Read Nugunu Tóogio 1 Bible Online

Tóogio 1 - Nugunu bible

Tóogio 1

¹Kálata yɛ́ɛyɛ yɛ oya moóma mɔ́ɔmɔ Yésu Kilítu a mbaá dóógínyóo boyogóní bá Asaŋa. Asaŋa a mbaá fáá Yésusu moóma mɔ́ɔmɔ mó háananamɔ́ go bola godɔ́ɔdɔ godɔ́ɔdɔ goŋaá a bó dóoginyo. Boóma moánɛ bɔ́ɔ Yésusu a mbaá dómɛ́ná uyogóní bɛhɛ́ Sáŋa ɛ́ŋgɛlɛsɛ bɛhɛ́ goŋaá a mo dóoginyo moóma moánɛ.

²Sáŋa a lɛ́ ŋgominyo goŋaá buimée bɔ́ɔbɔ a mbɛɛ́ ɛ́ná bó lɛ́ nogálɔ ná Asaŋa, na mammana yɛ́ɛyɛ Yésu Kilítu a mbaá dóógío.

³Besé makɔ́nɔ́ na mɔ́ɔnyɔ a banamɔ́ na báaba bá bódólonyomú dogálɔ dá mbúsí sá Asaŋa dɔ́ɔdɔ, bá gunde bá bɛ́dɛgana bɔ́ɔbɔ bó lɔ́mɔ́ ɔ́ŋɔ́ɔlú kɔ́ɔ, goakɛ́ gɛcamɛna gɛ́ ná lɛ́ mekúígíi.

⁴Yɔmɔ́ɔ Sáŋa, ŋgɔ́ŋɛnɔmɔ́ Biimbó bɛ́táanɔ na bɛ́andɛ́ bá boolímínyí bɛ́ɛbɛ naá gigísi gá cí gá Esíi. Ŋgáa Asaŋa mɔ́ɔnyɔ a lɔ́mɔ́, mɔ́ɔnyɔ a mbaá lɔmɔ́, a gɔnɔmɔ́ go úlene, na biliíli bɛ́táanɔ na bɛ́andɛ́ bɛ́ɛbɛ bɛ́ lɔ́mɔ́ naá busío bá undukí yɛ́hɛ́ yá bufuŋe, bá nyó boogo, bá nyó fáa buumbénú.

⁵Tɔ́nɔ na Yésu Kilítu, ŋgominyo ba pídefide, mɔtɔ ba busío ba go fúfuge go busío buimée naá kadɛ́gadɛ́ɛ ya begúe, Ufuŋe yá mefuŋe má cí. Mɔ́ɔ mɔ́ɔnyɔ a có maamanamɔ́, a báá có fáŋá go bɛlɔgɔ bɛ́cɔ́ na manɔ́ŋɔ́ mɛ́hɛ́.

⁶Ŋgáa nigúmi na bogaaga mó bɛ́ɛmba go mannyómá aá mannyómáa na Mɔ́ɔnyɔ a mbaá có íyíe boɛ́nɔ bá Asaŋa, a báá có íyíe bedúmbí bɛbáágá go go yɔgɔnɛnɔ Asaŋa Isée! Aamɛnɛ.

⁷Ɛ́ná nɔnɔ, u úlene naá nogálámbá gadɛ́ɛ, mɔtɔ uŋkimée a ŋga mo ɛ́ná, akɛ́ báaba bá mbaá mo poló noɛndá; egúli yá cí eŋkimée yá ŋga baŋáa go busío bɛ́hɛ́. Ɛɛ́ɛŋ, bó ŋgaá bɛ́ɛ́mbá nɔ́ɔnɔ! Aamɛnɛ.

⁸Daadáa Asaŋa bogaaga buimée a amɔ́, ndɛ́ Áláfa na Omɛ́ga, nɔ́ɔnɔ gó lɛ́ aá, mabayɛga na mesúge; ndɛ́ mɔ́ɔnyɔ a lɔ́mɔ́, mɔ́ɔnyɔ a mbaá lɔmɔ́, mɔ́ɔnyɔ a gɔnɔmɔ́ go úlene.

⁹Yɔmɔ́ɔ, Sáŋa, ondimóní bɛnyɔ́, ndɛ́ olɔŋɔ nɛnyɔ́ naá gɛɔ́bɛgɔ, olɔŋɔ nɛnyɔ́ naá bufuŋe gɔnɔ́ naá ɛbágóɛga hɛ́ɛhɛ naá Yésusu. Mmbaá lɛ naá Pátɛmosɛ, gɛyɛŋɛ gá cí gɛ́ɛgɛ naá máŋɛ́, go busío bá nogálɔ ná Asaŋa, na go gɔ́ɔgɔ mmbaá lɔmɔ́ túfenye goŋaá Yésusu a lɛ́ mammana.

¹⁰Buisí bá Daadáa[1] búmmue, Gimmúmpúu gá Giliíli go kumbene, mbáa lɛ gó ɛ́da go ɔ́bɔnɔ gɛantáanta gá ukelú naá yɔmɔ́ nnyimé, yó dɔgɔnɔ aŋa cɛ́bá,

¹¹yó amɔ́: «Bɔ́ɔbɔ go ɛ́nanamɔ́, bó ɔ́ŋɔ́ɔmɔ́ naá kálata, o dómɛna Biimbó bá boolímínyí bɛ́táanɔ na bɛ́andɛ́ bɛ́ɛbɛ bɛ́ lɔ́mɔ́: naá tɛ́sɔnɔ ya Ɛ́fɛsɛ, naá Simíline, naá Pɛlɛgáma, naá Tietíile, naá Sáládɛsɛ, naá Filedelefíi na naá Leyodíse.»

¹²Ŋgaá bábondóná caá ŋgɛ́na mɔ́ɔnyɔ a kálagalamɔ́, gɔ́ɔ ŋgɛ́namɔ́ bɛdálɛ́ná lámba bá góolo bɛ́táanɔ na bɛ́andɛ́.

¹³Naá tɛ́mádɛ́má ya bɛdálɛ́ná lámba bɛ́ɛbɔ, mɔtɔ a mba lɛ́ hɔ́ɔ, a fóanana aŋa moɔnɔ́ ba mɔtɔ ummue. A mba lɛ́ na gɛntaálala gá kaba, kandáa ya góolo básómbɛ́náalú naá gɛsasɔ.

¹⁴Odóɛ yɛ́hɛ́ yó mba lɛ́ páyáŋɛ́ payaŋɛ, cóɛ sɛ́hɛ́ mmúmpúu aŋa ndɛbɛ. Oŋgíso yɛ́hɛ́ aŋa gɛlɛ́mbɛ gá íyuke.

¹⁵Bɛgɔ́ndɔ́ bɛ́hɛ́ bɛ́ mba lɛ́ bɛ́ geyime aŋa gɛkɔ́ŋɔ gá ŋaá gɛ́ á húmé naá íyuke há udúnedune. Ukelú yɛ́hɛ́ yó mba lɛ yó dɔgɔnɔ aŋa miimpo má osaá.

¹⁶A mba lɛ́ a nona muotóti mótáanɔ na móandɛ́ naá ombɔ́gɔ onɔ́mɛ yɛ́hɛ́. Kalafɔ ya mɔnɔ maayá miimée ɛ mba lɛ́ ɛ húmene naá mɔ́ nyuudé. Busío bɛ́hɛ́ bó mba lɛ́ bó bonya aŋa gɛonyá gá tólóbóo.

¹⁷Aŋa mmbaá mo ɛ́ná, gámɛ go oba naá mɔ́ bɛgɔ́ndɔ́ aŋa ndɛ́ ugúe. Gɛ́hɛ́ go tála ombɔ́gɔ onɔ́mɛ yɛ́hɛ́ a amɔ́: «O do bɛáa bofoá, Ndɛ́ ba Busío na ba Mesúgidinye[2].

¹⁸Ndɛ́ mɔ́ɔnyɔ a lɔ́mɔ́ Ogɔ́sɔ. Mmba gúé, kanɛ́ godɔ́ɔdɔ ndɛ́ ogɔ́sɔ go mannyómá aá mannyómáa. Nnona mubuune má nigúe na má Hoóma há begúe.»

¹⁹Ɔ́ŋɔ́ kanɛ́ bɔ́ɔbɔ o báá ná núúnée; bɔ́ɔbɔ bó bádómbanamɔ́ godɔ́ɔdɔ na bɔ́ɔbɔ bó ná bádómbanamɔ́ naá nnyimé.

²⁰Go bɔ́ɔbɔ bó núunemú nnindíi ya muotóti mótáanɔ na móandɛ́ mɔ́ɔmɔ o báá nɛ́ ɛ́ná naá yɔmɔ́ ombɔ́gɔ onɔ́mɛ, na bɛdálɛ́ná lámba bɛ́táanɔ na bɛ́andɛ́, bó lɔ́mɔ́ náana: Muotóti mótáanɔ na móandɛ́ mó lɔ́mɔ́ bɛɛ́ŋgɛlɛsɛ báaba Asaŋa a mbaá dílímínyée naá Biimbó bá boolímínyí bɛ́táanɔ na bɛ́andɛ́. Bɛdálɛ́ná lámba bɛ́táanɔ na bɛ́andɛ́ bɛ́ lɔ́mɔ́ Biimbó bɛ́táanɔ na bɛ́andɛ́ bá boolímínyí.