Read Nugunu 1 Sáŋa 4 Bible Online

1 Sáŋa 4 - Nugunu bible

1 Sáŋa 4

¹Bámɛ bá odɛ́má, no do ɛ́dá go olimonyo go ŋgolimonyo biimée báaba bó oyamɔ́ bá amɔ́ bá lɛ́ na Gimmúmpúu gá Giliíli. Kanɛ́ bó hɛnyáhɛ́nyáamɔ́ nɔnɔ bese go go íyime aáŋa giliíli gɛ́ɛgɛ bá bɛananamɔ́ gɛ́ ɛ́da go úlene naá Asaŋa[13]. Mammana, gɛca gá mbúsí sá mbele gɛ́ báa go saa cí iŋkimée.

²Kɔ́ɔ bó lɔ́mɔ́, uŋkimée mɔ́ɔnyɔ oyamɔ́ daŋɛ́daŋɛ a amɔ́ Yésu Kilítu a mbɛ ɛ́dá go úle naá mmoɛná go go nco bébíene mɔtɔ naá cí, no lɛ́ ba go lɛnca goŋaá mammana bendiemi, a lɛ́ na Giliíli ba Asaŋa.

³Gó gunde, uŋkimée mɔ́ɔnyɔ a lɔ́mɔ́ a dɛ olímónyóo goŋaá Yésu Kilítu a mba bébíéné mɔtɔ, mɔ́ɔnyɔ moánɛ a dɛ báá Giliíli ba Asaŋa; kanɛ́ giliíli gɛ́ɛgɛ a lɔ́mɔ́ na gɛ́ gɛ́ lɛ́ gá obɛlɔ́bɛlɔ ba Kilítusu. Moatɛ́ no mbɔ ɔ́bɔ́ no amɔ́ giliíli gɛ́ɛgɔ gɛ́ úlene, gɔ́ɔ godɔ́ɔdɔ gɛ́ ná lɔ́mɔ́ naá cí iŋkimée.

⁴Baaná bámɛ, bɛɛnyɔ́ɔ no ɔ́bɛnɔnɔ na Asaŋa, kɔ́ɔ no lɔ́mɔ́ mánɛ́gɛ́náalú mbúsí sá mbele sɛ́ɛsɔ, goakɛ́ Giliíli mɔ́ɔnyɔ naá bɛɛnyɔ́ɔ a lɛ́ gɛgaaga a dómbana mɔ́ɔnyɔ a lɔ́mɔ́ naá cí háalá.

⁵Mbúsí sá mbele sɛ́ sɛ́ ɔ́bɛnɔnɔ na cí, boóma bá ndiemi bɔ́ sɛ́ gálagalamɔ́ masɛnɛ má cí, batɔ bá cí bá sɛ́ bódólonyo.

⁶Go bɛɛcɔ́ɔ, dɛ ɔ́bɛnɔnɔ na Asaŋa. Mɔ́ɔnyɔ a ágamɔ́ odɛ́má yɛ́hɛ́ naá masɛnɛ má Asaŋa, a có bódólonyo; mɔ́ɔnyɔ a lɔ́mɔ́ a dɛ ɔ́bɛ́nɔ́nɔ́ɔ na Asaŋa, a dɛ có bódólónyóo. Hɔ́ɔlɔ́ gɔ́ɔ dɛ lɛncanamɔ́ Giliíli gá mammana na giliíli gá mebelébélíe.

⁷Bámɛ bá odɛ́má, ŋgáa dɛ nɔ́ɔnɔnɛnɔ bɛɛcɔ́ɔ na bɛɛcɔ́ɔ, goakɛ́ gɛnɔ́ɔ́nɛ́nɔ́ gɛ́ ɛ́damɔ́ go úlene naá Asaŋa. Biimée báaba bá nɔ́ɔnɔnɛnɔmɔ́ bá lɛ́ baaná bá Asaŋa, bá gɔnɔ go íyimene Asaŋa.

⁸Mɔ́ɔnyɔ a lɔ́mɔ́ a dɛ nɔ́ɔ́nɔ́nɛ́nɔ́ɔ a dɛ íyíménée Asaŋa; goakɛ́ Asaŋa a lɛ́ gɛnɔ́ɔ́nɛ́nɔ́.

⁹Asaŋa a mbaá dúfíe gɛnɔ́ɔ́nɛ́nɔ́ gɛ́hɛ́ naá kadɛ́gadɛ́ɛ yɛcɔ́ náana: A mba dómá gimmué gɛ́hɛ́ gá Moɔnɔ́ naá cí goŋaá dɛ bɛa gɛɔyɔ naá nnyimé yɛhɛ́[14].

¹⁰Kɔ́ɔ gɛnɔ́ɔ́nɛ́nɔ́ gɛ́ lɔ́mɔ́ náana: caá akɛ́ bɛɛcɔ́ɔ báa dɛ mbaá nɔ́ɔ́nɔ́nɔ́ɔ Asaŋa, kanɛ́ mɔ́ɔ mó moánɛ a mbaá có nɔ́ɔ́nɔ́nɔ́ɔ; a báá dómá Moɔnɔ́ bɛhɛ́ go go nco bííŋene go gɛbáágá, goŋaá a có héehinye bɛlɔgɔ bɛ́cɔ́.

¹¹Bámɛ bá odɛ́má, aáŋa Asaŋa a mba có nɔ́ɔ́nɔ́nɔ́ɔ mbɔ́dɔ yɛ́ɛyɛ náana, bɛɛcɔ́ɔ tɔ́nɔ dɛ háanana go nɔ́ɔnɔnɛnɔ bɛɛcɔ́ɔ na bɛɛcɔ́ɔ.

¹²Mɔtɔ a gá báasa a dɛ ɛ́ná Asaŋa[15]. Dɛ amɔ́ dɛ nɔ́ɔnɔnɛnɔ bɛɛcɔ́ɔ na bɛɛcɔ́ɔ, Asaŋa a gɛ́ga naá bɛɛcɔ́ɔ, gó gunde gɛnɔ́ɔ́nɛ́nɔ́ gɛ́hɛ́ gɛ́ɛgɛ nɛcɔ́ gɛ́ bédúfenye mammana.

¹³A mba có fáá Gimmúmpúu gá Giliíli, nɔ́ɔnɔ gɔ́ɔ dɛ lɛncanamɔ́ goŋaá dɛ lɛ́ báladáalú naá mɔ́ɔ, mɔ́ɔ tɔ́nɔ naá bɛɛcɔ́ɔ.

¹⁴Gó gunde, bɛɛcɔ́ɔ moatɛ́ dɛ mba mo bɛ́ɛ́nɛ́ná, gó moánɛ dɛ nyó oyanɛnamɔ́ dɛ amɔ́ dɛ lɛ́ ŋgominyo go boóma bɔ́ɔbɔ: Asaŋa a mba dómá Moɔnɔ́ bɛhɛ́ goŋaá a nco bɛ́ɛmba Usódí ba batɔ[16].

¹⁵Uŋkimée mɔ́ɔnyɔ o oyamɔ́ daŋɛ́daŋɛ a amɔ́ Yésusu a lɛ́ Moɔnɔ́ ba Asaŋa, bendiemi, Asaŋa a lɛ́ báladáalú nɛhɛ́, mɔ́ɔ na Asaŋa.

¹⁶Gó gunde, dɛ lɛncana dɛ gɔnɔ go olimonyo dɛ amɔ́ Asaŋa a có nɔ́ɔnɔnɔ. Asaŋa a lɛ́ gɛnɔ́ɔ́nɛ́nɔ́, uŋkimée mɔ́ɔnyɔ ɔ ɔyɔmɔ́ naá gɛnɔ́ɔ́nɛ́nɔ́, a gɛ́ga báladáalú na Asaŋa, Asaŋa tɔ́nɔ a gɛ́ga nɛhɛ́.

¹⁷Aáŋa gɛnɔ́ɔ́nɛ́nɔ́ gá bɛɛcɔ́ɔ na bɛɛcɔ́ɔ gɛ́ lɛ́ mammana mammana, dɛ ná bɛ́ɛmba na toodo odɛ́máa iŋkimée naá buisí bá Asaŋa go sómbana batɔ bɛsɛnɛ, goakɛ́, gɛɔyɔ gɛ́cɔ́ gɛ́ɛgɛ naá cí háalá gɛ́ lɛ́ caŋa mmue na gá Yésusu.

¹⁸Naá gɛnɔ́ɔ́nɛ́nɔ́, bofoá bó do báá hɔ́ɔ, kanɛ́ mammana ya gɛnɔ́ɔ́nɛ́nɔ́ ɛ gúne bofoá, goakɛ́ bofoá bó lɛ́ aŋa o gɛ́gana noséésényée. Mɔ́ɔnyɔ a lɔ́mɔ́ na bofoá a dɛ íyíménée mammana ya gɛnɔ́ɔ́nɛ́nɔ́ ya Asaŋa.

¹⁹Naá bɛ́cɔ́ boayá, dɛ bɛanana gɛnɔ́ɔ́nɛ́nɔ́ naá ɛdɛ́má, goakɛ́ Asaŋa mɔ́ɔ a mbaá dóáná go có nɔ́ɔ.

²⁰Mɔtɔ a amɔ́ o oyɛda a amɔ́ a nɔ́ɔnɔnɔ Asaŋa gɔ́ɔ mɔ́ɔ a bɛlabɛla ondimóní, bendiemi a lɛ́ umbelíbélí. Mɔtɔ mɔ́ɔnyɔ a lɔ́mɔ́ a dɛ nɔ́ɔ́nɔ́nɔ́ɔ ondimóní, gɔ́ɔ mɔ́ɔ a mo núune, a dɛ bósó ba go nɔ́ɔ Asaŋa, gɔ́ɔ mɔ́ɔ a dɛ mo ɛ́nánáa.

²¹Kɔ́ɔ gɛlɔsɛnɔ gɛ́ɛgɛ Kilítusu a lɔ́mɔ́ có fáalú gɛ́ lɔ́mɔ́: Ŋgáa mɔtɔ mɔ́ɔnyɔ a nɔ́ɔnɔnɔmɔ́ Asaŋa, a nɔ́ɔ tɔ́nɔ ondimóní[17].