Read Nugunu Yúude 1 Bible Online

Yúude 1 - Nugunu bible

Yúude 1

¹Yɔmɔ́ɔ ndɔ́mɔ́ Yúude, uyogóní ba Yésu Kilítu, kanɛ́ ndɔ́mɔ́ ondimóní ba Sáakɛ. Yɔmɔ́ɔ ŋgɔ́ŋɛnɔmɔ́ báaba Asaŋa a lɔ́mɔ́ dɔ́ŋɛ́nɔ́ɔlú, báaba a maamanamɔ́, bá gunde báaba bá lɔ́mɔ́ bɛ́dɛ́gɛ́náalú go busío bá Yésu Kilítu.

²Ŋgáa Asaŋa a nyó ɛ́na mahana, a nyó fáa buumbénú na gɛnɔ́ɔ́nɛ́nɔ́ fundufundu.

³Bámɛ bá odɛ́má, mmba lɛ́ ndɛ́galɛga makɔ́nɔ́ caá nnyó ɔ́ŋɛnɔ kálata go bosɔ́mɔ bɔ́ɔbɔ bó núunemú gɛpáa gá gɛɔyɔ gɛ́ɛgɛ dɛ bɛananamɔ́ aŋa dɛ bienenemú Yésu Kilítu. Gɔ́ɔ mbétememú naá gɛgaŋa gá go nyó dómɛna kálata yɛ́ɛyɛ goŋaá nyó gúluminye go nca ya gioliminyo gɛ́ɛgɛ Asaŋa a mbaá fáá bɛ́hɛ́ oŋɛndɔ yúmmue go busío buimée.

⁴Nnyó ɔ́ŋɛnɔmɔ́ goŋaá bindiíyímé Asaŋa bɛ́ lɛ́ íŋénéelú nnyimé nnyimé naá kadɛ́gadɛ́ɛ yɛnyɔ́. Bá góŋona ŋgoyáamɔ́ ya Asaŋa yɛ́ɛyɛ a mbaá có boogóo, go go dúfie bá amɔ́ gɛbɛ́ gábɔ́ gá gɛɔyɔ gɛ́ lɛ́ bese. Bí inyene sótá yɛcɔ́ yá Ogɔ́nɔ́ɔ na Daadáa Yésu Kilítu. Kanɛ́ gó bayɛga fueké, bá mba dóógío gosómba gá gɛsɛnɛ gábɔ́ naá Ŋgɔ́ŋɛ́.

⁵Aŋa no íyimenemú buimée bɔ́ɔbɔ ndɔ́mɔ́ goŋaá nyó oyana, ndɛ́galɛga go nyó eniŋinye aŋa Daadáa a mboó oyóo boɛ́nɔ bá Ɛ́sɛlahɛ́ɛlɛ, a báá bó húmíe naá gɛdɔŋɔ gá Egíbítene go busío buimée, kanɛ́ a báá fúúgíe báaba bá mbií inyé go ága odɛ́má yábɔ́ naá mɔ́ɔ.

⁶Bééníŋínyéemú nɔnɔ bɛɛ́ŋgɛlɛsɛ báaba bá mbií inyé odɛ́nɛ́ yábɔ́ yá nigúmi, bá báá síé bá báá dɛ́ɛ́ná hoóma háaha Asaŋa a mbaá bó ágá hɔ́ɔ go go gúme. Gó moánɛ Asaŋa a bó bɛ́dɛganamɔ́ gódágódá, naá ɛbɛ́lá ná mbíno go busío buimée, bá gɛ́gana gɛantá gá buisí bá go sómba bɛsɛnɛ.

⁷Bééníŋínyéemú nɔnɔ tɛ́sɔnɔ ya Sɔdɔ́mɔ na ya Gɔmɔ́ɔlɔ na sɛ́ɛsɛ sɛ́ mbaá lɛ hɔ́ɔ mekúígíi, aŋa batɔ bá tɛ́sɔnɔ sá ndiemi bá mbɔɔ́ ɔyɔ́ɔ gɛbɛ́ akɛ́báamɔ́, bá báá fúmbée go bɛ́dɛmana na bigedie bɛ́ɛbɛ bɛ́ mbaá lɔmɔ́ bɛ́ dɛ bɛ́ɛ́mbá aŋa bɔ́ɔ. Bá bɛanana noséésényée ná íyuke há kanɛ mmanɛ́náa, go go lɔsɛnɔ batɔ biimée.

⁸Nɔ́ɔ gɔ́ɔ batɔ báaba bá lɔ́mɔ́ naá kadɛ́gadɛ́ɛ yɛnyɔ́ bɔ́ɔbɔ, bɔ́ ɔyɔmɔ́ tɔ́nɔ aŋa batɔ bá tɛ́sɔnɔ sɛ́ɛsɔ. Bá lɛmanɛna moóma má kanɛ go fɛa, bá lɔgɔ nnyɔ́dɔ sábɔ́ sá moatɛ́, bá fánɛnana bugúmigumi bá Daadáa, bá sɛga bigedie bá nigúmi bɛ́ɛbɛ naá mmoɛná.

⁹Akɛ́ Mɛ́sɛálɛ, ogɔ́nɔ́ɔ ba bɛɛ́ŋgɛlɛsɛ, a dɛ mba ŋa nɔ́ɔnɔ, aŋa bá mbaá lɔmɔ́ bá suŋe gigúe gá Mɔ́sɛsɛ nɛhɛ́ na Sátana. Mɛ́sɛálɛ a dɛ mbá sɛgɛda Sátana, akɛ́ go mo fánɛna, goana a mbaá mo oyáná a amɔ́: «Ŋgáa Daadáa a go séesenye!»

¹⁰Kanɛ́ batɔ bɔ́ɔbɔ bá sɛga moóma mɔ́ɔmɔ bá lɔ́mɔ́ bá dɛ íyíménée, bí íyimene go odóɛ yábɔ́ aŋa nnyama, goíyime gábɔ́ gɔ́ɔgɔ gó ŋga bó sulíe.

¹¹Mahana makɔ́nɔ́ nabɔ́, goakɛ́, bá lɛ́ bienéelú gɛgɔ́ndɔ́ gá Kéyine. Bá báá bɔ́nɔɔ́ɔ naá giédie go muinyí aŋa Bálama. Bá ŋga fúé, goakɛ́ bá mba bááŋɛ́gá Asaŋa aŋa Kolée.

¹²Kanɛ cuŋíi, bɔ́ɔ bá díeŋenyemú manyáanya má bulimóní máama no ebinyebinyemú nabɔ́, bá bíne kanɛ odóɛ gonóa, bá lɔ́mɔ́ goana go gadɛ́ɛ gábɔ́ moatɛ́. Bá lɛ́ aŋa bisumbe bá nobólá bɛ́ɛbɛ bɛ́ dómbanamɔ́ go puŋe, kanɛ go naa nobólá. Bá lɛ́ aŋa mɛɛ́tɛ máama má lɔ́mɔ́ má dɛ úmée bɛsamɔ́, akɛ́ naá gɛcamɛna gá go gása. Aŋa bá má bálamɔ́, má gúe go busío buimée.

¹³Bá lɛ́ aŋa miimpo má máŋɛ́ máama má fuluŋuncenemú, bá dúenenye meŋiigíe mábɔ́ má odóɛ gonóa naá busío bábɔ́. Bá lɛ́ aŋa muotóti má go bána. Asaŋa a mba bó bɛ́dɛ́gɛ́nɛ́ná undukí naá mbíno ya tábɔ́tabɔ.

¹⁴Ɛ́nɔgɔ, naá ogɛlɛ yá gátáanɔ na gáandɛ́ɛ naá nnyimé ya Ádama, a mba gálágáláa amɔ́: «Ɔ́bɔ́ nɔnɔ, Daadáa a nú úle na bimmúmpúu bá bɛɛ́ŋgɛlɛsɛ bɛ́hɛ́ batɔ́sɛnɔ batɔ́sɛnɔ,

¹⁵go go nco sómba gɛsɛnɛ gá batɔ bá cí biimée. Gɛsɛnɛ gɛ́ ŋga gumbéné bologí biimée, go bɛbɛ́ bábɔ́ bá meŋiigíe bɛ́ɛbɛ bá mbaá mo ŋanánáa, gɔnɔ́ go dogálɔ dá cigí dɔ́ɔdɔ bindiíyímé Asaŋa bɛ́ɛbɔ, bɛ́ mbaá mo gálɛ́nágálɛ́náa.»

¹⁶Batɔ bɔ́ɔbɔ bá dɛ ɔ́bɔ́nɔ́ɔ bese gɛcamɛna giimée; bá béségi go gɛɔyɔ gábɔ́; bɔ́ ɔyɔ aŋa bá maamanamɔ́; bá gálagala go go bédúfenye, bá foloofolio basɔ́gɔ́ɔ go go bó nyɛ́ɛna.

¹⁷Kanɛ́ bɛɛnyɔ́ɔ begúle bámɛ bá odɛ́má, bééníŋínyéemú nɔnɔ dogálɔ dɔ́ɔdɔ baapótɛlɛ bá Daadáa bɛɛcɔ́ɔ Yésu Kilítu bá mbaá nyó oyáná cóá.

¹⁸Bá mba nyó oyáná bá amɔ́: «Naá gosúgudinye gá cí, batɔ bá ŋga bológánáa, bá nyó hɔnɔ bɛɛnyɔ́ɔ báaba no bienenemú Asaŋa, bɔ́ɔ, bɔ́ ɔyɔ aŋa bá maamanamɔ́.»

¹⁹Bá lɔ́mɔ́ bɔ́ɔ, batɔ bá go dádona, bá lɛ́ na mbééníŋínyí ya mɔtɔ, bá dɛ bɛanánáa Giliíli ba Asaŋa.

²⁰Kanɛ́ bɛɛnyɔ́ɔ begúle bámɛ bá odɛ́má, bégíndíemú nɔnɔ naá gɛɔyɔ, no óhigoninyo go go lɔbɛnɔ tɛ́ŋɛ́tɛŋɛ naá mammana ya gioliminyo gɛ́ɛgɛ naá Yésu Kilítu. Bósógólónyóomú nɔnɔ na bogaaga bá Gimmúmpúu gá Giliíli.

²¹Gɛ́gáa nɔnɔ naá gɛnɔ́ɔ́nɛ́nɔ́ gá Asaŋa. No gɛ́gana gɛcamɛna gɛ́ɛgɛ, naá busi bɛ́hɛ́, Daadáa bɛcɔ́ Yésu Kilítu a ŋgaá nyó fáá gɛɔyɔ gá medúgú miimée.

²²Báaba bá lɔ́mɔ́ na cuŋí naá ɛdɛ́má yábɔ́, no bó ɛ́na mahana.

²³No háananamɔ́ go bó sódio, goakɛ́, bɛ́ ɛ́dana naá íyuke. Bóntió, no bó ɛ́ná mahana, kanɛ́, no bɛa bofoá goŋaá bá dɛ nyó íŋényée naá bɛlɔgɔ bábɔ́. Báyáŋáamɔ́ nɔnɔ bɛla bábɔ́ bɛ́ɛbɛ bɛ́ lɔ́mɔ́ na biílo bá bɛgáda bá meŋiigíe mábɔ́.

²⁴Nigúmi na Asaŋa mokáa mɔ́ɔnyɔ a có sódonyomú gá Yésu Kilítu Daadáa bɛcɔ́. A lɛ́ ba go lege goŋaá no do obɛ́ná naá bobɛ́, a lɛ́ ba go nyó gundie bimmúmpúu, a nyó díliminye naá busío bɛ́hɛ́, ɛdɛ́má dácɛ na bɛyaŋa, no ɛ́na nigúmi nɛ́hɛ́. Go busío bɛ́hɛ́ nigúmi, bogɔ́nɔ́ɔ, bogaaga na nɛgaŋa gó bayɛga fueké, godɔ́ɔdɔ, gɔnɔ́ na go busío buimée! Aamɛnɛ.