Read Nugunu 1 Sáŋa 3 Bible Online

1 Sáŋa 3 - Nugunu bible

1 Sáŋa 3

¹Ɛ́ná nɔnɔ kasɛ́á mbɔ́dɔ ya gɛnɔ́ɔ́nɛ́nɔ́ yɛ́ɛyɛ Baaba Asaŋa a mbaá có ŋaáa! Gɛnɔ́ɔ́nɛ́nɔ́ gá ndiemi gɛ́ lɛ́ ŋaáalú goŋaá bá có dɔ́ŋɔnɔ bá amɔ́ baaná bá Asaŋa[7]; dɛ lɛ́ mammana baaná bɛ́hɛ́. Go busío moánɛ gɔ́ɔ batɔ bá cí bá lɔ́mɔ́ bá dɛ có íyíménée, goakɛ́ bá lɛ́ kanɛ go mo lɛnca.

²Bámɛ bá odɛ́má, godɔ́ɔdɔ, dɛ lɛ́ baaná bá Asaŋa, kanɛ́ bɔ́ɔbɔ dɛ ŋgaá bɛ́ɛ́mbá bó gá lɛ́ bó do bédúfíe dalaŋanyɛ. Dɛ íyimene dɛ amɔ́, aŋa Kilítusu a ŋgaá bédúfíe cegegi, dɛ ŋga bɛ́ɛ́mbá púényí sɛ́hɛ́ goakɛ́ dɛ ŋga mo ɛ́ná aŋa a lɔ́mɔ́.

³Kɔ́ɔ uŋkimée mɔ́ɔnyɔ a ágamɔ́ toodo odɛ́máa aŋa yɛ́ɛyɛ náana naá mɔ́ɔ, a bííyienye kanɛ biílo aŋa mɔ́ɔ a lɔ́mɔ́ kanɛ biílo.

⁴Uŋkimée mɔ́ɔnyɔ a ŋamɔ́ gɛlɔgɔ, a á dómbá tɔ́nɔ gicele gá Asaŋa, goakɛ́ gɛlɔgɔ gɛ́ lɔ́mɔ́ gopalabɛna gá gicele gá Asaŋa.

⁵Kanɛ́ no íyimene bese bese no amɔ́ Kilítusu a mbu úlé go go úlie bɛlɔgɔ, mɔ́ɔ mɔ́ɔnyɔ a lɔ́mɔ́ kanɛ gɛlɔgɔ.

⁶Uŋkimée mɔ́ɔnyɔ a lɔ́mɔ́ báladáalú nɛhɛ́ a dɛ gɔnɔ́ ŋanana gɛlɔgɔ; uŋkimée mɔ́ɔnyɔ a ŋananamɔ́ gɛlɔgɔ, a gá báasa a dɛ mo ɛ́ná, a dɛ mo íyíménée.

⁷Baaná bámɛ, no do bádɛ́ɛ́nɛ́ná mɔtɔ a dɛ nyó neníe. Mɔ́ɔnyɔ a ŋananamɔ́ meŋiigíe má botɛ́nɛ́ɛ a lɛ́ gɛtɛ́nɛ́ɛ, aŋa mɔ́ɔ moatɛ́ a lɔ́mɔ́ gɛtɛ́nɛ́ɛ.

⁸Mɔ́ɔnyɔ ɛ ɛ́danamɔ́ naá busío a ŋanana gɛlɔgɔ a lɛ́ ba Ohándá, goakɛ́ Ohándá a lɛ́ ulogílógí gó dúme naá mabayɛga. Goúle gá Moɔnɔ́ ba Asaŋa gó mbaá lɔmɔ́ go go nco díeŋie moyogónyóo má Ohándá.

⁹Uŋkimée mɔ́ɔnyɔ a lɔ́mɔ́ ɛ́yáalú moɔnɔ́ ba Asaŋa, a dɛ gɔnɔ́ ŋanana gɛlɔgɔ, goakɛ́ bogaaga bá gɛɔyɔ gá Asaŋa bó lɛ́ naá mɔ́ɔ. Gɔ́ɔgɔ Asaŋa a lɔ́mɔ́ Isée, a dɛ báá ba go gɔnɔ go ɛ́dana naá busío a ŋanana gɛlɔgɔ.

¹⁰Uŋkimée mɔ́ɔnyɔ a lɔ́mɔ́ a dɛ ŋanánáa bɔ́ɔbɔ bó lɔ́mɔ́ tɛ́nɛ́ɛ, ɛ́na lí a dɛ maamánáa ondimóní, a dɛ báá ba Asaŋa; hɔ́ɔlɔ́ gɔ́ɔ bá lɛncanamɔ́ dalaŋanyɛ baaná bá Asaŋa na baaná bá Ohándá.

¹¹Moánɛ, cɔ́mɔ yɛ́ɛyɛ no mbɔɔ́ ɔ́bɔ́ gó dúme naá mabayɛga ɛ lɔ́mɔ́ yɛ amɔ́: Ŋgáa dɛ no maamanɛna[8].

¹²Dɛ dɛ bɛ́ɛ́mbá aŋa Kéyine; a mba lɛ́ ba Ombɛ́, a bóó óná ondimóní. Kanɛ́ a mbaá mo óná goakɛ́ o? Mammana, meŋiigíe má Kéyine má mba lɛ́ gɛbɛ́, máama má ondimóní bese[9].

¹³Bolimóní bámɛ, no do békúkée aáŋa batɔ bá cí yɛ́ɛyɛ bá nyó bɛlabɛla[10].

¹⁴Bɛɛcɔ́ɔ dɛ íyimene dɛ amɔ́ dɛ lɛ́ úlúkíelú naá nigúe, dɛ bíí íŋéné naá gɛɔyɔ. Dɛ íyimenemú nɔ́ɔ goakɛ́ dɛ maamana bondimóní bɛ́cɔ́. Mɔtɔ mɔ́ɔnyɔ a lɔ́mɔ́ a dɛ maamánɛ́náa a gá lɛ́ naá nigúe.

¹⁵Uŋkimée mɔ́ɔnyɔ a bɛlabɛlamɔ́ ondimóní a lɛ́ uŋgúníní batɔ. No gunde no íyimene no amɔ́ akɛ́ uŋgúníní batɔ ba ummue a dɛ bɛanánáa gɛɔyɔ gá kanɛ mesúge naá mɔ́ɔ.

¹⁶Dɛ íyimenemú bɔ́ɔbɔ bó lɔ́mɔ́ gɛnɔ́ɔ́nɛ́nɔ́ go náana: Yésu Kilítu a mbi íŋéné gɛɔyɔ gɛ́hɛ́ go busío bɛ́cɔ́. Kɔ́ɔ, bɛɛcɔ́ɔ tɔ́nɔ, dɛ háanana go íŋene gɛɔyɔ gɛ́cɔ́ go bondimóní bɛ́cɔ́.

¹⁷Mɔtɔ a amɔ́ a bɛa bonɔ́mɛ bá cí yɛ́ɛyɛ, a bɛ́ɛ́ ɛ́ná ondimóní a háanahana, a báá mo ɛ́lɛ́ná odɛ́má[11], nɛɛ́nɛ kanɛ́ a lɔ́mɔ́ ba go oyɛda a amɔ́ a maamana Asaŋa o?

¹⁸Baaná bámɛ, dɛ dɛ háánánáa go maamana bolimóní bɛ́cɔ́ goana na nyuudé ɛ́na lí na bɛlágálága. Kanɛ́ dɛ háanana go bɛa mammana ya gɛnɔ́ɔ́nɛ́nɔ́ yɛ́ɛyɛ ɛ bédúfenyemú naá meŋiigíe.

¹⁹Hɔ́ɔlɔ́ gɔ́ɔ dɛ ŋgií íyímé go goŋaá dɛ lɛ́ bá mammana. Hɔ́ɔlɔ́ gɔ́ɔ dɛ ŋgaá bɛ́ɛ́mbá na toodo odɛ́máa naá busío bá Asaŋa.

²⁰Mammana, aáŋa odɛ́má yɛ́cɔ́ yó có goomanɛna go boóma, Asaŋa a lɛ́ gɛkɔ́nɔ́nɔ́ɔ a dómbana odɛ́má yɛ́cɔ́, i íyimene boóma buimée.

²¹Bámɛ bá odɛ́má, aáŋa odɛ́má yɛ́cɔ́ yó do có goománɛ́náa go boóma, dɛ oyanɛna Asaŋa bɛsɛnɛ bɛ́cɔ́ na toodo odɛ́máa;

²²ɛkádɛ giimée gɛ́ɛgɛ dɛ mo ɔŋɛnɔmɔ́, a có fáanana, goakɛ́ dɛ bɛ́dɛgana bɛlɔsɛnɔ bɛ́hɛ́, dɛ ŋanana bɔ́ɔbɔ bó mo fɛɛnanɛnamɔ́.

²³Kanɛ́ gɛlɔsɛnɔ gɛ́hɛ́ gɛ́ lɔ́mɔ́: dɛ háanana go ága odɛ́má yɛ́cɔ́ naá Moɔnɔ́ bɛhɛ́ Yésu Kilítu, dɛ gunde dɛ maamanɛna aŋa gɔ́ɔgɔ a mbaá có fáá gɛlɔsɛnɔ[12].

²⁴Uŋkimée mɔ́ɔnyɔ a bɛ́dɛganamɔ́ bɛlɔsɛnɔ bá Asaŋa a gɛ́ga báladáalú nɛhɛ́, Asaŋa tɔ́nɔ a lɛ́ nɛhɛ́. Bó lɔ́mɔ́ go Gimmúmpúu gá Giliíli mɔ́ɔnyɔ a mbaá có fáá gɔ́ɔ dɛ lɛncanamɔ́ goŋaá Asaŋa a gɛ́ga báladáalú nɛcɔ́.