Read Nugunu 3 Sáŋa 1 Bible Online

3 Sáŋa 1 - Nugunu bible

3 Sáŋa 1

¹Yɔmɔ́ɔ Ofɛanɔ́ɔ, ŋgɔ́ŋɛnɔmɔ́ bamɛ ba odɛ́má Géyusu[1] mɔ́ɔnyɔ mmaamanamɔ́ mammana mammana.

²Bamɛ ba odɛ́má, cɔ́nɔ caá o bɛ́ɛmba bese go pɛ́ iŋkimée, o bɛ́ɛmba tɔ́nɔ na bogɔ́sɔ bá nnyɔ́dɔ caŋa mmue aŋa o lɔ́mɔ́ na bɔ́ naá masɛnɛ má giliíli.

³Bolimóní bɛ́cɔ́ bá go nco go úle hɔ́ɔlɔ́, bá lɛ́ ŋgoyánáalú aŋa o lɔ́mɔ́ nábɛnábɛ na mammana, go ɔyɔ aŋa mammana moánɛ yɛ oyamɔ́. Cɔ́mɔ moánɛ ɛ lɛ́ ŋgóbíolú bɛyaŋa makɔ́nɔ́ naá odɛ́má.

⁴Boóma bá go páa bɛyaŋa makɔ́nɔ́ naá odɛ́má bó dómba goɔ́bɔnɔ gɔ́ɔgɔ ŋgɔ́bɔnɔmɔ́ goŋaá baaná bámɛ bɔ́ ɔyɔ gɔgɔ́ aŋa mammana yɛ oyamɔ́, bó do báá.

⁵Bamɛ ba odɛ́má, o dúfenye pídefide naá boóma buimée bɔ́ɔbɔ o ŋananamɔ́ go bolimóní bɛ́cɔ́ akɛ́ na biinyí biinyíi bá batɔ.

⁶Bolimóní bɛ́cɔ́ moánɛ bó oyá naá busío bá giimbó gɛ́cɔ́ gá boolímínyí gɛnɔ́ɔ́nɛ́nɔ́ gɛ́ɛgɛ o lɔ́mɔ́ na gɛ́. Sɔ́kɔlɛ, bó óhígínyóomú aŋa gɔ́ɔgɔ bó háananamɔ́ naá oŋgíso yá Asaŋa, go goŋaá bɛ́ ɛ́da na oŋɛndɔ yábɔ́ naá busío.

⁷Mammana, bá lɛ́ bienéelú pɛ́ go mbiene go go yɔgɔnɛnɔ Kilítusu kanɛ go gɛ́ndɛgɛna boóma naá ɛmbɔ́gɔ ya báaba bá lɔ́mɔ́ bá dɛ bienénée Yésusu.

⁸Kɔ́ɔ dɛ lɔ́mɔ́ na gɛgaŋa go go óhiginyo mbɔ́dɔ sá batɔ aŋa sɛ́ɛsɔ nɔ́ɔnɔ goŋaá dɛ́ ba gɔ́lɔ́ bɛɛcɔ́ɔ tɔ́nɔ, bodáŋɔ olɔŋɔ nabɔ́ naá gosélemendenye gá mammana.

⁹Ndɛ́ ɔ́ŋɛ́nɔ́ɔlú giimbó gɛ́nyɔ́ gá boolímínyí moɔnɔ́ ba kálata. Kanɛ́ Diótelefe mɔ́ɔnyɔ a lɛ́galɛgamɔ́ go indenye boóma buimée, a dɛ olímónyóo akɛ́ bá búmmue bɔ́ɔbɔ ŋgoyamɔ́.

¹⁰Go busío moánɛ, gɔ́ɔgɔ nnú úlemú, nná bala gɛbɛ́ giimée gɛ́ɛgɛ a ŋananamɔ́. A lɔ́mɔ́ hɔ́ɔ go go có dúme go gɛbɛ́, o oya ŋkanɔ́ aá ŋkanɔ́ɔ go busío bɛ́cɔ́. Kanɛ́, a dɛ gá súge goana hɔ́ɔlɔ́, i inyene go gólio bolimóní bɛ́cɔ́ báaba bá lɔ́mɔ́ go nɛdómba. Batɔ báaba bá lɛ́galɛgamɔ́ go bó gɛ́ndɛgana, a bó legene a gunde a bó gúne naá Giimbó gá boolímínyí.

¹¹Bamɛ ba odɛ́má, o do gɔ́lɔ́nɔ́ɔ gieninye go bɔ́ɔbɔ bó lɔ́mɔ́ gɛbɛ́, kanɛ́ go bɔ́ɔbɔ bó lɔ́mɔ́ besé. Mɔ́ɔnyɔ a ŋananamɔ́ besé, ɔ́bɔnɛnɔ na Asaŋa; mɔ́ɔnyɔ a ŋananamɔ́ gɛbɛ́ a dɛ íyíménée Asaŋa.

¹²Naá boayá bá Demetíliusu, batɔ biimée bá gálagala besé go busío bɛ́hɛ́, mammana moatɛ́ ɛ mo ségi. Bɛɛcɔ́ɔ tɔ́nɔ dɛ oya dɛ amɔ́ a ŋanana bese, o gunde go íyimene go amɔ́ bɔ́ɔbɔ dɛ oyamɔ́ bó lɛ́ mammana.

¹³Ká bɛanana gɛcɛcá gá moóma gíncodío gá go go oyanɛna, kanɛ́ cɛ lɛ́gálɛ́gáa go mó ɔ́ŋɔ naá mafɛ́bɛ́.

¹⁴Kanɛ́ mbémineminie caá dɛ gɛɛ́ ɛ́náná buisí, dɛ oya ŋkanɔ́ dɛ núunenine.

¹⁵Ŋgáa buumbénú bó bɛ́ɛmba nahɔ. Begúle báhɔ bá á go bédíígényée. Bédíígényée tɔ́nɔ begúle bɛ́cɔ́ ummue go ummue.