a dɛ báá naá bɛɛcɔ́ɔ.