Read Nugunu 1 Sáŋa 5 Bible Online

1 Sáŋa 5 - Nugunu bible

1 Sáŋa 5

¹Mɔtɔ uŋkimée mɔ́ɔnyɔ o olimonyomú a amɔ́ Yésusu a lɛ́ Kilítusu, mɔtɔ bendiemi a lɛ́ moɔnɔ́ ba Asaŋa; aáŋa o nɔ́ɔnɔnɔ Isée, o nɔ́ɔnɔnɔ tɔ́nɔ baaná.

²Aáŋa dɛ nɔ́ɔnɔnɔ Asaŋa, dɛ gunde dɛ ŋanana aŋa bɛlɔsɛnɔ bɛ́hɛ́ bɛ́ oyamɔ́, hɔ́ɔlɔ́ dɛ lɛncana goŋaá dɛ nɔ́ɔnɔnɔ baaná bá Asaŋa.

³Mammana, gɛnɔ́ɔ́nɛ́nɔ́ gá Asaŋa gɛ́ lɔ́mɔ́ goŋaá dɛ beŋebeŋe bɛlɔsɛnɔ bɛ́hɛ́[18]. Bɛlɔsɛnɔ bɛ́hɛ́ bɛ́ dɛ báá gɛnóɛ́,

⁴goakɛ́ uŋkimée mɔ́ɔnyɔ a lɔ́mɔ́ Moɔnɔ́ ba Asaŋa a mánɛgana magaaga má cí. Goágana odɛ́má yɛ́cɔ́ naá Yésusu, gɔ́ gó lɔ́mɔ́ kanɛ́ gɛmánɛgɛna gá magaaga má cí.

⁵Ánɛ́ɛ a lɔ́mɔ́ gɛmánɛgɛna gá magaaga má cí aáŋa caá mɔ́ɔnyɔ o olimonyomú a amɔ́ Yésusu a lɛ́ Moɔnɔ́ ba Asaŋa o?

⁶A lɔ́mɔ́ Yésu Kilítu mɔ́ɔnyɔ mɔ́ɔ a mbuú úlé, a báá dómbá naá miimpo na naá manɔ́ŋɔ́, caá akɛ́ goana naá miimpo, kanɛ́ naá miimpo na naá manɔ́ŋɔ́. Gimmúmpúu gá Giliíli o oya nɔ́ɔ, ŋgominyo yɛ́hɛ́ ɛ lɛ́ mammana; goakɛ́ Giliíli a lɛ́ mammana.

⁷Ŋgominyo ɛ́dadɔ́ sɛ́ɛsɛ sɛ́ lɛ́ ukelú táŋɛ́ yúmmue[19]:

⁸Gimmúmpúu gá Giliíli, miimpo na manɔ́ŋɔ́; ŋgoyáamɔ́ yabɔ́ ɛ lɛ́ boóma búmmue eé búmmue.

⁹Dɛ amɔ́ dɛ gɛ́ndɛgɛna ŋgominyo ya batɔ, yɛ́ɛyɛ ya Asaŋa ɛ lɛ́ gɛkɔ́nɔ́nɔ́ɔ ɛ dómba, goakɛ́ ɛ lɛ́ ŋgominyo yɛ́ɛyɛ ɛ mbaá báŋaáa go busío bá Moɔnɔ́ bɛhɛ́.

¹⁰Mɔtɔ uŋkimée mɔ́ɔnyɔ a áganamɔ́ odɛ́má naá Moɔnɔ́ ba Asaŋa a bɛanana ŋgominyo yɛ́ɛyɛ. Mɔtɔ mɔ́ɔnyɔ a lɔ́mɔ́ a dɛ ágánáa odɛ́má naá Asaŋa a mo gɔ́lɔnɔ aŋa umbelíbélí, goakɛ́ a dɛ olímónyóo ŋgominyo yɛ́ɛyɛ Asaŋa a mbaá ŋaáa go busío bá Moɔnɔ́ bɛhɛ́.

¹¹Ŋgominyo moánɛ yɛ́yɛ́ɛ: Asaŋa a mba có fáá gɛɔyɔ gá kanɛ mesúge; gɛɔyɔ moánɛ, gɛ́ lɔ́mɔ́ naá Moɔnɔ́ bɛhɛ́.

¹²Mɔ́ɔnyɔ a lɔ́mɔ́ na Moɔnɔ́, a bɛanana gɛɔyɔ moánɛ; mɔ́ɔnyɔ a lɔ́mɔ́ a dɛ báá na Moɔnɔ́ ba Asaŋa, a dɛ gɛ́ bɛanánáa[20].

¹³Ndɛ́ ɔ́ŋɔ́ɔlú buimée bɔ́ɔbɔ go bɛɛnyɔ́ɔ biimée báaba no áganamɔ́ odɛ́má yɛ́nyɔ́ naá Moɔnɔ́ ba Asaŋa go go íyime no amɔ́ no bɛanana gɛɔyɔ gá kanɛ mesúge.

¹⁴Toodo odɛ́máa yɛ́ɛyɛ dɛ bɛananamɔ́ naá boayá bɛ́hɛ́ ɛ lɔ́mɔ́ goŋaá, dɛ amɔ́ dɛ mo ɔŋɛnɔ boóma go ndɛ́ga yɛhɛ́, a có ɔ́bɔnɔ.

¹⁵Gó gunde, aáŋa dɛ íyimene goŋaá ɔ ɔ́bɔnɔ ɛkádɛ giimée gɛ́ɛgɛ dɛ mo ɔŋɔnɔmɔ́, dɛ íyimene dɛ amɔ́ dɛ báá go bɛa bɔ́ɔbɔ dɛ mo ɔŋɔnɔmɔ́.

¹⁶Mɔtɔ a amɔ́ ɛ ɛ́na ondimóní a ŋanana gɛlɔgɔ, kanɛ́ bó do bɛ́ɛ́mbá gɛlɔgɔ gɛ́ɛgɛ gɛ́ ŋananamɔ́ goŋaá a gúe, ŋgáa a bósógolonyo; Asaŋa a ná fáa ondimóní ba ndiemi gɛɔyɔ aáŋa mammana mammana, gɛlɔgɔ gá ndiemi gɛ́ lɛ́ gɛ́ɛgɛ gɛ́ lɔ́mɔ́ gɛ́ dɛ ŋanánáa goŋaá a gúe. Kanɛ́ gɛlɔgɔ gímmue gɛ́ lɛ́ hɔ́ɔ gɛ́ɛgɛ gɛ́ ŋananamɔ́ goŋaá mɔtɔ a gúe, bó do báá go gɛ́ gɔ́ɔ ndɔ́mɔ́ caá no bósógolonyo go busío bá ondimóní bɛnyɔ́.

¹⁷Gɛgáda gá meŋiigíe giimée gɛ́ lɛ́ gɛlɔgɔ, kanɛ́ gɛlɔgɔ giimée gɛ́ dɛ ŋanánáa goŋaá mɔtɔ a gúe.

¹⁸Dɛ íyimene dɛ amɔ́ baaná bá Asaŋa biimée bá dɛ gɔnɔ́ ŋanana gɛlɔgɔ, goakɛ́ Moɔnɔ́ ba Asaŋa a bó beŋebeŋe, go goŋaá Ohándá a dɛ bó ŋaáa boóma bobɛ́.

¹⁹Dɛ íyimene dɛ amɔ́ dɛ lɛ́ bá Asaŋa, kanɛ́ batɔ bá cí iŋkimée bá lɛ́ naá magálá má Ohándá.

²⁰Dɛ íyimene dɛ amɔ́ Moɔnɔ́ ba Asaŋa a mbu úlé, a báá có fáá nciŋí ya goŋaá dɛ lɛnca Mɔ́ɔnyɔ a lɔ́mɔ́ Mammana. Dɛ lɛ́ Nɛhɛ́ naá Moɔnɔ́ bɛhɛ́ Yésu Kilítu. Mɔ́ɔ a lɔ́mɔ́ Mammana; a lɛ́ Asaŋa, a lɛ́ gɛɔyɔ gá kanɛ mesúge.

²¹Baaná bámɛ, bébeŋéemú nɔnɔ go bɛgɔgɔ́.